އޮމާން: އެމެރިކާ އާއި އިޒްރޭލުގެ އަމަލުތަކަކީ ދަށު ދަރަޖައިގެ ޣައިރު ގާނޫނީ އަމަލުތަކެއް

އެމެރިކާ އާއި އިޒްރޭލުގެ އަމަލުތަކަކީ އަޚުލާގީ ގޮތުން ދަށު ދަރަޖައިގެ، ޣައިރު ގާނޫނީ އަމަލުތަކެއް ކަމަށް އޮމާންގެ ފޮރިން މިނިސްޓަރު ވިދާޅުވެއްޖެ އެވެ.

ވޭތުވެދިޔަ ހަފުތާގެ ތެރޭގައި އެމެރިކާ، އިޒްރޭލު އަދި އީރާނުން ހިންގި އަސްކަރީ ހަރަކާތްތައް އޮމާންގެ އެންމެ އިސް ޑިޕްލޮމެޓް ވަނީ ކުށްވެރިކުރައްވާފަ އެވެ.

އެކްސްގައި ކުރެއްވި ޕޯސްޓެއްގައި އޮމާންގެ ފޮރިން މިނިސްޓަރު ބަދުރު ބިން ހަމަދު އަލްބުސައިދީ ވިދާޅުވީ، އަރަބި ލީގުގެ ގައުމުތަކުގެ ފޮރިން މިނިސްޓަރުންނާއެކު މިއަދު ބޭއްވި ބައްދަލުވުމުގައި ބައިވެރިވެވަޑައިގަތުމަކީ ލިބިވަޑައިގެންނެވި އުފަލެއް ކަމަށެވެ.

މިނިސްޓަރު ބަދުރު ވިދާޅުވީ، އީރާނާ ދެކޮޅަށް އިޒްރޭލާއި އެމެރިކާއިން ހިންގި އަސްކަރީ އަމަލުތަކަކީ އަޚުލާގީ ގޮތުން ބަލައިގަނެވޭނެ ކަންކަމެއް ނޫން ކަމަށާއި، އެއީ ބައިނަލްއަގުވާމީ ގާނޫނުތަކާވެސް ޚިލާފު އަމަލުތަކެއް ކަމަށެވެ.

މީގެ އިތުރުން، އީރާނުން އެ ގައުމުގެ އަވަށްޓެރި ގައުމުތަކަށް ދިން ބަދަލުހިފުމުގެ ހަމަލާތަކަކީވެސް ނުހަނު ހިތާމަހުރި، ބަލައިގަނެވޭނެ ކަންކަމެއް ނޫން ކަމަށް އޭނާ ވިދާޅުވިއެވެ. އަދި ހުރިހާ ފަރާތްތަކަކުންވެސް ކެތްތެރިކަން އިސްކުރުމަށާއި، ހަމަލާތައް ހުއްޓާލައި، ޑިޕްލޮމެޓިކް މަޝްވަރާތަކަށް އަވަސް ފުރުސަތެއްގައި ރުޖޫއަވުމަށް މިނިސްޓަރު ވަނީ ގޮވާލައްވާފައެވެ.