އީރާން އަށް އެއްގަމު ސިފައިން ފޮނުވުމުގެ ފުރުސަތު އެބަ އޮތް: ޓްރަމްޕް

އީރާންގެ ނިއުކްލިއާ ޕްރޮގްރާމް ހުއްޓުވުމަށް ކުރަމުންދާ މަސައްކަތުގެ ތެރެއިން، އެ ޤައުމުގައި ރައްކާ ކޮށްފައިވާ ޔުރޭނިއަމް އެމެރިކާގެ ބާރުގެ ދަށަށް ގެނައުމަށް ޓަކައި އެއްގަމު މަގުން ސިފައިން ފޮނުވުމުގެ ފުރުސަތު އެބަ އޮތް ކަަމަށް، އެމެރިކާގެ ރައީސް ޑޮނަލްޑް ޓްރަމްޕް ވިދާލުވެއްޖެ އެވެ. 

އެއާ ފޯސް ވަންގައި ހުންނަވާ ނޫސްވެރިންނަށް މައުލޫމާތު ދެއްވަމުން ޓްރަމްޕް ވިދާޅުވީ، ކޮންމެ ވެސް ހިސާބަކުން އެއްގަމު ސިފައިން ފޮނުވަން ޖެހިދާނެ ކަމަށާއި، އެއީ ކުރެވިދާނެ ވަރަށް ރަނގަޅު ކަމެއް ކަމަށެވެ. އަދި މިހާތަނަށް އެފަދަ ފިޔަވަޅެއް އަޅާފައި ނެތް ނަމަވެސް، ކުރިއަށް އޮތް ތަނުގައި އެއީ ކުރެވިދާނެ ކަމެއްގެ ގޮތުގައި ޓްރަމްޕް ވަނީ ފާހަގަ ކުރައްވައިފަ އެވެ. 

އީރާންއާ ދެކޮޅަށް އެމެރިކާ އާއި އިޒްރޭލް ގުޅިގެން ފެށި ހަނގުރާމަ އަށް ހަފުތާއެއް ވެފައިވާއިރު، ހަމައެކަނި ވައިގެ މަގުން ދޭ ހަމަލާ ތަކުން އީރާންގެ އަސްކަރީ ޤާބިލުކަން ނައްތާ ނުލެވޭނެ ކަމަށާއި، ނިއުކްލިއާ ބޮން އުފެއްދުން ހުއްޓުވުމަށް އެކަނި އެކަން ފުދޭނެ ކަމަށް ނުބެލެވޭ ކަމަށް ބައެއް މާހިރުން ވަނީ ފާހަގަ ކޮށްފަ އެވެ. އެކަމާ ގުޅޭ ގޮތުން ސުވާލު ކުރުމުން ޓްރަމްޕް ވިދާޅުވީ، އެއްގަމު ސިފައިން ބޭނުން ކުރުމުގެ ފުރުސަތު އެއްކޮށް ބަންދު ނުވާ ކަމަށެވެ. 

ޓްރަމްޕް އިތުރަށް ވިދާޅުވީ އެއްގަމު ސިފައިން ފޮނުވާނީ ވަރަށް ވަރުގަދަ ސަބަބެއް އޮވެގެން ކަމަށެވެ. އަދި އެމެރިކާގެ ސިފައިން އެފަދަ ފިޔަވަޅެއް އަޅައިފި ނަމަ، އީރާންގެ އަސްކަރިއްޔާ އެއްކޮށް ބަލިކަށިވެ، އެއްގަމު މަގުން ހަނގުރާމަ ކުރުމުގެ އެއްވެސް ޤާބިލު ކަމެއް އެ ޤައުމުގައި ނޯންނާނެ ކަމަށް ވެސް ޓްރަމްޕް ވިދާޅުވި އެވެ.

އީރާންގެ ނިއުކްލިއާ މަރުކަޒު ތަަކަށް އަމާޒުކޮށް ހަމަލާ ދިނުމުގެ ބަދަލުގައި، އެ ޤައުމުގެ ޔުރޭނިއަމް އެމެރިކާގެ ބާރުގެ ދަށަށް ގެނައުމުގެ ވިސްނުން ޓްރަމްޕް ގެންގުޅުއްވާއިރު، މިއީ މެދު އިރުމަތީގެ މަސްރަހު އިތުރަށް ގޯސްވެގެން ހިނގައި ދާނެ ކަމެއް ކަަަމަށް މަސްރަހު ދިރާސާ ކުރާ ފަރާތް ތަކުން ދަނީ ބުނަމުންނެވެ. ނަމަވެސް، ޓްރަމްޕްގެ ސަރުކާރުން ބުނަމުން ދަނީ އީރާންގެ ނިއުކްލިއާ ހަތިޔާރު އުފެއްދުން ހުއްޓުވުމަށް ކުރަން ޖެހޭ ކޮންމެ ކަމެއް ކުރާނެ ކަމަށެވެ.