ދެ ވަނަ ލެގުގައި ވެސް ބެންފީކާ ބަލިކޮށް، ރެއާލް ގަދަ 16 އަށް
މެޗުން މޮޅުވެ، ރެއާލް އިން ގަދަ 16 ވަނަ ބުރުގެ ޖާގަ ހޯދީ އެގްރިގޭޓް ނަތީޖާ 3-1 އިން.
މެޗުގައި ލަނޑު ޖެހުމަށް ފަހު ރެއާލްގެ ވިނީޝިއުސް އުފާ ފާޅު ކުރަނީ | ރޮއިޓާސް
ޔުއެފާ ޗެމްޕިއަންސް ލީގުގެ ޕްލޭ އޮފްގެ ދެ ވަނަ ލެގުގައި ވެސް ބެންފީކާގެ މައްޗަށް ކުރި ހޯދައި، ރެއާލް މެޑްރިޑް އިން މުބާރާތުގެ ގަދަ 16 ވަނަ ބުރުން ޖާގަ ހޯދައިފި އެވެ.
ރެއާލްގެ އަމިއްލަ ދަނޑުގައި ބުދަ ދުވަހުގެ ރޭ ކުޅުނު ދެ ވަނަ ލެގުގެ މެޗު އެ ޓީމުން ކާމިޔާބު ކުރީ 2-1 އިންނެވެ. އޭގެ ކުރިން ބެންފީކާގެ އަމިއްލަ ދަނޑުގައި ކުޅުނު ފުރަތަމަ ލެގު ރެއާލް އިން ކާމިޔާބު ކުރީ 1-0 އިންނެވެ.
ރެއާލްގެ ދަނޑުގައި ކުޅުނު މެޗުގައި ފުރަތަމަ ލަނޑު ޖަހައި ކުރި ހޯދީ ބެންފީކާ އިންނެވެ. އެގޮތުން މެޗު ފަށައިގެން 14 ވަނަ މިނެޓުގައި ބެންފީކާ އަށް ލީޑު ނަގައިދިނީ ރަފާ ސިލްވާ އެވެ. ނަމަވެސް، އޭގެ ފަހުން ރެއާލް އިން ވަނީ ދެ ލަނޑު ޖަހައިގެން މެޗުން މޮޅުވެފަ އެވެ.
ބެންފީކާ އިން ލީޑު ނެގިތާ ދެ މިނެޓުގެ ތެރޭގައި ރެއާލް އަށް ނަތީޖާ ހަމަހަމަ ކޮށްދިނީ އައުރެލިއަން ޗުއަމެނީ އެވެ. އެ ލަނޑު ޖަހަން ޗުއަމެނީ އަށް ފުރުސަތު ތަނަވަސްކޮށްދިނީ ފެޑެރިކޯ ވަލްވާޑޭ އެވެ. އޭގެ ފަހުން މެޗުގެ 80 ވަނަ މިނެޓުގައި ވިނީޝިއުސް ޖޫނިއާ ވަނީ ރެއާލްގެ ދެ ވަނަ ލަނޑު ޖަހައި އެ ޓީމު މޮޅު ކޮށްދީފަ އެވެ. އެ ލަނޑު ޖަހަން ވިނީޝުއުސް އަށް ވެސް ފުރުސަތު ތަނަވަސްކޮށްދިނީ ވަލްވާޑޭ އެވެ.
މެޗުން މޮޅުވެ، ރެއާލް އިން ގަދަ 16 ވަނަ ބުރުގެ ޖާގަ ހޯދީ އެގްރިގޭޓް ނަތީޖާ 3-1 އިންނެވެ.
