އެމެރިކާގެ އަމާޒު ތަކަށް ހަމަލާ ދޭނަން، ޤައުމުގެ ދިފާއުގައި މި ތިބީ މަރުވާން ވެސް ތައްޔާރަށް: އީރާންގެ ރައީސް ޕެޒެޝްކިއާން

ސަރަަހައްދުގައި ހުރި އަވަށްޓެރި ޤައުމު ތަކަށް އީރާން އިން ހަމަލާ ނުދޭނެ ކަމަށާއި، ނަމަވެސް އެމެރިކާގެ އަސްކަރީ ތަންތަނަށް ހަމަލާ ދޭނެ ކަމަށް އީރާންގެ ރައީސް މަސްއޫދު ޕެޒެޝްކިއާން ވިދާޅުވެއްޖެ އެވެ. 

ސޯޝަލް މީޑިއާގައި ކުރެއްވި ޕޯސްޓެއްގައި ޕެޒެޝްކިއާން ވިދާޅުވީ، އީރާން އެ ޤައުމުގެ ރަޙުމަތްތެރިންނާ ދެކޮޅަށް ހަމަލާ ނުދޭނެ ކަމަށެވެ. ނަމަވެސް އެމެރިކާގެ އަސްކަރީ މަރުކަޒު ތަކާއި، އެމެރިކާގެ އަމާޒު ތަކަށް ހަމަލާ ދޭނެ ކަމުގައި ޕެޒެޝްކިއާން ވިދާޅުވި އެވެ. އެމެރިކާއާ ދެކޮޅަށް ދޭ ހަމަލާ ތަކަށް ވަކާލާތު ކުރައްވައި ޕެޒެޝްކިއާން ވިދާޅުވީ، އީރާންގެ ރައްޔިތުން ޤައުމު ދިފާއު ކުރުމަށް މަރުވާން ވެސް ފަސް ނުޖެހޭނެ ކަމަށެވެ.

މީގެ އިތުރުން ޕެޒެޝްކިއާން ވިދާޅުވީ، އީރާން އަކީ އަބަދު ވެސް ސަރަހައްދުގެ ސަރުކާރުތަކާ ރަޙުމްތެރި ގުޅުން ދެމެހެއްޓުމަށް ޝައުޤުވެރިވާ ޤައުމެއް ކަމަށެވެ. ނަމަވެސް، އެމެެރިކާ އާއި، ޔަހޫދީ ވެރި ކަމުގެ ލަޝްކަރީ ހަމަލާތަކާ ދެކޮޅަށް އީރާން އަށް ނިސްބަތްވާ ދިފާއުވުމުގެ ހައްގު ކުޑަ ނުވާނެ ކަމަށް ވެސް ޕެޒެޝްކިއާން ވިދާޅުވި އެވެ. 

މީޑިއާ ތަކުގައި ބުނެފައި ވަނީ، އީރާންގެ ރައީސް ޕެޒެޝްކިއާންގެ މި ވާހަކަ ތަކަކީ އެންމެ ފަހުން ހޮނިހިރު ދުވަހު ދެއްވި ބަޔާނާ ތަފާތު ވާހަކަ ތަކެއް ކަމަށެވެ. އެ ބަޔާނުގައި ޕެޒެޝްކިއާން ވިދާޅުވެފައި ވަނީ، ސަރަހައްދީ ޤައުމު ތަކަށް ދެވުނު ހަމަލާ ތަަކަަށް މައާފަށް އެދިވަޑައިގަންނަވާ ކަމަށެވެ. އަދި އެ ޤައުމު ތަކުން ހަމަލާއެއް ނުދޭ ނަމަ، އީރާން އިން އިތުރު ހަމަލާއެއް ނުދޭނެ ކަމަށް ޕެޒެޝްކިއާން ވިދާޅުވި އެވެ. 

އީރާން އިން އަބަދު ވެސް ބުނަމުން އަންނަނީ އެ ޤައުމުން އިސްވެ އެއްވެސް ހަމަލާއެއް ނުދޭނެ ކަމަށާއި، އެ ޤައުމުން އިސްވެ ހަނގުރާމައެއް ވެސް ނުފަށާނެ ކަމަށެވެ. ނަމަވެސް، އީރާން އަށް އަމާޒުކޮށް ހަމަލާ އެއް އަތުވެއްޖެ ނަމަ، އެ ޤައުމުގެ ދިފާއުގައި ހަމަލާ ދިނުމުގެ ހައްގު އޮންނާނެ ކަމަށް އީރާން އިން އަބަދު ވެސް ބުނެ އެވެ.