އީރާނުން އިޒްރޭލާއި އެމެރިކާއަށް ދޭ ހަމަލާތައް ވަރުގަދަކުރާނެ ކަމުގެ އިންޒާރު ދީފި

އިސްލާމިކް ރިވޮލިއުޝަނަރީ ގާޑް ކޯޕްސް (އައިއާރުޖީސީ) އިން "ޓްރޫ ޕްރޮމިސް 4" އަސްކަރީ އޮޕަރޭޝަނުގެ 28 ވަނަ ބުރު ކުރިއަށް ގެންގޮސްފިއެވެ. އަދި ކުރިއަށް އޮތް ދުވަސްތަކުގައި ދުޝްމަނުންގެ އަމާޒުތަކަށް ދޭ ބަދަލުހިފުމުގެ ހަމަލާތަކުގެ ދާއިރާ ފުޅާކޮށް، ހަމަލާތައް ވަރުގަދަކުރާނެ ކަމުގެ އިންޒާރު އެ ޖަމާއަތުން ވަނީ ދީފައެވެ.

އައިއާރުޖީސީން އާދިއްތަ ދުވަހު ނެރުނު ބަޔާނެއްގައި ބުނެފައިވަނީ، ބަދަލުހިފުމުގެ މި އޮޕަރޭޝަނުގެ އެންމެ ފަހުގެ ބުރުގައި އެ ޖަމާއަތުގެ އެއިރޯސްޕޭސް ފޯސްއިން އާ ޖީލުގެ މިސައިލްތައް ބޭނުންކޮށްފައިވާ ކަމަށެވެ. މި ހަމަލާތައް އަމާޒުކޮށްފައިވަނީ އިޒްރޭލުން ހިފާފައިވާ ސަރަހައްދުތަކުގެ ތެރޭގައި ހިމެނޭ ބީރްޝެބާ އާއި ތަލް އެވީވްގެ އިތުރުން އަޒްރަގް އެއާ ބޭސްއަށް ކަމަށް އެ ބަޔާނުގައިވެއެވެ.

އައިއާރުޖީސީގެ ބަޔާނުގައި ވާގޮތުން، އެމެރިކާ އާއި އިޒްރޭލުގެ އަމާޒުތަކަށް ހަމަލާދީފައިވަނީ އީރާނުގެ މިސައިލާއި ޑްރޯން ބޭނުންކޮށްގެންނެވެ.

މީގެ އިތުރުން، އެމެރިކާގެ ހަނގުރާމަމަތީ ބޯޓުތަކުން ހަމަލާ ދިނުމަށް ބޭނުންކުރާ އެންމެ ބޮޑު އަދި އެންމެ ހަރަކާތްތެރި މަރުކަޒުގެ ގޮތުގައި ސިފަކޮށްފައިވާ އަޒްރަގް އެއާ ބޭސްއަށް އެތައް ފަހަރަކު ހަމަލާދީފައިވާ ކަމަށް އެ ބަޔާނުގައި ފާހަގަކޮށްފައިވެއެވެ.

އަދި ތަލް އަވީވް އާއި ބީރްޝެބާގައި ހުރި އަސްކަރީ އަމާޒުތަކަށް ހަމަލާދީފައިވަނީ ނުހަނު ބަރު "ވޯހެޑް" ނުވަތަ ގޮވާތަކެތި ހަރުކޮށްފައިވާ "ޚައިބަރު" މަރުކާގެ މިސައިލް ބޭނުންކޮށްގެން ކަމަށްވެސް ބުނެފައިވެއެވެ.

އެމެރިކާ އާއި އިޒްރޭލުން ދެމުންދާ އުދުވާނީ ހަމަލާތަކަށް ރައްދު ދިނުމުގެ ގޮތުން، އީރާނުގެ ހަތިޔާރު އެޅި ބާރުތަކުން ދޭ ހަމަލާތަކުގެ މިންވަރާއި ބާރުގަދަކަން އިތުރުކުރާނެ ކަމުގެ އިންޒާރު އައިއާރުޖީސީން ވަނީ ދީފައެވެ.

ބަދަލުހިފުމުގެ މި އޮޕަރޭޝަންތަކާ ގުޅޭ އިތުރު މައުލޫމާތު އީރާނުގެ ރައްޔިތުންނަށް ހާމަކުރަމުންދާނެ ކަމަށްވެސް އެ ޖަމާއަތުން ބުނެފައިވެއެވެ. މީގެ އިތުރުން، މިރޭ ފެށިގެން އައިއާރުޖީސީގެ ހަމަލާތައް ވަރަށް ބޮޑަށް ވަރުގަދަކުރުމަށް ރާވާފައިވާ ކަމަށް މައުލޫމާތު އެނގޭ މަސްދަރަކުން އީރާނުގެ މީޑިއާތަކަށް ވަނީ ކިޔައިދީފައެވެ.

އެ މަސްދަރުން ބުނި ގޮތުގައި، އައިއާރުޖީސީން ޑްރޯން ބޭނުންކޮށްގެން ހިންގާ އޮޕަރޭޝަންތައް 20 އިންސައްތަ އިތުރުކޮށް، ނުހަނު ބަރު އަދި ސްޓްރެޓީޖިކް މިސައިލް ބޭނުންކުރާ މިންވަރު ދެގުނަ ކުރާނެއެވެ.

މި ފިޔަވަޅަކީ އީރާނުގެ މަސްލަހަތުތަކަށާއި ރައްޔިތުންނަށް އަމާޒުކޮށްދޭ ކޮންމެ ހަމަލާއަކަށް ވަރުގަދަ ރައްދެއް ދިނުމަށާއި، ދުޝްމަނުން ހުއްޓުވުމުގެ ބާރު ވަރުގަދަކުރުމުގެ މަގްސަދުގައި އަޅާ ފިޔަވަޅެއް ކަމަށް އެ މަސްދަރުން ބުނެފައިވެއެވެ.

އެމެރިކާ އާއި އިޒްރޭލުން އީރާނަށް އަމާޒުކޮށް ވައިގެ މަގުން އާ އުދުވާނީ ހަމަލާތަކެއް ދޭން ފަށާފައިވަނީ ފެބްރުއަރީ މަހުގެ 28 ވަނަ ދުވަހުއެވެ. މިއީ އެއްވެސް ކުރިމަތިލުމަކާ ނުލައި އެ ގައުމުތަކުން އީރާނަށް ދިން ހަމަލާތަކަށް އަށް މަސް ދުވަސް ފަހުން ދޭން ފެށި ހަމަލާތަކެކެވެ.

މި ހަމަލާތަކުގެ ސަބަބުން އިސްލާމީ އިންގިލާބުގެ ލީޑަރު އާޔަތުﷲ ސައްޔިދު އަލީ ޚާމަނާއީ އާއި، އަސްކަރީ ކޮމާންޑަރުންގެ އިތުރުން، އަންހެނުންނާއި ކުޑަކުދިން ހިމެނޭހެން 1،200 އަށްވުރެ ގިނަ މީހުން ވަނީ ޝަހީދުވެފައެވެ.

މި ހަމަލާތަކުގެ ބަދަލުހިފުމުގެ ގޮތުން އީރާނުން ވަނީ ވަގުތުން ފިޔަވަޅު އަޅަން ފަށައި، އިޒްރޭލުން ހިފާފައިވާ ސަރަހައްދުތަކަށާއި ސަރަހައްދީ ގައުމުތަކުގައި ހުރި އެމެރިކާގެ އަސްކަރީ މަރުކަޒުތަކަށް ގިނަ އަދަދެއްގެ މިސައިލާއި ޑްރޯން ހަމަލާތައް ދޭން ފަށާފައެވެ.