ތެލުގެ އަގު 120 ޑޮލަރުގައި، ޓްރަމްޕް ވިދާޅުވީ ދުނިޔޭގެ ސުލްޙަ އަށްޓަކައި އެއީ ދައްކަން ކުޑަ އަގެއް ކަމަށް

އީރާންއާ ދެކޮޅަށް އެމެރިކާ އިން ކުރިއަށް ގެންދާ ހަނގުރާމައިގެ ސަބަބުން ދުނިޔޭގެ ބާޒާރުގައި ތެލުގެ އަގު 120 ޑޮލަރަށް އުފުލިފައިވާއިރު، އެއީ ދުނިޔޭގެ ސުލްޙަ އަށްޓަކައި ދައްކަން ޖެހޭ ކުޑަ އަގެއް ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ. 

ޓްރަމްޕް އޭނާގެ ޓުރުތު ސޯޝަލް މީޑިއާގައި ކުރެއްވި ޕޯސްޓެއްގައި ވިދާޅުވީ، އީރާންގެ ނިއުކްލިއާ ނުރައްކާ އެއްކޮށް ނައްތާލުމާ އެކު ތެލުގެ އަގު ވަރަށް އަވަހަށް ދަށަށް ދާނެ ކަމަށެވެ. 

މެދު އިރުމަތީގެ މަސްރަހު ވަރަށް ބޮޑަށް ގޯސްވެ، ދުނިޔޭގެ ތެލުގެ ފަސްބައިކުޅަ އެއްބައި ދަތުރު ކުރާ ހޯމޫޒް ކަނޑުއޮޅި ބަންދުވުމާ ގުޅިގެން ބްރެންޓް ކްރޫޑްގެ އަގު 29 އިންސައްތަ މައްޗަށް ގޮސް، ފީފާއެއްގެ އަގު 119.50 ޑޮލަރަަށް ވަނީ އުފުލިފަ އެވެ. މިއީ 2020 ވަނަ އަހަރުގެ އޭޕްރީލް މަހަށް ފަހު ތެލުގެ އަގަށް އައި އެންމެ ބޮޑު ބަދަލެވެ. މީގެ އިތުރުން ވެސްޓް ޓެކްސަސް އިންޓަމީޑިއޭޓްގެ އަގު 31 އިންސައްތަ ވަނީ މައްޗަށް ގޮސްފަ އެވެ. ނަމަވެސް، ޖީ-7 ގެ ޤައުމު ތަކުން ތެލުގެ ރިޒާވް ބޭނުންކުރުމާ ގުޅޭ ގޮތުން މަޝްވަރާ ކުރާނެ ކަމުގެ ރިޕޯޓުތަކާ އެކު، އަގު ތަަކަށް ވަނީ ކުޑަ ބަދަލެއް އައިސްފަ އެވެ. 

އައިއެންޖީ ގްރޫޕްގެ ކޮމޮޑިޓީޒް ސްޓްރެޓެޖީގެ އިސްވެރިޔާ ވޮރެން ޕެޓަސަން ވިދާޅުވި ގޮތުގައި، މި ހާލަތަކީ ކުރު މުއްދަތުގެ ކަމެއްގެ ގޮތުގައި ކުރިން ބެލެވުނު ނަމަވެސް، މިހާރު ފެންނަނީ މިއީ ދިގު ލައިގެންދާނެ ކަމެއްގެ ގޮތުގަ އެވެ. ހޯމޫޒް ކަނޑުއޮޅި ހުޅުވެންދެން ތެލުގެ އަގު ދާނީ މައްޗަށް ކަމަށް އޭނާ ލަފާ ކުރެއްވި އެވެ. މިހާރު ވެސް ކުވެއިތާއި. ޔޫއޭއީ އިން ވަނީ ތެޔޮ ރައްކާ ކުރާ ތަންތަން ފުރުމުގެ ސަބަބުން، ތެޔޮ އުފައްދާ މިންވަރު މަދު ކުރަން ފަށާފައި އެވެ. އަދި އިރާގު އިން ވެސް ވަނީ މިދިޔަ ހަފުތާގައި ތެޔޮ އުފެއްދުން ހުއްޓާލަން ފަށާފައި އެވެ.

މެދު އިރުމަތީގެ ހަނގުރާމަ ހުއްޓުމެއް ނެތި ކުރިއަށް ދާއިރު، އީރާންގެ ރައީސް މަސްއޫދު ޕެޒެޝްކިއާން ވަނީ ދޫ ނުދެއްވާނެ ކަމަށް ވިދާޅުވެފައި އެވެ. މީގެ ރައްދުގައި ޓްރަމްޕް ވިދާޅުވީ، ކުރިން އަމާޒު ނުކުރާ ސަރަހައްދު ތަކަށް ވެސް އެމެރިކާ އިން ހަމަލާ ދޭނެ ކަމަށެވެ. 

ތެލުގެ އަގު އުފުލުމުގެ ސަބަބުން ދުނިޔޭގެ އިގްތިސާދަށް ބޮޑެތި ގރއްލުން ފޯރަމުންދާ އިރު، ޗައިނާ އިން ވަނީ ޑީސަލް އާއި ޕެޓްރޯލް އެކްސްޕޯޓް ކުރުން ހުއްޓާލުމަށް ރިފައިނަރީ ތަކަށް އަންގާފައެވެ. އަދި ދެކުނު ކޮރެއާ އިން 30 އަހަރަށް ފަހު ތެލުގެ އަގު ކޮންޓްރޯލް ކުރުމަށް ދަނީ ވިސްނަމުންނެވެ. އެމެރިކާ ގައި ޕެޓްރޯލްގެ އަގު 2024 ވަނަ އަހަރުގެ އޮގަސްޓް މަހަށް ފަހު އެންމެ މައްޗަށް ގޮސްފައިވާއިރު، މިއީ މިއަހަރު އޮންނަ މިޑްޓާމް އިންތިޚާބުގައި ޓްރަމްޕް އަށް ކުރިމަތިވާނެ ބޮޑު ގޮން ޖެހުމަކަށް ވާނެ އެވެ.

ޖޭޕީ މޯގަންގެ އެނަލިސްޓުން ލަފާކުރާ ގޮތުގައި، މެދު އިރުމަތީގެ ތެޔޮ އުފެއްދުން ދުވާލަކު ހަތަރު މިލިއަން ފީފާ އަށް ވުރެ އިތުރަށް މަދު ވެގެންދާނެ އެވެ. މިއީ ދުނިޔޭގެ ތެޔޮ އުފައްދާ މިންވަރުގެ ތިން ބައިކުޅަ އެއްބަ އެވެ. ކާރޯބާރް ކެޕިޓަލްގެ އިންވެސްޓްމަންޓް އޮފިސަރު ހާރިސް ޚުރްޝީދު ވިދާޅުވި ގޮތުގައި، ބާޒާރުގެ އެންމެ ބޮޑު ބިރަކީ ތެޔޮ އުފެއްދުން މަދުވުމަށް ވުރެ ބޮޑަށް، ހޮރުމޫޒް ކަނޑުއޮޅި ބަންދު ވުމުގެ ސަބަބުން ތެޔޮ އެއް ތަނުން އަނެއް ތަނަށް އުފުލުމަށް ހުރަސް އެޅުމެވެ.