މަރުކަޒީ ބޭންކުން ފައިސާ ހޯދުމަށް ނިންމުމަކީ އޭގެ ގާނޫނީ ސައްހަކަމާމެދު ސުވާލު އުފެދޭ، ރާއްޖޭގެ އިގްތިސާދަށް ނުރައްކާ ބޮޑު އަދި ބޯޑުގެ މާލީ ޒިންމާއާ ފުށުއަރާ މުއާމަލާތެއް ކަމަށް ޕެންޝަން އޮފީހުގެ ބޯޑުން އިސްތިއުފާ ދިނުމަށް އަހުމަދު ސަރުވަޝް އާދަމް ރައީސް މުޢިއްޒު އަށް ހުށަހެޅި ސިޓީގައި ވިދާޅުވެއްޖެ އެވެ.

ޕެންޝަން އޮފީހުގެ ބޯޑުން ބުދަ ދުވަހު އިސްތިއުފާ ދެއްވި ސަރުވަޝް އާދަމް ވިދާޅުވީ، ޕެންޝަން އޮފީސް މެދުވެރިކޮށް ފައިސާ ޗާޕުކުރުމަށް ސަރުކާރުން ކުރަމުންދާ މަސައްކަތަކީ ދައުލަތުގެ ފިސްކަލް ޒިންމާގެ ޤާނޫނު ފޫއަޅުވާލައިގެން ކުރާ ކަމެއް ކަމަށެވެ.

ރައީސް މުހައްމަދު މުއިއްޒުގެ އިންތިޚާބީ ވައުދުތަކުގެ ތެރޭގައި ފައިސާ ޗާޕުނުކޮށް އިޤްތިޞާދު ހިފެހެއްޓުން ހިމެނުނު ނަމަވެސް، މިހާރު ސަރުކާރުން ވަނީ އޮޅުވާލައިގެން ފައިސާ ޗާޕުކުރުމަށް ނިންމާފައެވެ. މި ގޮތުން ފައިސާ ޗާޕުކުރުމަށް ރޭވިފައިވަނީ މަރުކަޒީ ބޭންކުން ޕެންޝަން އޮފީހަށް ފައިސާ ދިނުމުން، އެ އޮފީހުން ފައިނޭންސް މިނިސްޓްރީގެ ބޮންޑަކަށް އިންވެސްޓުކުރާ އުސޫލުންނެވެ.

ސަރުވަޝް އިސްތިއުފާ ދެއްވުމަށް ހުށަހެޅުއްވި ސިޓީގައި ވިދާޅުވެފައިވަނީ މި މުޢާމަލާތާ ގުޅޭ ގޮތުން މިހާތަނަށް ހުށަހަޅާފައިވާ ލިޔުންތަކުގައި އެއްވެސް ފަރާތެއްގެ ޤާނޫނީ ރައުޔެއް ބޯޑަށް ހުށަހަޅާފައިނުވާ ކަމަށެވެ.

ސަރުވަޝް އިތުރަށް ފާހަގަކުރައްވާފައިވާ ގޮތުގައި މި މުޢާމަލާތުގެ ސަބަބުން ރާއްޖޭގެ އިންފްލޭޝަން ރޭޓް މަތިވެ، ޑޮލަރުގެ އަގަށް ނޭދެވޭ އަސަރުތަކެއް ކުރާނެއެވެ. އިންފްލޭޝަން 0.11 އިންސައްތަ ޕޮއިންޓުން މަތިވެއްޖެނަމަ، ޕެންޝަން ފަންޑަށް ލިބޭ ރިއަލް ރިޓާން އެއްކޮށް ގެއްލިގެންދާނެ ކަމަށް އޭނާ ވިދާޅުވެފައިވެއެވެ.

މި ކަމުގެ ނުރައްކާތެރިކަން ފާހަގަކުރައްވަމުން ސަރުވަޝް ވިދާޅުވެފައިވަނީ، މިއީ އިޤްތިޞާދީ އިލްމުގެ ތިއަރީގެ އިތުރުން، އައިއެމްއެފް، ވޯލްޑް ބޭންކް އަދި އޯއީސީޑީގެ ދިރާސާތަކުންވެސް ހާމަވާ ކަމެއް ކަމަށެވެ. އަދި ގާނާ، އާޖެންޓީނާ އަދި ޒިމްބާބުވޭ ފަދަ ޤައުމުތަކުން މިފަދަ ކަންކަމުގެ ސަބަބުން ތަޖުރިބާކޮށްފައިވާ ދަތިތައްވެސް ފާހަގަކުރައްވާފައިވެއެވެ.