އީރާންގެ އައު ރޫހީ ލީޑަރަށް މަރުޙަބާ ވިދާޅުވެ، ޕުޓިން ދެއްވީ ގާތް ގުޅުން އޮންނާނެ ކަމުގެ ޔަޤީންކަން

އީރާންގެ އައު ރޫހީ ލީޑަރު މުޖުތަބާ ޚާމަނާއީ އަށް ރަޝިޔާގެ ރައީސް ވްލަޑިމިއަރ ޕުޓިން މަރުޙަބާ ވިދާޅުވެއްޖެ އެވެ.

އެމެެރިކާ އާއި އިޒްރޭލް އިން ދިން ހަމަލާ ތަކެއްގައި އީރާންގެ ކުރީގެ ރޫހީ ލީޑަރު އާޔަތުﷲ ޚާމަނާއީ އަވަހާރަ ވެވަޑައިގެންފައިވާއިރު، ހޯމަ ދުވަހު އީރާން އިން ވަނީ އެ ޤައުމުގެ އައު ރޫހާނީ ލީޑަރުގެ މަޤާމަށް ޚާމަނާއީގެ ދަރިކަލުން، މުޖުތަބާ ޚާމަނާއީ އައްޔަން ކުރައްވައިފި އެވެ. 

މުޖުތަބާ ޚާމަނާއީ އަށް މަރުޙަބާ ވިދާޅުވެ ޕުޓިން ފޮނުވި މެސެޖުގައި ވިދާޅުވީ މުޖުތަބާ، އޭނާގެ ބައްޕަގެ މަސައްކަތް އިއްޒަތްތެރިކަމާ އެކު ކުރިއަށް ގެންދަވާނެ ކަމުގެ ފުރިހަމަ ޔަގީންކަން އޮތް ކަމަށެވެ. އަދި އީރާންގެ ރައްޔިތުން އެކުވެރިކޮށް، ވަރުގަދަ އިމްތިހާނުތަކާ މުޖުތަބާ ޚާމަނާއީ ކުރިމަތި ލައްވާނެ ކަމަށް ޕުޓިން ވަނީ ފާހަގަ ކުރައްވައިފަ އެވެ. 

މީގެ އިތުރުން ޕުޓިން ވިދާޅުވެފައި ވަނީ، ރަޝިޔާ އާއި އީރާންއާ ދެމެދު އޮތް ގުޅުން އިތުރަށް ވަރުގަދަ ކުރައްވާނެ ކަމަށެވެ. އެއާ އެކު ޕުޓިން ވިދާޅުވީ ރަޝިޔާ އާއި އީރާންއާ ދެމެދު އޮންނަ ގުޅުން ކަށަވަރު ކޮށްދެއްވުމަށް ބޭނުންފުޅުވާ ކަމަށާއި، ރަޝިޔާ އޮންނާނީ އީރާންގެ ރައްޔިތުންނާ އެކު ކަމަށެވެ. ހަމަ އެހެންމެ، އީރާންގެ "ރަޙުމްތެރިންނާ އެކު" ތިބޭނެ ކަމުގެ ޔަޤީންކަން ދެއްވާ ކަމަށް ވެސް ޕުޓިން ވިދާޅުވި އެވެ. 

އީރާންގެ އައު ރޫހާނީ ލީޑަރުގެ މަގާމަށް މުޖުތަބާ ޚާމަނާއީ އައްޔަން ކުރައްވާފައިވާއިރު، އެ ޤައުމުގެ ސިޔާސީ މަސްރަހަށް ބޮޑު ބަދަލު ތަކެއް އަންނާނެ ކަމަށް ފާހަގަ ކުރެވެ އެވެ. އެއާ އެކު، އީރާން އިތުރަށް ވަރުގަދަވެ، އެ ޤައުމުގެ އުސޫލުތައް ދަމަހައްޓާނެ ކަމުގެ ފުރިހަމަ ޔަގީންކަން އޮންނަ ކަމަށް މަސްރަހު ދިރާސާ ކުރާ ފަރާތްތަކުން ބުނެފައިވެ އެވެ. 

ރަޝިޔާ އާއި އީރާން އަކީ އަބަދު ވެސް ގާތް ގުޅުމެއް އޮންނަ ދެ ޤައުމެކެވެ. ރަޝިޔާގެ ރައީސް ޕުޓިންގެ މި މެސެޖަކީ، އީރާންގެ އައު ރޫހާނީ ލީޑަރަށް މަރުޙަބާ ވިދާޅުވެ ލިބުނު ބައިނަލްއަޤުވާމީ ފުރަތަމަ މެސެޖު ކަމަށް ފާހަގަކޮށްފައިވެ އެވެ.