ސައުދީ އަރަބިއްޔާގެ އަލް-ޚަރްޖަށް ދިން މިސައިލް ހަމަލާއެއްގައި ދެ މީހަކު މަރުވެއްޖެ

ސައުދީ އަރަބިއްޔާގެ އަލް-ޚަރްޖު ސިޓީގެ މީހުން ދިރިއުޅޭ އިމާރާތަކަށް "މިސައިލެއް ނުވަތަ ގޮވާ އެއްޗެއް" ވެއްޓި ދެ މީހަކު މަރުވެއްޖެ ކަމަށް އެ ގައުމުގެ ކަމާބެހޭ އިދާރާތަކުން ރިޕޯޓްކޮށްފިއެވެ. މި ހާދިސާ ހިނގާފައިވަނީ އެމެރިކާގެ އަސްކަރީ މަރުކަޒުތައް ހުރި ގަލްފުގެ ގައުމުތަކަށް އަމާޒުކޮށް އީރާނުން ދެމުންދާ ރައްދު ހަމަލާތަކުގެ ދެވަނަ ހަފުތާގެ ތެރޭގައެވެ. އީރާނުގެ އިސްލާމިކް ރިވޮލިއުޝަނަރީ ގާޑް ކޯޕްސް (އައި.އާރް.ޖީ.ސީ) އިން މީގެ ކުރިން ބުނެފައިވަނީ، އެމެރިކާގެ އަސްކަރީ ބޭސްއެއް ކަމަށްވާ ޕްރިންސް ސުލްތާން އެއާބޭސް ހުންނަ އަލް-ޚަރްޖު ހިމެނޭހެން ބައެއް ސަރަހައްދުތަކުގެ ރާޑަރު ސިސްޓަމްތަކަށް ހަމަލާދީފައިވާނެ ކަމަށެވެ.

ސައުދީ ސިވިލް ޑިފެންސުން އާދީއްތަ ދުވަހު އެކްސްގައި ކުރި ޕޯސްޓެއްގައި، އީރާނުގެ ނަން ބޭނުންނުކޮށް ބުނެފައިވަނީ، އަލް-ޚަރްޖުގެ މީހުން ދިރިއުޅޭ ސަރަހައްދަކަށް "އަސްކަރީ އާލާތެއް" ވެއްޓުމުގެ ސަބަބުން ބޭރު ގައުމުތަކަށް ނިސްބަތްވާ ދެ މީހަކު މަރުވެފައިވާ ކަމަށެވެ. މަރުވި ދެ މީހުންނަކީ އިންޑިއާ މީހަކާއި ބަންގްލަދޭޝް މީހެކެވެ. މީގެ އިތުރުން މި ހާދިސާގައި 12 މީހަކަށް އެކިވަރުގެ އަނިޔާތައް ލިބިފައިވާ ކަމަށްވެސް އެ އިދާރާއިން ބުނެފައިވެއެވެ.

އީރާނުގެ އައި.އާރް.ޖީ.ސީ އިން މީގެ ކުރިން ހާމަކޮށްފައިވާ ގޮތުގައި، އެމެރިކާ ސިފައިން ބޭނުންކުރާ ޕްރިންސް ސުލްތާން އެއާބޭސް ހުންނަ އަލް-ޚަރްޖު ގަވަރުނަރޭޓްގެ ރާޑަރު ސިސްޓަމްތަކަށް ވަނީ އަމާޒުކޮށްފައެވެ. އީރާނާ ދެކޮޅަށް އެމެރިކާ އާއި އިޒްރޭލުން ކުރަމުންދާ ހަނގުރާމައިގެ ތެރޭގައި، ފާއިތުވި ހަފުތާގައި މި ސަރަހައްދަށް ތަކުރާރުކޮށް ހަމަލާތައް ވަނީ އަމާޒުވެފައެވެ.

ދޯހާގައި ހުރެ އަލްޖަޒީރާގެ ރިޕޯޓަރު ބުނި ގޮތުގައި، މި ހަމަލާ އަމާޒުވެފައިވަނީ މަރާމާތުކުރުމާއި ސާފުކުރުމުގެ މަސައްކަތްކުރާ ކުންފުންޏެއްގެ މުވައްޒަފުން ދިރިއުޅޭ ތަނަކަށެވެ.

އޭނާ އިތުރަށް ބުނި ގޮތުގައި، މި ހާލަތަކީ މުޅި ގަލްފު ސަރަހައްދުގައި ދިރިއުޅޭ މީހުންނަށް އޮތް ނުރައްކާތެރި އަދި ނުތަނަވަސް ހާލަތެކެވެ. ގަލްފުގެ ގައުމުތަކުގައި 200 އަށްވުރެ ގިނަ ގައުމުގެ މީހުން ދިރިއުޅެމުންދާއިރު، އޭގެ ތެރޭގައި ގިނަ އަދަދެއްގެ މަސައްކަތްތެރިން ހިމެނޭކަން އޭނާ ފާހަގަކުރިއެވެ.

އާދީއްތަ ދުވަހު ސައުދީ ޑިފެންސް މިނިސްޓްރީން ރިޕޯޓްކޮށްފައިވާ ގޮތުގައި، އެ ގައުމުން ވަނީ 15 ޑްރޯން ހަމަލާއެއް ހުއްޓުވާފައެވެ. މީގެ ތެރޭގައި ވެރިރަށް ރިޔާޟްގެ ޑިޕްލޮމެޓިކް ކުއާޓަރަށް ދޭން އުޅުނު ހަމަލާއެއްވެސް ހިމެނެއެވެ.

މީގެ އިތުރުން، ކުވެއިތުގެ ބައިނަލްއަގުވާމީ އެއާޕޯޓުގައި ހުރި ތެޔޮ ރައްކާކުރާ ތަންތަނަށް ހަމަލާއެއް އަމާޒުވެފައިވާ ކަމަށް އެ ގައުމުން ބުނެފައިވާއިރު، ބަހްރޭނުން ވަނީ އެ ގައުމުގެ ފެން މީރުކުރާ ޕްލާންޓަކަށް ގެއްލުން ލިބިފައިވާ ކަމަށް ރިޕޯޓްކޮށްފައެވެ.

އާދީއްތަ ދުވަހުގެ މި ހަމަލާތައް ދީފައިވަނީ، އިޒްރޭލުގެ ހަނގުރާމަމަތީ ބޯޓުތަކުން އީރާނުގެ ވެރިރަށް ތެހެރާން ކައިރީގައި ހުރި ތެޔޮ އުފައްދާ ފަސް މަރުކަޒަކަށް ހަމަލާދީ، ބަޔަކު މަރުވެ، މުޅި ސިޓީ ދުމުން ފޮރުވިފައި ވަނިކޮށެވެ. އީރާނުގެ ދައުލަތުގެ ތެޔޮ ކުންފުނީގެ އިސް އޮފިޝަލަކު ވަނީ މި ހަމަލާތަކުގައި ބަޔަކު މަރުވިކަން ކަށަވަރުކޮށްދީފައެވެ. އައި.އާރް.ޖީ.ސީގެ ތަރުޖަމާނަކު ބުނި ގޮތުގައި، އީރާނުގެ ހަކަތައާ ބެހޭ އިންފްރާސްޓްރަކްޗަރަށް އެމެރިކާ އާއި އިޒްރޭލުން ދޭ ހަމަލާތައް ނުހުއްޓުވައިފިނަމަ، އީރާނުން ވަރުގަދަ ރައްދު ހަމަލާތަކެއް ދޭނެއެވެ.

އެ ތަރުޖަމާނު އިތުރަށް ބުނީ، ސާފުނުކުރާ ތެޔޮ ފީފާއެއްގެ އަގު 200 ޑޮލަރަށްވުރެ މައްޗަށް ދިއުމުން ކެތްކުރެވޭނެ ނަމަ، މި "ކުޅިވަރު" ކުރިއަށް ގެންދިއުމަށެވެ.

ހަނގުރާމައަށް ނުވަ ދުވަސް ވެފައިވާއިރު، އައި.އާރް.ޖީ.ސީ އިން ބުނެފައިވަނީ މެދުއިރުމަތީގެ އެކި ސަރަހައްދުތަކަށް ޑްރޯން އަދި މިސައިލް ހަމަލާތައް ދިނުމަށް ބޭނުންވާ ސާމާނު ކުރިއަށް އޮތް ހަ މަސް ދުވަހަށް ވާވަރަށް އެބަހުރި ކަމަށެވެ.

އަރަބި ލީގުގެ ސެކްރެޓަރީ ޖެނެރަލް އަހުމަދު އަބޫލް ޣައިތު ވިދާޅުވީ، އަރަބި ލީގުގެ މެންބަރު ގައުމުތަކަށް އީރާނުން ދެމުންދާ ހަމަލާތަކަކީ "ޒިންމާދާރުކަން ކުޑަ" އަމަލުތަކެއް ކަމަށެވެ. އަދި މިއީ ހެދޭ "ސްޓްރެޓީޖިކް ބޮޑު ގޯހެއް" ކަމަށް ސިފަކުރައްވައި، އެ ނިންމުން ބަދަލުކުރުމަށް އޭނާ ވަނީ ތެހެރާނަށް ގޮވާލައްވާފައެވެ.

އީރާނުގެ ހެލްތު މިނިސްޓްރީން އާދީއްތަ ދުވަހު ހާމަކުރި ގޮތުގައި، ފެބްރުއަރީ 28 ވަނަ ދުވަހު އެމެރިކާ އާއި އިޒްރޭލުން އީރާނާ ދެކޮޅަށް ހަނގުރާމަ ފެށި ފަހުން، މިހާތަނަށް މަދުވެގެން 1,200 އާންމުން މަރުވެ، 10,000 އެއްހާ މީހުން ވަނީ ޒަޚަމްވެފައެވެ.