އަމިއްލަ ދަނޑުގައި މޮޅުވެ، އެތުލެޓިކޯ ގަދަ 16 އަށް

ޔުއެފާ ޗެމްޕިއަންސް ލީގުގެ ޕްލޭ އޮފްގެ ދެ ވަނަ ލެގުގައި ކުލަބު ބްރޫޖްއާ ދެކޮޅަށް ކުޅުނު މެޗުން މޮޅުވެ، އެތުލެޓިކޯ މެޑްރިޑް އިން މުބާރާތުގެ ގަދަ 16 ވަނަ ބުރުގެ ޖާގަ ހޯދައިފި އެވެ.

އެތުލެޓިކޯގެ އަމިއްލަ ދަނޑުގައި ކުޅުނު މެޗު އެ ޓީމުން ވަނީ 4-1 އިން ކާމިޔާބު ކޮށްފަ އެވެ. އޭގެ ކުރިން ކުލަބު ބްރޫޖްގެ އަމިއްލަ ދަނޑުގައި ކުޅުނު ފުރަތަމަ ލެގު ނިމުނީ 3-3 އިން އެއްވަރު ވެގެންނެވެ. ދެ ލެގުގެ ނަތީޖާ 7-4 އިން ކުރި ހޯދައި، އެތުލެޓިކޯ އިން ވަނީ ގަދަ 16 އަށް ދަތުރު ކޮށްފަ އެވެ.

މެޗު ފަށައިގެން 23 ވަނަ މިނެޓުގައި އެލެގްޒެންޑާ ސޯލޮތު ވަނީ ލަނޑު ޖަަހައި އެތުލެޓިކޯ އަށް ކުރި ހޯދައިދީފަ އެވެ. ނަމަވެސް، ފުރަތަމަ ހާފުގެ 36 ވަނަ މިނެޓުގައި ޖޮއެލް އޯޑޮނޭޒް ވަނީ ލަނޑު ޖަހައި ކުލަބު ބްރޫޖް އަށް ނަތީޖާ ހަމަހަމަ ކޮށްދީފަ އެވެ. ދެ ވަނަ ހާފު ފަށައިގެން ތިން ވަނަ މިނެޓުގައި ދެ ވަނަ ފަހަރަށް އެތުލެޓިކޯ އިން ލީޑު ނެގީ ޖޯނީ ކާޑޮސޯ ޖެހި ލަނޑުންނެވެ.

އޭގެ ފަހުން މެޗުގެ 76 ވަނަ މިނެޓުގައި ސޯލޮތު ވަނީ އެތުލެޓިކޯގެ ތިން ވަނަ ލަނޑު ޖަަހައި އިތުރަށް ލީޑު ފުޅާ ކޮށްފަ އެވެ. އަދި މެޗުގެ 87 ވަމަ މިނެޓުގައި ސޯލޮތު ވަނީ އިތުރު ލަނޑެއް ވެސް ޖަހައި، މެޗުގައި އޭނާގެ ހެޓްރިކް ހަމަ ކޮށްފަ އެވެ. 

ޗެމްޕިއަންސް ލީގުގެ ފޯމެޓު މިހާރު އޮތީ ގަދަ އަށް ޓީމަށް ސީދާ ގަދަ 16 އިން ޖާގަ ލިބޭ ގޮތަށެވެ. ގަދަ 16 ގެ އަނެއް އަށް ޖާގަ ލިބެނީ ނުވަ ވަނަ އާއި، 24 ވަނައާ ދެމެދު އޮންނަ ޓީމު ތަކުގެ މެޗުގައި ކުޅޭ ޕްލޭ އޮފް އިން މޮޅުވާ ޓީމު ތަކަށެވެ.