އީރާނުގެ އައު ރޫހީ ލީޑަރު މުޖުތަބާ ޚާމަނާއީއާ މެދު ހިތްހަަމަ ނުޖެހޭ ކަމަށް ޓްރަމްޕް ވިދާޅުވެއްޖެ

އީރާންގެ އައު ރޫހީ ލީޑަރުގެ މަޤާމަށް އައްޔަން ކުރައްވާފައިވާ، މުޖުތަބާ ޚާމަނާއީއާ މެދު ހިތްހަމަ ޖެހިވަޑައި ނުގަންނަވާ ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ.

އީރާންގެ އެސެމްބްލީ އޮފް އެކްސްޕާޓްސް އިން ވަނީ، އެ ޤައުމުގެ އައު ރޫހީ ލީޑަރު، ނުވަތަ އެންމެ މަތީ ވެރިޔާާގެ މަގާމަށް މުޖުތަބާ ޚާމަނާއީ އައްޔަން ކުރައްވާފައިވާކަން އިއުލާން ކޮށްފަ އެވެ. އޭނާ އަކީ، އެމެރިކާ އިން ދިން ހަމަލާ ތަކެއްގައި އަވަހާރަ ކޮށްލި އީރާންގެ ކުރީގެ ރޫހީ ލީޑަރު އާޔަތުﷲ އަލީ ޚާމަނާއީގެ ދަރިކަލުންނެވެ. 

އީރާނުން އައު ރޫހީ ލީޑަރު އައްޔަން ކުރެއްވުމާ އެކު، ފޮކްސް ނިއުސްގެ ޕްރެޒެންޓަރު ބްރަޔަން ކިލްމީޑްއާ ވާހަކަ ދައްކަވަމުން ޓްރަމްޕް ވިދާޅުވެފައި ވަނީ، އީރާންގެ އެ ނިންމުމާ އެކު އޭނާ ހިތްހަމަ ޖެހިވަޑައި ނުގަންނަވާ ކަމަށެވެ. އަދި އެ ނިންމުމާ މެދު އުފާ ނުވާ ކަމަށް ވެސް ޓްރަމްޕް ވިދާޅުވެފައިވެ އެވެ. 

މީގެ އިތުރުން އީރާންގެ އައު ރޫހީ ލީޑަރާ ގުޅޭ ގޮތުން ދި ޓައިމްސް އޮފް އިޒްރޭލް އިން ސުވާލު ކުރުމުން، އެކަމަށް ސީދާ ޖަވާބެއް ޓްރަމްޕް ދެއްވާފައި ނުވެ އެވެ. އޭގެ ބަދަލުގައި އޭނާ ވިދާޅުވެފައި ވަނީ، ދެން ކަންތައް ވާނެ ގޮތެއް ބަލަން ހުންނަވާނެ ކަމަށެވެ. ހަމަ އެއާ އެކު، އީރާންއާ ދެކޮޅަށް ކުރަމުންދާ ހަނގުރާމަ ނިމުމަކަށް ގެނައުމުގެ ނިންމުމަކީ، އިޒްރޭލްގެ ބޮޑު ވަޒީރު ބެންޖަމިން ނަތަންޔާހޫއާ ގުޅިގެން، ދެ ޤައުމުން ވެސް އެއްބަސްވާ ގޮތަކަށް ނިމޭނެ ކަމެއް ކަމަށް ޓްރަމްޕް ވިދާޅުވި އެވެ. 

އީރާން އިން އައު ރޫހީ ލީޑަރު އިއުލާން ކުރުމުގެ ކުރިން އޭބީސީ ނިއުސް އަށް ދެއްވި އިންޓަވިޔުއެއްގައި ޓްރަމްޕް ވިދާޅުވީ، އީރާން އިން ދެން އައްޔަން ކުރާ ކޮންމެ ލީޑަރަކީ ވެސް އޭނާ އާއި، އެމެރިކާގެ ރުހުން އޮންނަ މީހަކަށް ވާން ޖެހޭނެ ކަމަށެވެ. އެކަން ފާހަގަ ކުރައްވައި ޓްރަމްޕް ވިދާޅުވީ، އެމެރިކާގެ ރުހުން ނެތް މީހަކު ލީޑަރު ކަަމަށް އައްޔަން ކޮށްފި ނަމަ، އެ މީހަކަށް ގިނަ ދުވަހު މަގާމުގައި ދެމި ނުހުރެވޭނެ ކަމަށެވެ. ހަމަ އެހެންމެ، ކޮންމެ 10 އަހަރުން އެއް ފަހަރު މިފަދަ މައްސަލަތަކާ ކުރިމަތިލާން ޖެހުމަކީ އޭނާ ބޭނުންވާ ގޮތެއް ނޫން ކަމަށް ވެސް ޓްރަމްޕް ވިދާޅުވި އެވެ.

އީރާންގެ އައު ރޫހީ ލީޑަރުގެ މަގާމަށް މުޖުތަބާ ޚާމަނާއީ އައްޔަން ކުރައްވާފައި މި ވަނީ، އެމެރިކާ އާއި އީރާންއާ ދެމެދު ބޮޑު ނުތަނަވަސް ކަމެއް އުފެދިފައި ވަނިކޮށެވެ. އެމެރިކާ އާއި އިޒްރޭލް އިން އިސްވެ އީރާން އަށް ހަމަލާ ދޭން ފަށާފައިވާއިރު، އީރާން އިން އަންނަނީ ރައްދުގައި ވަރުގަދަ ހަމަލާ ތަކެއް ދެމުންނެވެ.