އީރާާންގެ ހަމަލާތައް ކުށްވެރިކޮށް، ފިޔަވަޅު އަޅާނެ ކަމުގެ އިންޒާރު ސައުދީ އަރަބިއްޔާ އިން ދީފި

މެދު އިރުމަތީގެ ސަރަހައްދުގެ ޤައުމު ތަކަށާއި، ސައުދީ އަރަބިއްޔާ އަށް އަމާޒުކޮށް އީރާނުން ދެމުން ގެންދާ ހަމަލާތައް ހަރުކަށި އިބާރާތުން ކުށްވެރި ކުރާ ކަމަށާއި، އެ ޤައުމުގެ ސަލާމަތާއި ރައްކާތެރިކަން ކަށަވަރު ކުރުމަަށް އަޅަން ޖެހޭ ކޮންމެ ފިޔަވަޅެއް އެޅުމުގެ ފުރިހަަމ ހައްގު ލިބިގެންވާ ކަމަށް ސައުދީ އިން ބުނެފި އެވެ.

ސައުދީގެ ފޮރިން މިނިސްޓްރީ އިން ހޯމަ ދުވަހު ނެރުނު ބަޔާނެއްގައި ބުނެފައި ވަނީ، އީރާންގެ މި އަމަލު ތަކުގެ ސަބަބުން ދެ ޤައުމުގެ ދެ މެެދުގައި އޮތް ގުޅުމަށް ބޮޑެތި އަސަރު ތަކެއް ވެސް ކުރާނެ ކަމަށެވެ. އަދި ސައުދީ އިން ވަނީ އެ ގުޅުން ގޯސް ވާނެ ކަމުގެ އިންޒާރު ވެސް ދީފަ އެވެ.

ފޮރިން މިނިސްޓްރީގެ ބަޔާނުގައި ބުނެފައި ވަނީ، ސައުދީ އަށާއި، ގަލްފު ކޯޕަރޭޝަން ކައުންސިލް (ޖީސީސީ)ގެ ޤައުމު ތަކުގެ އިތުރުން، އިސްލާމީ އަދި އެކުވެރި އެހެން ޤައުމު ތަކަށް އަމާޒުކޮށް އީރާނުން ދޭ ހަމަލާ ތަކަކީ އެއްވެސް ޙާލަތެއްގައި ބަލައި ގަނެވޭނެ، އަދި އުޒުރެއް ދެއްކޭނެ ވެސް ކަމެއް ނޫން ކަމަށެވެ. 

އީރާންގެ އަމަލު ތަކުގެ ސަބަބުން މަސްރަހު އިތުރަށް ގޯސްވަމުންދާކަން ފާހަގަކޮށް ސައުދީ އިން ބުނީ، އޭގެ ސަބަބުން މިހާރު އޮތް ދެ ޤައުމުގެ ގުޅުމަށާއި، އަދި މުސްތަޤުބަލުގެ ގުޅުމަށް ވެސް ބޮޑެތި އަސަރު ތަކެއް ކުރާނެ ކަމަށެވެ. އަދި މަސްރަހު ގޯސް ކުރުމަށް އީރާނުން ގެން ގުޅޭ ސިޔާސަތުގެ ސަބަބުން، އެންމެ ބޮޑު ގެއްލުމެއް ލިބޭނެ ފަރާތަކީ ވެސް އީރާާން ކަމަށް ސައުދީ އިން ވަނީ ބުނެފަ އެވެ. މީގެ އިތުރުން އާންމު ރައްޔިތުންނަށާއި، އެއާޕޯޓު ތަކުގެ އިތުރުން، ތެޔޮ އުފައްދާ މަރުކަޒު ތަަކަށް ހަމަލާ ދިނުމަކީ ސަރަހައްދީ ސަލާމަތާއި ހަމަ ޖެހުމަށް އޮތް ބޮޑު ނުރައްކަލެއް ކަމަށް ވެސް ބަޔާނުގައި ފާހަގަ ކޮށްފައިވެ އެވެ. 

އަވަށްޓެރި އެއްވެސް ޤައުމަކަށް ހަމަލާ ދިނުމުގެ ރޭވުމެއް ނެތް ކަމަށް އީރާންގެ ރައީސް މަސްއޫދު ޕެޒެޝްކިއާން ވިދާޅުވެފައި ވީ ނަމަވެސް، އަމަލީ ގޮތުން އެކަން ފެންނަން ނެތް ކަމަށް ސައުދީ އިން ބުނެފައިވެ އެވެ. އީރާންގެ ރައީސް ޕެޒެޝްކިއާން އެހެން ވިދާޅުވި ވަގުތާއި، އޭގެ ފަހުން ވެސް، އެއްވެސް ހަގީގަތެއް ނެތް ބަހަނާތައް ދައްކައިގެން އީރާނުން ހަަމަލާތައް ކުރިއަށް ގެންގޮސްފައިވާ ކަމަށް ސައުދީގެ ފޮރިން މިނިސްޓްރީ އިން ވަނީ ބުނެފަ އެވެ. 

އީރާންގެ ހަމަލާތައް ސައުދީ އިން ކުށްވެރި ކޮށްފައިވާއިރު، އީރާނުން ހަމަލާ ދެމުން އަންނަނީ ސަރަހައްދުގައި ހުރި އެމެރިކާގެ އަސްކަރީ މަރުކަޒުތަކާއި، އެމްބަސީ ތަކަށެވެ. އަނެއްކޮޅުން މިއީ އެމެރިކާ އާއި އިޒްރޭލުން އިސްވެ ފެށި ހަނގުރާމަ އަކަށްވާއިރު، ސައުދީގެ ފޮރިން މިނިސްޓްރީގެ ބަޔާނުގައި އެފަދަ އެއްވެސް ވާހަކައެއް ހިމަނާފައި ނުވެ އެވެ.