އީރާނުގެ ތެލުގެ މަރުކަޒުތަކަށް އިޒްރޭލާއި އެމެރިކާ އިން ދިން ހަމަލާގައި 4 މީހުން މަރު

އެމެރިކާއާއި އިޒްރޭލުން ރޭ ތެހެރާނާއި އެ ސިޓީގެ ކައިރީގައި ހުރި ތެލުގެ ފަސް މަރުކަޒަކަށް ދިން ހަމަލާތަކެއްގައި ހަތަރު މީހަކު މަރުވެފައިވާ ކަމަށް އެ ގައުމުގެ ދައުލަތުގެ މީޑިއާއަށް މައުލޫމާތު ދިން އޮފިޝަލަކު އާދީއްތަ ދުވަހު ވިދާޅުވެއްޖެއެވެ.

ނޭޝަނަލް އިރާނިއަން އޮއިލް ޕްރޮޑަކްޓްސް ޑިސްޓްރިބިއުޝަން ކޮމްޕެނީގެ ސީއީއޯ ކަރާމަތު ވޭސްކަރާމީ ދައުލަތުގެ ޓީވީއަށް މައުލޫމާތު ދެއްވަމުން ވިދާޅުވީ، ރޭގެ ވަގުތެއްގައި ދުޝްމަނުންގެ ބޯޓުތަކުން ތެހެރާނާއި އަލްބޯރްޒްގައި ހުރި ތެލުގެ ހަތަރު ގުދަނަކަށާއި، ޕެޓްރޯލިއަމް އުފެއްދުންތައް އުފުލާ މަރުކަޒަކަށް ހަމަލާދީފައިވާ ކަމަށެވެ.

ވޭސްކަރާމީ އިތުރަށް ވިދާޅުވީ، މި ހާދިސާގައި އެ ކުންފުނީގެ ހަތަރު މުވައްޒަފަކު މަރުވެފައިވާ ކަމަށާއި، އޭގެ ތެރޭގައި ތެޔޮ އުފުލާ ލޮރީ ދުއްވާ ދެ ޑްރައިވަރުން ހިމެނޭ ކަމަށެވެ. އަދި މި ހަމަލާތަކުގައި އެ ތަންތަނަށް ގެއްލުން ލިބުނު ނަމަވެސް، ރޯވި އަލިފާންގަނޑު މިހާރު ކޮންޓްރޯލް ކުރެވިފައިވާ ކަމަށް އޭނާ ވިދާޅުވިއެވެ.

އީރާނުގެ ވެރިރަށުގައި ތެޔޮ ފޯރުކޮށްދިނުމުގެ ހިދުމަތް "ވަގުތީ ގޮތުން މެދުކެނޑިފައިވާ" ކަމަށް އާދީއްތަ ދުވަހު އޮފިޝަލަކު ވަނީ ވިދާޅުވެފައެވެ.

އީރާނުގެ ރަސްމީ ނިއުސް އެޖެންސީ "އިރްނާ" އިން ރިޕޯޓްކޮށްފައިވާ ގޮތުގައި، ތެހެރާނުގެ ގަވަރުނަރު މުހައްމަދު ސާދިގް މުތަމަދިއާން ވިދާޅުވީ ތެޔޮ ފޯރުކޮށްދޭ ނެޓްވޯކަށް ލިބުނު ގެއްލުންތަކާ ގުޅިގެން، ތެޔޮ ބެހުމުގެ މަސައްކަތް ވަގުތީ ގޮތުން މެދުކެނޑިފައިވާ ކަމަށެވެ.

އަދި މިހާރު އެ މައްސަލަ ހައްލުކުރުމުގެ މަސައްކަތް ކުރަމުންދާ ކަމަށްވެސް އޭނާ ވިދާޅުވިއެވެ.

އޭއެފްޕީގެ ނޫސްވެރިން ރިޕޯޓްކޮށްފައިވާ ގޮތުގައި، ރޭ ހިނގި އަލިފާނުގެ ހާދިސާތަކުން އުފެދުނު ދުންތައް މުޅި ސިޓީގެ މައްޗަށް ފެތުރިފައިވާއިރު، ހެނދުނު އިރު އެރި އިރުވެސް މުޅި ސިޓީ އޮތީ އަނދިރި ދުންގަނޑެއްގެ ތެރޭގައެވެ.

އެ ސަރަހައްދުގައި ދިރިއުޅޭ މީހުން ބުނި ގޮތުގައި ވައިގެ ތެރޭގައި އެއްޗެހި އަނދާ ވަސް ހިފާފައި ހުރިއިރު، އިރު އެރި ވަގުތު ވާރޭ ވެހެމުން ދިޔަ ނަމަވެސް މުޅި ސިޓީ އޮތީ ވަރަށް ބޮޑަށް އަނދިރިވެފައެވެ.

އީރާނުގެ ރެޑް ކްރެސެންޓުން ބުނި ގޮތުގައި، ތެޔޮ ގުދަންތައް ގޮވުމުގެ ސަބަބުން ނުރައްކާތެރި "ހައިޑްރޯކާބަން ކޮމްޕައުންޑްތަކާއި، ސަލްފާ އަދި ނައިޓްރޯޖަން އޮކްސައިޑް" ގިނަ އަދަދަކަށް ވައިގެ ތެރެއަށް ވަނީ ފެތުރިފައެވެ.

އެ އިދާރާއިން ނެރުނު ބަޔާނެއްގައި އިންޒާރު ދީފައިވާ ގޮތުގައި، މި ހާލަތުގައި ވާރޭ ވެހިއްޖެނަމަ އެ ވާރޭގައި އެސިޑްގެ މިންވަރު މަތިވާނެތީ އެއީ އިންތިހާއަށް ނުރައްކާތެރި އެއްޗެކެވެ. އަދި މީގެ ސަބަބުން ހަންގަނޑު ފިހުމާއި ފުއްޕާމެޔަށް ބޮޑެތި ގެއްލުންތަކެއް ލިބިދާނެ ކަމަށްވެސް ބުނެފައިވެއެވެ.

އީރާނުގެ ތިމާވެއްޓާ ބެހޭ އިދާރާތަކުން ވަނީ ނޭވާލާ ނިޒާމުގެ މައްސަލަތަކާއި ސިއްހީ އެހެނިހެން ނުރައްކާތަކުން ސަލާމަތްވުމަށްޓަކައި، އާންމު ރައްޔިތުން ގޭގައި މަޑުކުރުމަށް އިލްތިމާސްކޮށްފައެވެ.

ވޭސްކަރާމީ ވިދާޅުވީ އީރާނުގެ ތެޔޮ ގުދަންތަކުގައި ބޭނުންވާ ވަރަށް "ޕެޓްރޯލް ރިޒާވް" އެބަހުރި ކަމަށެވެ.

ފެބްރުއަރީ މަހުގެ 28 ވަނަ ދުވަހު އެމެރިކާއާއި އިޒްރޭލުން އީރާނަށް ދިން ހަމަލާތަކެއްގައި އެ ގައުމުގެ އެންމެ މަތީ ލީޑަރު އަލީ ޚާމަނާއީ ވަނީ އަވަހާރަކޮށްލާފައެވެ. މި ހާދިސާއާ ގުޅިގެން މުޅި މެދުއިރުމައްޗަށް ވަނީ ހަނގުރާމަ ފެތުރިފައެވެ.

މީގެ ރައްދުގައި އީރާނުން ދަނީ އެ ސަރަހައްދުގައި ހުރި އިޒްރޭލާއި އެމެރިކާގެ މަސްލަހަތު އޮތް ތަންތަނަށް ޑްރޯން އަދި މިސައިލް ހަމަލާތައް ދެމުންނެވެ.