އެމެރިކާ އާއި އިޒްރޭލްއާ ދެކޮޅަށް ހަ މަސް ވަންދެން ހަނގުރާމަ ކުރެވޭނެ: އީރާން

އެމެރިކާ އާއި އިޒްރޭލް އިން އީރާންއާ ދެކޮޅަށް ކުރަމުން އަންނަ ހަނގުރާމައިގައި، ކުރިއަށް އޮތް ހަ މަސް ވަންދެން އެ ދެ ޤައުމާ ދެކޮޅަށް ހަނގުރާމަ ކުރެވޭނެ ކަމަށް އީރާންގެ އިސްލާމިކް ރިވޮލިއުޝަނަރީ ގާޑް ކޯޕްސް (އައިއާރުޖީސީ) އިން ބުނެފި އެވެ. 

ފާސް ނިއުސް އެޖެންސީ އިން ރިޕޯޓު ކުރި ގޮތުގައި އައިއާރުޖީސީގެ ތަރުޖަމާނު އަލީ މުޙައްމަދު ނައިނީ އާދީއްތަ ދުވަހު ވިދާޅުވެފައި ވަނީ، އިސްލާމީ ޖުމްހޫރިއްޔާގެ ސިފައިންގެ ބާރުގައި މިހާރު ހިނގަމުންދާ ފެންވަރުގައި އެންމެ މަދު ވެގެން ހަ މަސް ދުވަހުގެ ބާރު ގަދަ ހަނގުރާމައެއް ކުރިއަށް ގެންދެވޭނެ އެވެ. 

އީރާންގެ އެލީޓް ސިފައިންގެ ބާރު ކަމަށްވާ، އައިއާރުޖީސީ ގާޑުން އިތުރަށް ބުނީ އެ ސަރަހައްދުގައި އެމެރިކާ އާއި އިޒްތޭލްގެ ބާސްތަކާއި، ތަންތަނާ ގުޅުން ހުރި 200 އަށް ވުރެ ގިނަ އަމާޒު ތަަކަށް ހަމަލާ ދީފައިވާ ކަމަށެވެ. މިދިޔަ ފެބްރުވަރީ މަހުގެ 28 ވަނަ ދުވަހު އެމެރިކާ އާއި އިޒްރޭލް އިން އީރާން އަށް ދޭން ފެށި ހަމަލާ ތަކުގައި، އެ ޤައުމުގެ އެންމެ މަތީ ވެރިޔާ، އަދި ރޫހާނީ ލީޑަރު އާޔަތުﷲ އަލީ ޚާމާނައީ ވަނީ އަވަހާރަ ކޮށްލައިފަ އެވެ.

އެކަމަށް ރައްދު ދީ އީރާން އިން ވަނީ، ސަރަހައްދުގައި ހުރި އެމެރިކާގެ އަސްކަރީ ބޭސް ތަކުގެ އިތުރުން، އެމްބަސީ ތަކަށް ވެސް ވަރުގަދަ ހަމަލާ ތަކެއް ދީފަ އެވެ. އީރާން އިން ދިން ހަމަލާ ތަކުގައި ސަރަހައްދުގައި ހުރި ޤައުމު ތަކަށް ވެސް ގެއްލުން ތަކެއް ވަނީ ލިބިފަ އެވެ. އެ ޤައުމު ތަކުން ބުނެފައި ވަނީ ހަނގުރާމައިގައި ބައިވެރި ނުވާނެ ކަަމަށެވެ. 

އައިއާރުޖީސީ އިން މި ބަޔާން ނެރެފައިވާއިރު، މެދު އިރުމަތީގެ ސަރަހައްދުގައި ހަނގުރާމައިގެ ޙާލަތު ވަނީ އިތުރަށް ގޯސްވެފަ އެވެ. އަދި އިންސާނީ ޙާލަތުގެ ދަތިކަން ބޮޑުވެފައިވާއިރު، އީރާން އިން ބުނަމުން ދަނީ އެ ޤައުމުގެ ސިފައިންގެ ބާރު ފަދަ ކަމަށާއި، ދިފާއީ ނިޒާމު ހަރުދަނާ ކަމަށެވެ. އީރާން އިން އަންނަނީ އިޒްރޭލް އަށް އަމާޒުކޮށް ވެސް ވަރުގަދަ ހަމަލާ ތަކެއް ދެމުންނެވެ.

ހޮނިހިރު ދުވަހު އީރާން އިން ނިންމާފައި ވަނީ ސަރަހައްދުގައި ހުރި ޤައުމު ތަކަށް އަމާޒުކޮށް ދެން ހަމަލާ ނުދިނުމަށެވެ.