ނުތަނަވަސްކަން ބޮޑުވެފައި ވަނިކޮށް، ޓްރަމްޕް އާއި ސްޓާމާ މަޝްވަރާ ކުރައްވައިފި

އީރާންއާ ދެކޮޅަށް އެމެރިކާ އިން ކުރަމުން އަންނަ ހަނގުރާމައިގެ ސަބަބުން، އެމެރިކާ އާއި އިނގިރޭސިވިލާތާ ދެމެދު ނުތަނަވަސްކަން ބޮޑުވެފައި ވަނިކޮށް، އެމެރިކާގެ ރައީސް ޑޮނަލްޑް ޓްރަމްޕް އާއި، އިނގިރޭސިވިލާތުގެ ބޮޑު ވަޒީރު ކިއާ ސްޓާމާ މަޝްވަރާ ކުރައްވައިފި އެވެ. 

އެމެރިކާ އިން އީރާނާ ދެކޮޅަށް ކުރިއަށް ގެންދާ ހަނގުރާމައިގައި އިނގިރޭސިވިލާތުގެ އެއްބާރުލުން ނުލިބޭ ކަމަށް ވިދާޅުވެ، ޓްރަމްޕް ވަނީ ބޮޑު ވަޒީރު ސްޓާމާ އަށް ފާޑު ވިދާޅުވެފަ އެވެ. އެންމެ ފަހުން ސްޓާމާ އަށް ފާޑު ވިދާޅުވެ ޓްރަމްޕް ވާހަކަ ދެއްކެވިތާ 24 ގަޑިއިރު ނުވަނީސް، ޓްރަމްޕް އާއި ސްޓާމާ ވަނީ ފޯނުން ގުޅުއްވައި މަޝްވަރާ ކުރައްވައިފަ އެވެ. 

އެ މަޝްވަރާއާ ގުޅޭ ގޮތުން އިނގިރޭސިވިލާތުގެ ބޮޑު ވަޒީރުގެ އޮފީހުގެ ތަރުޖަމާނު ނެރުއްވި ބަޔާނެއްގައި ވިދާޅުވީ، ދެ ބޭފުޅުން ވެސް ވާހަކަ ފައްޓަފާފައި ވަނީ މެދު އިރުމަތީގެ އެންމެ ފަހުގެ ޙާލަތާ ގުޅޭ ގޮތުން ކަމަށެވެ. މީގެ އިތުރުން، އެ ސަރަހައްދުގެ ބައިވެރިންގެ ދިފާއުގައި އިނގިރޭސިވިލާތުގެ ރޯޔަލް އެއާ ފޯސް (އާރުއޭއެފް) ބޭސްތައް މެދުވެރިކޮށް، އިނގިރޭސިވިލާތާއި އެމެރިކާއާ ދެމެދު އޮންނަ އަސްކަރީ އެއްބާރުލުމާ ގުޅޭ ގޮތުން ވެސް ދެ ބޭފުޅުން މަޝްވަރާ ކުރައްވާފައިވާ ކަމަށް ހާމަ ކޮށްފައިވެ އެވެ. 

ބޮޑު ވަޒީރު ސްޓާމާގެ އޮފީހުން ނެރުއްވި ބަޔާނުގައި، ބޮޑު ވަޒީރަށް ފާޑު ވިދާޅުވެ ޓްރަމްޕް ދައްކަވާފައިވާ ވާހަކަ އަށް އެއްވެސް ވަރަަކަށް އިޝާރާތް ކޮށްފައި ނުވެ އެވެ. ޓްރަމްޕް އޭނާގެ ސޯޝަލް މީޑިއާގައި ކުރެއްވި ޕޯސްޓެއްގައި  ވަނީ، މެދު އިރުމަތީގެ މަސްރަހާ ގުޅޭ ގޮތުން އިނގިރޭސިވިލާތަށް ފާޑު ވިދާޅުވެފަ އެވެ. އެގޮތުން ހަނގުރާމަ އިން އެމެރިކާ މޮޅުވުމުން، ދެން ހަނގުރާމައާ ގުޅޭ މީހުން ބޭނުން ނުވާ ކަމަަށް ޓްރަމްޕް ވިދާޅުވި އެވެ. އޭނާ އެހެން ވިދާޅުވީ އިނގިރޭސިވިލާތުން މަތިންދާބޯޓު އުފުލާ މަނަވަރެއް ފޮނުވަން ނިންމުމުންނެވެ. 

މީގެ އިތުރުން އެ ބަޔާނުގައި ބުނެފައި ވަނީ އީރާންއާ ދެކޮޅަށް ކުރިއަަށް ގެންދާ ހަނގުރާމައިގައި އެމެރިކާގެ އަސްކަރިއްޔާގެ ހަ ސިފައިން މަރުވުމުން، ބޮޑު ވަޒީރު ސްޓާމާ އެކަމުގެ ހިތާމަ ފާޅު ކުރައްވާފައިވާ ކަމަށެވެ. އަދި ޓްރަމްޕް އާއި އެމެރިކާގެ ރައްޔިތުންނަށް ބޮޑު ވަޒީރު ސްޓާމާ ތައުޒިޔާ ފޮނުއްވާފައިވާ ކަމަށް ބަޔާނުގައި ވަނީ ބުނެފަ އެވެ. ހަމަ އެހެންމެ، ކުރިއަށް އޮތް ތަނުގައި އިތުރު މަޝްވަރާތައް ކުރިއަށް ގެންދަން، ޓްރަމްޕް އާއި ސްޓާމާ އެއްބަސްވެ ވަޑައިގެންފައިވާ ކަމަށް ބުނެފައިވެ އެވެ. 

ޓްރަމްޕް އާއި ސްޓާމާ މަޝްވަރާ ކުރައްވާފައިވާއިރު، މިހާރު ކުރިއަށްދާ ހަނގުރާމައިގައި އިނގިރޭސިވިލާތުން އެންމެ ފުރަތަމަ ދުވަހުން ފެށިގެން އެމެރިކާ އަށް އެހީތެރިވާން ޖެހޭނެ ކަމަށް، އިނގިރޭސިވިލާތުގެ ކުރީގެ ބޮޑު ވަޒީރު ޓޯނީ ބްލޭއާ ވިދާޅުވެފައިވެ އެވެ. އޭނާ ވެސް ވަނީ ބޮޑު ވަޒީރު ސްޓާމާގެ ސިޔާސަތު ތަކަށް ފާޑު ވިދާޅުވެ ވާހަކަ ދައްކަވައިފަ އެވެ.