އީރާންގެ އިންޓާނަލް ސެކިއުރިޓީ ކޮމާންޑަށް ހަމަލާ ދީފައިވާ ކަމަށް އިޒްރޭލް އިން ބުނެފި

އީރާންގެ ސަލާމަތީ ބާރު ތަކުގެ ކޮމާންޑު މަރުކަޒު ތަކާއި، މިސައިލް ދޫކުރާ ތަން ތަނަށް އަމާޒުކޮށް ހަމަލާ ދީފައިވާ ކަމަށް އިޒްރޭލްގެ އަސްކަރިއްޔާ އިން ހާމަ ކޮށްފި އެވެ.

އީރާނަށް އަމާޒުކޮށް ހަމަލާ ތަކެއް ދީފައިވާ ކަމަށް އިޒްރޭލުން ހާމަ ކޮށްފައިވާއިރު، މިއީ އީރާނުން އެ ޤައުމުގެ އައު ރޫހީ ލީޑަރު އައްޔަން ކުރި ފަހުން އިޒްރޭލް އިން ދިން ފުރަތަމަ ހަމަލާތައް ކަމަށް ވެސް ރިޕޯޓުތައް ބުނެ އެވެ. 

އިޒްރޭލްގެ ސިފައިންގެ ބަޔާނެއްގައި ބުނީ، އިޒްރޭލްގެ ވައިގެ ސިފައިން އީރާންގެ ވެރިކަމުގެ އިންފްރާސްޓްރަކްޗާ އަށް އިތުރު ހަމަލާ ތަކެއް ދީފައިވާ ކަމަށެވެ. މި ހަމަލާ ތަކުގައި، އިޒްރޭލަށް ނުރައްކާވާނެ ރޮކެޓު އިންޖީނު އުފައްދާ ތަނެއްްގެ އިތުރުން، ދުރު ރޭންޖުގެ މިސައިލް ދޫކުރާ ގިނަ ތަންތަން ހިމެނޭ ކަމަށް ރިޕޯޓު ތަކުގައި ބުނެފައިވެ އެވެ. 

މީގެ އިތުރުން އީރާނުގެ އިސްފަހާން ސިޓީގައި ހުންނަ ސަލާމަތީ ބާރު ތަކުގެ ބޮޑު މަރުކަޒާއި، ފުލުހުންގެ މަރުކަޒާއި، އީރާންގެ އިންގިލާބީ ގާޑުތައް އަދި ބަސީޖް ބާރު ތަކުން ބޭނުން ކުރާ އެހެނިހެން ތަންތަނަށް ވެސް ހަމަލާ ދީފައިވާ ކަމަށް އިޒްރޭލްގެ އަސްކަރިއްޔާ އިން ވަނީ ބުނެފަ އެވެ. 

އިޒްރޭލްގެ އަސްކަރިއްޔާގެ ބަޔާނުގައި ބުނީ ސަލާމަތީ ބާރު ތަކާއި، ބަސީޖް ބާރު ތަކަކީ އީރާންގެ އާންމު ރައްޔިތުންނަށް ނުރައްކާތެރި ގޮތުގައި އަމަލު ކުރާ މައިގަނޑު ބާރު ތަކެއް ކަމަށާއި، އެ ބާރު ތަކުން ރައްޔިތުންނަށް ކަނޑައެޅިގެން ގަދަ ފަދަ އަނިޔާތައް ދެމުން އަންނަ ކަމަށެވެ. އެއާ އެކު، އެންމެ ފަހުން މި ދިން ހަމަލާ ތަކަކީ އީރާންގެ ވެރި ކަމުގެ މައިގަނޑު ބާރު ތަކާއި، ވެރިކަމުގެ ބިންގާ ތަކަށް ލިބޭ ގެއްލުން އިތުރަށް ބޮޑު ކުރުމުގެ ބައެއް ކަމަށް ބަޔާނުގައި ފާހަގަ ކޮށްފައިވެ އެވެ. 

ތަޖުރިބާ ކާާރުން ދެކޭ ގޮތުގައި މިފަދަ ހަމަލާ ތަކުގެ ސަބަބުން، އީރާން އާއި އިޒްރޭލްއާ ދެމެދު އޮތް ދެކޮޅުވެރިކަން އިތުރަށް ބޮޑު ވެގެން ދާނެ އެވެ. އަދި މިކަމުގެ ރައްދުގައި އީރާން އިން ވެސް ވަރުގަދަ ހަމަލާ ތަކެއް ދޭނެ ކަމީ ޔަގީން ކަމެއް ކަމަށް މާހިރުން ފާހަގަ ކުރަމުން ގެންދެ އެވެ.