ހަނގުރާމަ ނިމެން ކައިރި ވެއްޖެ، އަމާޒު ހިފާފައިވާ މުއްދަތަށް ވުރެ އަވަހަށް ކަންކަން ހާސިލުވޭ: ޓްރަމްޕް

އެމެރިކާ އާއި އިޒްރޭލް އިން އީރާނާ ދެކޮޅަށް ކުރިއަށް ގެންދަމުން އަންނަ ހަނގުރާމަ އެއްކޮށް ނިމުމާ ވަރަށް ކައިރިވެފައިވާ ކަމަށާއި، އެމެރިކާ އިން އަމާޒު ހިފާފައިވާ މުއްދަތަށް ވުރެ މާ ކުރިން ކަންކަން ހާސިލުވަމުންދާ ކަމަށް އެ ޤައުމުގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ.

ސީބީއެސް ނިއުސްގެ ވައިޓް ހައުސް ކޮރެސްޕޮންޑެންޓް ވޭޖިއާ ޖިއާން އަށް ދެއްވި އިންޓަވިޔުއެއްގައި ޓްރަމްޕް ވިދާޅުވީ، އީރާންގެ އަސްކަރީ ޤާބިލުކަން މިހާރު ވަރަށް ބޮޑަށް ދަށްވެފައިވާ ކަމަށެވެ. އަދި އީރާން އޮތީ ވަރަށް ބޮޑަށް ބަލިކަށި ވެފައި ކަމަށް ވެސް ޓްރަމްޕް ވިދާޅުވި އެވެ. 

އެ އިންޓަވިޔުގައި ވާހަކަ ދައްކަވަމުން ޓްރަމްޕް ވިދާޅުވީ، އީރާނާ ދެކޮޅަށް ކުރަމުން އަންނަ ހަނގުރާމަ މިހާރު އޮތީ ވަރަށް ބޮޑަށް ފުރިހަމަ ވެފައި ކަމަށެވެ. މިހާރު އީރާންގެ ކަނޑުގެ ސިފައިންގެ ބާރުވެރި ކަމެއް ނެތް ކަމަށާއި، މުއާސަލަތީ ނިޒާމުތައް ހަލާކުވެފައިވާއިރު، އެ ޤައުމުގެ ވައިގެ ސިފައިންގެ ބާރު ވެސް ކެނޑިފައިވާ ކަމަށް ޓްރަމްޕް ވިދާޅުވި އެވެ. 

މީގެ އިތުރުން ހަނގުރާމަ އަށް އަންދާޒާ ކުރި ހަތަރު ހަފުތާ ނުވަތަ، ފަސް ހަފުތާގެ މުއްދަތަށް ވުރެ މާ ކުރިން އެމެރިކާ އިން ކުރިއެރުން ހޯދާފައިވާ ކަމަށް ވެސް ޓްރަމްޕް ވިދާޅުވި އެވެ. ހަނގުރާމަ ފެށުނު ދުވަސް ވަރު ޓްރަމްޕް ވަނީ، ގާތް ގަނޑަކަށް ހަތަރު ހަފުތާގެ މުއްދަތަކަށް ހަނގުރާމަ ކުރިއަށް ދާނެ ކަމަށް ވިދާޅުވެފަ އެވެ. 

އެމެރިކާގެ ހަމަލާ ތަަކުގައި އީރާންގެ ރޫހީ ލީޑަރު އާޔަތުﷲ އަލީ ޚާމަނާއީ އަވަހާރަވެފައިވާއިރު، ހޯމަ ދުވަހު އީރާން އިން ވަނީ އެ ޤައުމުގެ ރޫހީ ލީޑަރުގެ މަޤާމަށް ޚާމަނާއީގެ ދަރިކަލުން، މުޖުތަބާ ޚާމަނާއީ އައްޔަން ކުރައްވައިފަ އެވެ. އައު ރޫހީ ލީޑަރު މުޖުތަބާ ޚާމަނާއީއާ ގުޅޭ ގޮތުން ސުވާލު ކުރުމުން ޓްރަމްޕް ވިދާޅުވީ، އޭނާއާ ގުޅޭ ގޮތުން ވަކި މެސެޖެއް ނެތް ކަމަށެވެ. ނަމަވެސް، އެ މަޤާމަށް އަންނާނެ މީހަކު އޭނާގެ ހިތުގައި އެބަ އޮތް ކަމަށް ޓްރަމްޕް ވިދާޅުވި އެވެ. އެކަމަކު، އެއީ ކޮން ބޭފުޅެއް ކަމެއް ހާމަ ކުރައްވާފައި ނުވެ އެވެ.