އީރާނުގެ ހަނގުރާމައިގައި އެމެރިކާ އަށް ތާއީދު ނުކުރާތީ، ބްލޭއާގެ ރުޅިގަނޑު ބޮޑު ވަޒީރު ސްޓާމާ އަށް

އެމެރިކާ އިން އީރާންއާ ދެކޮޅަށް ކުރަމުން އަންނަ ހަނގުރާމައިގައި، އިނގިރޭސިވިލާތުން އެމެރިކާ އަށް ތާއީދު ނުކުރާތީ، އެ ޤައުމުގެ ކުރީގެ ބޮޑު ވަޒީރު ޓޯނީ ބްލެއާގެ ރުޅިގަނޑު، މިހާރުގެ ބޮޑު ވަޒީރު ކިއާ ސްޓާމާ އަށް އަމާޒުކޮށްފި އެވެ. 

ބްލެއާ ވިދާޅުވީ އީރާން ހަނގުރާމައިގެ މައްސަލައިގައި އެންމެ ފުރަތަމަ ދުވަހުން ފެށިގެން ވެސް، އިނގިރޭސިވިލާތުން ޖެހޭނީ އެމެރިކާ އަށް ތާއީދު ކުރަން ކަމަށެވެ. އެގޮތުން އެމެރިކާ އަކީ އިނގިރޭސިވިލާތަށް ނެތި ދިޔުމެއް ނެތް މުހިންމު ބައިވެރިޔެއްގެ ގޮތުގައި ސިފަ ކުރައްވަމުން ބްލެއާ ވިދާޅުވީ، ބޮޑު ވަޒީރު ސްޓާމާ އެކަމުގައި އަމަލީ ގޮތުން ބައިވެރިވެ ވަޑައިގަންނަވަން ޖެހޭ ކަމަށެވެ. 

ވެރިކަން ކުރާ ލޭބާ ޕާޓީގެ ލީޑަރުގެ ގޮތުގައި ވެސް ހުންނެވި ސްޓާމާ އަށް އަމާޒުކޮށް ބްލެއާ މިފަދައިން ވާހަކަ ދައްކަވާފައިވާއިރު، އެމެރިކާގެ ރައީސް ޑޮނަލްޑް ޓްރަމްޕް ވެސް ވަނީ ސްޓާާމާ އަށް ފާޑު ވިދާޅުވެފަ އެވެ. ސްޓާމާގެ ސިޔާސަތު ތަކަށް ތަކުރާރުކޮށް ޓްރަމްޕް ފާޑު ވިދާޅުވަމުން ގެންދަވާއިރު، ބްލެއާ ވިދާޅުވީ މިކަމުގައި އޭނާގެ ވިސްނުން މިހާރު ވެސް ސަރުކާރާ ހިއްސާ ކޮށްފައިވާނެ ކަމަށެވެ. އަދި މިއީ އިނގިރޭސިވިލާތުގެ ސަރުކާރަށް އައު ވާހަކައެއް ނޫން ކަމަށް ވެސް ބްލެއާ ވިދާޅުވި އެވެ. 

އެމެރިކާ އާއި އިނގިރޭސިވިލާތާ ދެމެދު އޮންނަ ޚާއްސަ ގާތް ގުޅުމުގެ މައްޗަށް އިޝާރާތް ކުރައްވައި ބްލެއާ ވިދާޅުވީ، ޤާއުމުގެ ސަލާމަތާއި ރައްކާތެރި ކަމަށްޓަަކއި އިނގިރޭސިވިލާތުން އެމެރިކާ އަށް ބަރޯސާ ވާން ޖެހޭ ކަމަށެވެ. އަދި ގުޅުމެއްގެ ވަރުގަދަކަން އެނގިގެން ދާނީ ކަންކަން ފަސޭހަ ވަގުތެއްގައި ނޫން ކަމަށާއި، އެކަން ސާފު ވާނީ އުނދަގޫ ޙާލަތް ތަކުގައި ކަމަށް ވެސް ބްލެއާ ވިދާޅުވި އެވެ. 

މީގެ ކުރިން ވިއެޓްނާމް ހަނގުރާމަ އާއި، އިރާގު ހަނގުރާމައިގައި އަމަލު ކުރި ގޮތާއި، މިހާރުގެ ޙާލަތު ތަފާތުކަން ފާހަގަ ކުރައްވަމުން ބްލެއާ ވިދާޅުވީ، އެމެރިކާގެ ރައީސް ކަމުގެ މަގާމުގައި ހުންނެވީ ކޮން ބޭފުޅެއްތޯ ބެލުމުގެ ބަދަލުގައި، ބައިވެރިއެއްގެ ހައިސިއްޔަތުން އެހީތެރިކަން ފޯރުކޮށްދޭން ޖެހޭނެ ކަމަށެވެ. 

މެދު އިރުމައްޗަށް ދެ މަތިންދާ ބޯޓު އުފުލާ މަނަވަރު ފޮނުވުމަށް އިނގިރޭސި ސަރުކާރުން ނިންމި ނިންމުމަކީ، މާ ލަހުން ނިންމި ނިންމުމެއް ކަމަށް އެމެރިކާގެ ރައީސް ޓްރަމްޕް ވަނީ ވިދާޅުވެފަ އެވެ. އެކަމަށް އިޝާރާތް ކުރައްވައި ޓްރަމްޕް ވިދާޅުވީ، ހަނގުރާމަ ކާމިޔާބުވުމުން ދެން އައިސް ބައިވެރިވާ ބަޔަކު ބޭނުން ނުވާ ކަމަށެވެ. މިހާރު އިނގިރޭސި މަނަވަރު އެޗްއެމްއެސް ޕްރިންސް އޮފް ވޭލްސް އެ ސަރަހައްދަށް ދިޔުމަށް ތައްޔާރު ވަމުންދާއިރު، އެޗްއެމްއެސް ޑްރެގަން ފުރުން ވަނީ އަންނަ ހަފުތާ އަށް ލަސްވެފަ އެވެ. 

މީގެ އިތުރުން ޓްރަމްޕް އަށް ތާއީދު ކުރުމުގެ ސަބަބުން، ވެރިކަން ކުރާ ލޭބާ ޕާޓީގެ އެތެރޭގައި ބައިބައިވުން އުފެދިދާނެ ކަމަށް ދެކެވޭ ވާހަކަތައް ބްލެއާ ވަނީ ދޮގު ކުރައްވައިފަ އެވެ. އޭނާ ވިދާޅުވީ 2029 ވަނަ އަހަރު ބާއްވާ އާންމު އިންތިޚާބުގެ ނަތީޖާ ބިނާ ވާނީ މުޅިން އެހެން ކަންތައް ތަކެއްގެ މައްޗަށް ކަމަށެވެ. އަދި ޚާރިޖީ ސިޔާސަތުގައި ބޮޑު ވަޒީރު ވާން ޖެހޭނީ ވަރުގަދަ، އަދި ސާފު ސިޔާސަތެއް ގެންގުޅުއްވާ ބޭފުޅަކަށް ކަމަށް ވެސް ބްލެއާ ވިދާޅުވި އެވެ. 

އެކަމާ ގުޅޭ ގޮތުން ބްލެއާގެ ތަރުޖަމާނު ޑެއިލީ މެއިލް އަށް ވިދާޅުވެފައި ވަނީ، އެ ވާހަކަ ތަކަކީ އަމިއްލަ ޙަރަކާތެއްގައި ދެއްކެވި ވާހަކަ ތަކެއް ކަަމަށާއި، އެއީ އާންމު ކުރަން ގަސްދު ކުރި ވާހަކަ ތަކެއް ނޫން ކަމަށެވެ. ބްލެއާ މި ވާހަކަ ދައްކަވާފައި ވަނީ ޖޫވިޝް ނިއުސް އިން ބޭއްވި ސިއްރު ބައްދަލުވުމެއްގެ ތެރޭގަ އެވެ. ޖޫވިޝް ނިއުސް އިން ބުނީ އެއީ "ޗެތަމް ހައުސް" އުސޫލުގެ ދަށުން ސިިއްރު ކޮށްގެން ކުރިއަށް ގެންދިޔަ ބައްދަލުވުމެއް ކަމަަށާއި، އޭގެ ތެރެއިން ބައެއް ވާހަކަ މީޑިއާ އަށް ލީކުވުމުން އެކަމާ ހިތާމަ ކުރާ ކަމަށެވެ.