އީރާނުގެ ހަމަލާއިން ޒަހަމްވި އެމެރިކާ ސިފައިންގެ މީހަކު މަރުވެއްޖެ, މިއީ މަރުވި 7 ވަނަ މީހާ
އިޒްރޭލާއި އެމެރިކާ ގުޅިގެން އީރާނަށް ހަމަލާ ދޭން ފެށި ފަހުން، މިހާތަނަށް އެމެރިކާގެ ހަތް ސިފައިން ވަނީ މަރުވެފައި. "އޮޕަރޭޝަން އެޕިކް ފިއުރީ" ގެ ނަމުގައި ކުރިއަށްގެންދާ އަސްކަރީ ހަރަކާތްތަކުގައި އެންމެ ފަހުން މަރުވި ސިފައިންގެ މީހާއަކީ މާޗް މަހުގެ އެއްވަނަ ދުވަހު އީރާނުން ދިން ހަމަލާއެއްގައި ޒަޚަމްވި މީހެއް.
ސައުދީ އަރަބިއްޔާގައި ހުންނަ ހަޔަޓް ރީޖެންސީ ހޮޓަލަށް ހަމަލާ އެއް އަމާޒުވެފައި. | އެކްސް
އީރާނުން ސައުދީ އަރަބިއްޔާގައި ހުންނަ އެމެރިކާގެ އަސްކަރީ މަރުކަޒަކަށް ދިން ހަމަލާއެއްގައި ޒަޚަމްވި އެމެރިކާގެ އިތުރު ސިފައިންގެ މީހަކު މަރުވެއްޖެ ކަމަށް އެމެރިކާގެ ސެންޓްރަލް ކޮމާންޑުން ހާމަކޮށްފިއެވެ.
މިއީ އެމެރިކާއާއި އިޒްރޭލުން ގުޅިގެން ފެބްރުއަރީ މަހުގެ 28 ވަނަ ދުވަހު އީރާނަށް ހަމަލާދޭން ފެށި ފަހުން، މި ހަނގުރާމައިގައި މަރުވި އެމެރިކާ ސިފައިންގެ ހަތްވަނަ މީހާއެވެ.
އީރާނުގެ ސަރުކާރުން މެދުއިރުމަތީގެ އެކި ސަރަހައްދުތަކަށް އަމާޒުކޮށް ދޭން ފެށި ފުރަތަމަ ހަމަލާތަކުގެ ތެރެއިން، މާޗް މަހުގެ 1 ވަނަ ދުވަހު ސައުދީ އަރަބިއްޔާގައި ތިބި އެމެރިކާ ސިފައިންނަށް ދިން ހަމަލާގައި ސީރިއަސް އަނިޔާތަކެއް ލިބުނު މި ސިފައިންގެ މީހާ މަރުވީ ރޭގެ ވަގުތެއްގައެވެ.
"އޮޕަރޭޝަން އެޕިކް ފިއުރީ" ގެ ނަމުގައި ކުރިއަށްގެންދާ ހަނގުރާމައިގައި މިހާތަނަށް ހަތް ސިފައިން މަރުވެފައިވާއިރު، މައިގަނޑު ހަނގުރާމަވެރި އޮޕަރޭޝަންތައް އަދިވެސް ދަނީ ކުރިއަށެވެ. މަރުވި ސިފައިންގެ މީހާގެ އާއިލާއަށް އެކަން އެންގުމަށްފަހު، 24 ގަޑިއިރު ނުވަނީސް އެ މީހާގެ ވަނަވަރު ހާމަނުކުރުމަށް އެމެރިކާގެ އަސްކަރިއްޔާއިން ވަނީ ނިންމާފައެވެ.
