މެދުއިރުމަތީގައި ދިރިއުޅޭ ދިވެހި ރައްޔިތުންގެ ހާލަތު އެއްވެސް ވަރަކަށް މިސަރުކާރުން ނުބަލާ: ސައުދުﷲ

ހަނގުރާމާއާ ގުޅިގެން މެދުއިރުމަތީގައި ދިރިއުޅޭ ދިވެހި ރައްޔިތުންގެ ހާލަތު އެއްވެސް ވަރަކަށް ރައީސް ޑރ.މުހައްމަދު މުއިއްޒުގެ ސަރުކާރުން ނުބަލާ ކަމަށް ޓްރޭޑް އެސޯޝިއޭޝަންގައި އިސްކޮށް ހަރަކާތްތެރިވާ ސައުދުﷲ އަހުމަދު ވިދާޅުވެއްޖެ އެވެ.

ރާއްޖެޓީވީގެ ފަލަސުރުހީ ޕްރޮގްރާމްގައި ސައުދުﷲ ވިދާޅުވީ، މެދުއިރުމަތީގެ ހަނގުރާމައާ ގުޅިގެން ދުނިޔޭގައި އިންތިހާއަށް ކަންބޮޑުވުން އެބައޮތް ކަމަށާއި، ނަމަވެސް މިސަރުކާރަށް އަދި ކަމެއްވާހެން ހީނުވާ ކަމަށެވެ. ހަނގުރާމަ ދިގުދެމިގެން ހިނގައްޖެނަމަ ގައުމަށް ވާނެ ގޮތް ބަލައި، އިތުރު ގޮތްތައް ހޯދަން ޖެހޭ ކަމަށާއި، ރައްޔިތުންނަށް ބަނޑަށް ނުޖެހި ތިބެވޭނެ ޕްލޭނެއް އޮންނަން ޖެހޭ ކަމަށް އޭނާ ވިދާޅުވި އެވެ. 

ސައުދުﷲ ވިދާޅުވީ، ރައްޔިތުންގެ ޓެކްސް ފައިސާއިން މުސާރަ ނަގައިގެން ތިއްބަވާ ސަރުކާރުގެ ބޭފުޅުން އެބަ ތިއްބެވި ކަމަށާއި، ގައުމުގައި ފޮރިން މިނިސްޓަރާއި، އިކޮނޮމިކް މިނިސްޓަރެއް ހުންނެވި ކަމަށެވެ. ނަމަވެސް މި ބޭފުޅުން ޒިންމާ ނަގާ މަންޒަރު ނުފެންނަ ކަމަށް އޭނާ ވިދާޅުވި އެވެ. އަދި ވިދާޅުވީ މެދުއިރުމަތީގައި ދިރިއުޅޭ ދިވެހި ރައްޔިތުންގެ އެތައް އާއިލާގެ ހާލަތާއި، އެމީހުން ދިރިއުޅެމުންދާ ގޮތް އެއްވެސް ވަރަކަށް ނުބަލާ ކަމަށެވެ. 

ހަނގުރާމައާ ގުޅިގެން އަންނަ ހުރިހާ ކަމެއް ސާފުކޮށް ރައްޔިތުންނަށް ހާމަކުރަން ޖެހޭކަން ފާހަގަކުރައްވައި ސައުދުﷲ ވިދާޅުވީ، މިފަދަ އެއްވެސް މަސައްކަތެއް މިސަރުކާރުން ކުރާ މަންޒަރު ނުފެންނަ ކަމަށެވެ. 

ރާއްޖޭގައި އޮތީ ނާޒުކު އިގްތިސާދެއްކަން ފާހަގަކުރައްވައި ސައުދުﷲ ވިދާޅުވީ، މިކަމުގެ އަސަރު ރާއްޖެއަށް ވަރަށް ބޮޑަށް ކުރަމުންދާ ކަމަށާއި، ރައްޔިތުންނަށް ފުރިހަމަ މައުލޫމާތު ސަރުކާރުން ފޯރުކޮށްދޭން ޖެހޭ ކަމަށެވެ. އަދި ވިޔަފާރިވެރިންނަށް ދިމާވާ ދަތިތަކާއި، ހުރި ކަންބޮޑުވުންތައް ބަލައި، ފިޔަވަަޅު އަޅަން ޖެހޭ ކަމަށް އޭނާ ވިދާޅުވި އެވެ. 

އަޅުގަނޑުމެންނާ އަޅާބަލާއިރު، ގަތަރަކީ ވަރަށް ބޮޑު އިގްތިސާދެއް އޮތް ގައުމެއް. ދުބާއީ އަކީ މުޅި ޔޫރަޕާއި އޭޝިޔާ ގުޅުވައިދޭ މެދުގައި އޮންނަ މައި ހަބު އެނގޭތޯ އަދި ޗައިނާއާ. މިހުރިހާ ދިމާލެއްގެ މުދާ އެތަނުން ޑިސްޓިބިއުޓް ކުރާ އެއް ހަބަކީ ދުބާއީ. އެހެންވީމަ ދުބާއީ ވެސް އެއޮތީ މިޑިލްއީސްޓް ގައުމެއް. މި ހަނގުރާމައިގެ ތެރޭގައި ހިމެނިފައި. އެހެންވެއްޖެއްޔާ އަޅުގަނޑުމެން ކަހަލަ ވަރަށް ނާޒުކު އިގްތިސާދެއް އޮންނަ ގައުމަކަށް މީގެ އަސަރު ކުރާނެ ވަރަށް އަންދާޒާ ކުރަން ވެސް ދަތި އިނގޭތޯ. އަޅުަނޑަށް ނުފެނޭ ރާއްޖޭގެ ސަރުކާރުން މިއަށް އެއްވެސް ވަރަކަށް ރައްޔިތުންނަށް ހަނގުރާމައެއް ފެށިގެން އުޅޭ ކަމެއް ވެސް އެނގޭ މީހަކު ވެސް ހުރި ހެންނެއް. ރައްޔިތުންނަށް މީތި ޖަސްޓިފައި ކޮށްދޭން ދުނިޔޭއިން މިއަންނަ ލޮޅުންތައް ކިޔައިދީ ވިޔަފާރިވެރިންނަށް މީގައި ހުރި ކަންބޮޑުވުންތައް ހިއްސާކޮށް ވިޔަފާރިވެރިންނަށް މީގެ ތެރެއިން އަޅުގަނޑުމެންނަށް އަޅުގަނޑުމެންގެ ފައި މައްޗަށް ނުވަތަ އަޅުގަނޑުމެން ބަނޑަށް ނުޖެހި ތިބެވޭނެ މަގެއް ހޯދުމަށްޓަކައި މަސައްކަތް ކުރާތަނެއް އަޅުގަނޑުމެންނަށް ނުފެނޭ.

ޓްރޭޑް އެސޯޝިއޭޝަންގައި އިސްކޮށް ހަރަކާތްތެރިވާ ސައުދުﷲ އަހުމަދު

ރާއްޖޭގައި ވިއްކާ ފެޓްރޯލްއާއި ޑީސަލް އަގު ބޮޑު ކޮށްފައިވާތީ އެކަމަށް އިޝާރާތް ކުރައްވައި ސައުދުﷲ ވިދާޅުވީ، މިކަމުގެ ހަގީގަތްތައް ވެސް އޮޅުވާލުމަށް ރައީސް މުއިއްޒު މަސައްކަތް ކުރެއްވި ކަމަށެވެ. 

ހަނގުރާމަ ފެށުނުތަނާ ރައީސް މުއިއްޒު ވިދާޅުވީ އޮމާނުން ކަމަށް ތެޔޮ ގެންނަނީ. އެހެންވީމަ އެއްވެސް މައްސަލައެއް ނޫނޭ. އޮމާނުން މިހާރު ވެސް 2 ނުވަތަ 3 ޓޭންކަރު ދަތުރު ކުރަމުން މިދަނީ. އޮމާނަކީ ވެސް ހަނގުރާމައިގެ މެދުތެރޭގައި އޮތް ގައުމެއް. އެހެންވީމަ އަޅުގަނޑުމެންނަށް ގަބޫލުކުރެވޭ ގޮތުގައި ރައީސް މުއިއްޒު މި ހަނގުރާމައިގެ ސީރިއަސްކަން ރާއްޖޭގެ ރައްޔިތުންނަށް މިދިމާވާ ދަތިތަކާމެދު ސީރިއަސް ކޮށް އެއްވެސް ވަރަކަށް ވިސްނާތަނެއް އަޅުގަނޑުމެންނަށް ނުފެނޭ. މިއީ އަގު ބޮޑޫކޮށް ގަނެފައި ހުރި ސްޓޮކެއް ވެސް ނޫން ތެލުގެ ބާޒާރުގައި. އަގުހެޔޮ ކޮށް ގަނެފައި ހުރި ސްޓޮކް އޭގެ 20 ޕަސެންޓަށް ވުރެ ބޮޑު ތަނެއް އޮތީ ބޮޑު ކޮށްލާފައި. ދެން ބަލާ އަޅުގަނޑުމެންގެ އިގްތިސާދަށް ވަމުންދާނެ ގޮތް.

ޓްރޭޑް އެސޯޝިއޭޝަންގައި އިސްކޮށް ހަރަކާތްތެރިވާ ސައުދުﷲ އަހުމަދު

ސައުދުﷲ ވިދާޅުވީ، މިހާރުގެ ހާލަތަށް ތައްޔާރުވުމުގެ އެއްވެސް މަސައްކަތެއް މިސަރުކާރުން ނުކުރާތީ ވަރަށް ކަންބޮޑުވާ ކަމަށެވެ. އަދި މިކަމުން ރައްޔިތުންގެ ދިރިއުޅުމަށް އަންނަ ބަދަލުތަކާއި، ދަތިތަކާމެދު މިސަރުކާރުން ނުވިސްނާކަން ވެސް ހާމަވާ ކަމަށް އޭނާ ވިދާޅުވި އެވެ.