ހަމަލާ ބަދަލުކުރުން ހުއްޓާލުމަށް ގޮވާލާ އެއްވެސް ގޮވާލުމަކަށް އީރާނުން އިޖާބަ ނުދޭނެ: ޚާރިޖީ ވަޒީރު

އެމެރިކާއާއި އިޒްރޭލާ ދެކޮޅަށް މިހާރު ކުރަމުންދާ ހަނގުރާމައިގައި، ހަމަލާ ބަދަލުކުރުން ހުއްޓާލުމަށް ގޮވާލާ އެއްވެސް ގޮވާލުމަކަށް އީރާނުން އިޖާބަނުދޭނެ ކަމަށާއި، އީރާނުން ބޭނުންވަނީ އުދުވާންތައް ދާއިމީކޮށް ހުއްޓާލުމަށް ކަމަށް އެ ގައުމުގެ ފޮރިން މިނިސްޓަރު އައްބާސް އަރަގްޗީ ވިދާޅުވެއްޖެއެވެ.

އާދީއްތަ ދުވަހު އެންބީސީ ނިއުސްގެ "މީޓް ދަ ޕްރެސް" ޕްރޮގްރާމަށް ދެއްވި އިންޓަވިއުއެއްގައި އަރަގްޗީ ވިދާޅުވީ، މިދިޔަ އަހަރުގެ ޖޫން މަހު 12 ދުވަހަށް ދެމިގެންދިޔަ ހަނގުރާމަ ހުއްޓާލުމަށް އެއްބަސްވި އެއްބަސްވުމާ އިޒްރޭލާއި އެމެރިކާއިން ޚިލާފުވެފައިވާތީ، އީރާނުން ހަނގުރާމަ ކުރިއަށް ގެންދާނެ ކަމަށެވެ.

"އަދި މިހާރު ތިޔަ އެދެނީ އަލުން ހަމަލާ ބަދަލުކުރުން ހުއްޓާލަންތޯ؟ ކަންކަން ހިނގާނީ މިހެންނެއް ނޫން. ހަނގުރާމަ ދާއިމީކޮށް ނިމުމަކަށް ގެންނަންޖެހޭ،" އަރަގްޗީ ވިދާޅުވިއެވެ.

އޭނާ އިތުރަށް ވިދާޅުވީ، އެ ހިސާބަށް ދެވެންދެން، އީރާނުގެ ރައްޔިތުންނާއި ގައުމުގެ ސަލާމަތަށްޓަކައި ހަނގުރާމަ ކުރިއަށް ގެންދަންޖެހޭ ކަމަށް ގަބޫލުކުރައްވާ ކަމަށެވެ.

އަރަގްޗީ މިހެން ވިދާޅުވީ، ހަނގުރާމަ ހުއްޓާލައި އެމެރިކާއާއެކު މަޝްވަރާގެ މޭޒަށް އެނބުރި ދިއުމަށް އީރާނުން ތައްޔާރަށް އޮތްތޯ އެންބީސީގެ މޮޑަރޭޓަރު ކްރިސްޓިން ވެލްކާ ކުރި ސުވާލަކަށް ޖަވާބު ދެއްވަމުންނެވެ.

މި ވާހަކަތައް އައިސްފައި މިވަނީ، ހަނގުރާމަ ހުއްޓާލެވެން އޮތް ހަމައެކަނި ގޮތަކީ އީރާނުން "ޝަރުތަކާ ނުލައި އަމާންދިނުން" ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވިތާ ދެ ދުވަސް ފަހުންނެވެ.

މީގެ ކުރިން އީރާނާއެކު ކުރެވުނު ހަނގުރާމައިގައި ވެސް ޓްރަމްޕް މިފަދަ ޝަރުތުތަކެއް ކުރިމަތިކުރެއްވި ކަމަށާއި، ނަމަވެސް އެފަދަ ޝަރުތުތަކަކީ ދުވަހަކުވެސް ކާމިޔާބުވާނެ ކަންކަން ނޫން ކަމަށް އަރަގްޗީ ވިދާޅުވިއެވެ.

އޭނާ ވިދާޅުވީ އީރާނުން ދުވަހަކުވެސް އަމާން ނުދޭނެ ކަމަށާއި، ބޭނުންވި ކޮންމެ ވަގުތަކުވެސް ހަނގުރާމަ ކުރިއަށް ގެންދާނެ ކަމަށެވެ.

މި ހަނގުރާމައިގައި ރަޝިޔާގެ އިންޓެލިޖެންސް އެހީތެރިކަން އީރާނަށް ލިބޭ ކަމަށް ބުނާ ވާހަކަތަކާ ގުޅޭގޮތުން ކުރި ސުވާލަކަށް ޖަވާބު ދެއްވަމުން، ސަރަހައްދުގައި ހުރި އެމެރިކާގެ އަސްކަރީ ވަސީލަތްތައް ހުރި ތަންތަން ދެނެގަތުމަށް ތެހެރާނަށް އެފަދަ އެހީތެރިކަމެއް ލިބެމުންދާކަން ފޮރިން މިނިސްޓަރު ކަށަވަރެއް ނުކޮށްދެއްވައެވެ.

"އެކި ދާއިރާތަކުން ރަޝިޔާ އިން އަޅުގަނޑުމެންނަށް އެހީތެރިކަން ފޯރުކޮށްދޭ. އެކަމުގެ ތަފްސީލީ މައުލޫމާތެއް އަޅުގަނޑު އަތަކު ނެތް،" އަރަގްޗީ ވިދާޅުވިއެވެ. އަދި އީރާނާއި ރަޝިޔާއާ ދެމެދު އޮންނަ އެއްބާރުލުމަކީ އާ ކަމެއް ނޫން ކަމަށާއި، އެއީ ސިއްރެއް ވެސް ނޫން ކަމަށް އޭނާ ވިދާޅުވިއެވެ.

ފެބްރުއަރީ 28 ވަނަ ދުވަހު އެމެރިކާއާއި ތެލް އަވީވްގެ އީރާނުގެ ދުޝްމަނުން ވަނީ އެއްވެސް އުދުވާނަކާ ނުލައި އީރާނަށް ޣައިރު ގާނޫނީ ހަމަލާތަކެއް ދީ، އިސްލާމީ އިންގިލާބުގެ ލީޑަރު އާޔަތުﷲ ސައްޔިދު އަލީ ޚާމަނާއީ އާއި އަސްކަރިއްޔާގެ އިސް ކޮމާންޑަރުންތަކެއް އަވަހާރަކޮށްލާފައެވެ.

މީގެ ރައްދުގައި އީރާނުގެ އަސްކަރިއްޔާއިން ވަނީ ކުރިއަރާފައިވާ މިސައިލާއި ޑްރޯން ބޭނުންކޮށްގެން ބަދަލުހިފުމުގެ ވަރުގަދަ ހަމަލާތަކެއް ސިލްސިލާކޮށް ދީފައެވެ.

އެމެރިކާގެ މީޑިއާ ރިޕޯޓްތައް ބުނާގޮތުން، ހުޅަނގު އޭޝިއާ ސަރަހައްދުގައި ހުރި އެމެރިކާގެ އަސްކަރީ މަރުކަޒުތަކަށާއި، އިޒްރޭލުން ހިފާފައިވާ ބިންތަކުގައި ހުރި އަސްކަރީ މަރުކަޒުތަކަށް ދިން ހަމަލާތަކުގައި ބިލިއަނުން ޑޮލަރުގެ ގެއްލުން ވަނީ ލިބިފައެވެ.