އީރާން އިން ބަހްރެއިންގެ ތެޔޮ ކޮމްޕްލެކްސް އަކަށް ހަމަލާ ދީފި

ބަހްރެއިންގެ އަލް މާމީރުގައި ހުންނަ ތެޔޮ ރައްކާކުރާ ބޮޑު ކޮމްޕްލެކްސް އަކަށް އަމާޒުކޮށް އީރާނުން ދިން ހަމަލާއެއްގައި، އެ ތަނުގައި ބޮޑު އަލިފާނުގެ ހާދިސާއެއް ހިނގައި، އެތައް ގެއްލުން ތަކެއް ވެފައިވާ ކަމަށް އެ ޤައުމުގެ ދައުލަތުގެ މީޑިއާ އިން ރިޕޯޓު ކޮށްފި އެވެ. 

ހޯމަ ދުވަހު ބަހްރެއިންގެ ދައުލަތުގެ މީޑިއާ އިން މިކަން ހާމަ ކޮށްފައިވާއިރު، މިއީ މެދު އިރުމަތީގެ ސަރަހައްދުގައި ހިނގަމުން އަންނަ ހަމަ ނުޖެހުން ތަކުގެ ތެރެއިން އެންމެ ފަހުން ހިނގާފައިވާ ހާދިސާ ކަމަށް ރިޕޯޓުތައް ބުނެ އެވެ. 

ބަހްރެއިންގެ ނިއުސް އެޖެންސީ އިން ސޯޝަލް މީޑިއާގައި ކުރި ޕޯސްޓެއްގައި ބުނެފައި ވަނީ، އަލް މާމީރުގައި ހުންނަ ތެޔޮ ފެސިލިޓީ އަކަށް އީރާން އިން ދިން އުދުވާނީ ހަމަލާއަކާ ގުޅިގެން އެ ތަނުގައި އަލިފާން ރޯވެފައިވާ ކަަމަށެވެ. މި ހާދިސާއާ ގުޅިގެން އެ ސަރަހައްދުގައި ހުރި ބައެއް ތަކެއްޗަށް ބޮޑެތި ގެއްލުން ތަކެއް ލިބިފައި ވީ ނަމަވެސް، އެއްވެސް މީހެއްގެ ފުރާނަ އަށް ގެއްލުންވި ކަމުގެ ރިޕޯޓެއް ލިބިފައި ނުވެ އެވެ. 

މި ހާދިސާ ހިނގުމާ އެކު ބަހްރެއިންގެ ކަމާ ގުޅުން ހުރި އިދާރާ ތަކުން ވަނީ ވަގުތުން އެ ސަރަހައްދަށް ގޮސް، އަލިފާން ނިއްވުމުގެ މަސައްކަތް ފަށާއިފަ އެވެ. އަލިފާންގަނޑު ކޮންޓްރޯލް ކުރުމަށާއި، އިތުރު ގެއްލުން ތަކުން ސަލާމަތް ވުމަށްޓަކައި ސަލާމަތީ ބާރު ތަކުން އަދި އަލިފާން ނިއްވުމުގެ މަސަައްކަތް ކުރާ ފަރާތްތަކުން ގެންދަނީ ކުރަމުންނެވެ. 

ބަހްރެއިންގެ ކަމާ ގުޅުން ހުރި ފަރާތް ތަކުން ބުނެފައި ވަނީ، މި ހަމަލާ އަކީ ސަރަހައްދީ ހަމަ ޖެހުމަށް އޮތް ބޮޑު ނުރައްކަލެއް ކަމަށެވެ. ގަލްފުގެ ޤައުމު ތަކުގެ ތެޔޮ އުފައްދާ މަރުކަޒު ތަކަށް އަމާޒުކޮށް ދޭ މިފަދަ ހަމަލާ ތަކުގެ ސަބަބުން މުޅި ސަރަހައްދުގެ މަސްލަހަތު ގޯސްވެ، އިޤްތިޞާދީ ގޮތުން ބޮޑެތި ގޮން ޖެހުން ތަކެއް ކުރިމަތި ވެދާނެ ކަމުގެ ބިރު ވަނީ ބޮޑުވެފަ އެވެ. 

ބަހްރެއިންގެ ސަރުކާރުން ވަނީ މި އަމަލު އެންމެ ހަރުކަށި އިބާރާތުން ކުށްވެރި ކޮށްފަ އެވެ. އަދި މިއީ އެ ޤައުމުގެ އިސްތިޤުލާލަށް އަރައި ގަތުން ކަަމަށް ވެސް ވަނީ ބުނެފަ އެވެ. މި ހާދިސާއާ ގުޅިގެން މިހާތަނަށް އީރާން އިން ރަސްމީކޮށް އެއްޗެއް ބުނެފައި ނުވެ އެވެ. ނަމަވެސް، ބަހްރެއިން އިން ގެންދަނީ އެ ޤައުމުގެ ސަލާމަތީ ފިޔަވަޅުތައް ކުރިއަށް ވުރެ ވަރު ގަދަ ކުރަމުންނެވެ.