ކާބޯތަކެތީގެ އަގު ހުއްޓުމެއް ނެތި ބޮޑު ވަނީ!

ކާބޯތަކެއްޗާއި އާންމު ކޮށް ގޭތެރޭގައި ބޭނުން ކުރާ ތަކެތީގެ އަގުތައް އަނެއްކާ ވެސް މައްޗަށް ހިނގައްޖެ ކަމަށް މޯލްޑިވްސް ބިއުރޯ އޮފް ސްޓެޓިސްޓިކްސް އިން ހާމަ ކޮށްފިއެވެ.

އެ ބިއުރޯ އިން ހޯމަ ދުވަހު ހާމަ ކުރި އޮގަސްޓް މަހުގެ އަގުތައް ހުރި ގޮތް ދައްކުވައިދޭ މައުލޫމާތުން 2025 ވަނަ އަހަރުގެ އޮގަސްޓް މަހާ ހަމަ އަށް، އަހަރުގެ ތެރޭގައި ކުރީ އަހަރުގެ މި މުއްދަތާ އަޅާ ބަލާއިރު ހުރިހާ ބާވަތެއްގެ މުދަލުން އަގުތައް ވަނީ މައްޗަށް ގޮސްފައެވެ. އެ ގޮތުން އޮގަސްޓް މަހު ކޮންސިއުމަރ ޕްރައިސް އިންޑެކްސް 4.14% މައްޗަށް ގޮސްފައިވާ ކަމަށް ވަނީ ބުނެފައެވެ. މިއީ 2025 ވަނަ އަހަރުގެ ޖުލައި މަހާ ހަމަ އަށް، އަހަރުގެ ތެރޭގައި އަގުތައް މައްޗަށް ދިޔަ މިންވަރު ކަމުގައިވާ 3.97% އަށް ވުރެ ވެސް މަތީ އަދަދެކެވެ.

ކުރީ އަހަރާ އަޅާ ބަލާއިރު ހުރިހާ ބައިތަކެއްގެ މުދަލުން އޮގަސްޓް މަހުގެ ތެރޭގައި 0.36% އިގެ މިންވަރަކަށް އަގުތައް މައްޗަށް ގޮސްފައި ވެއެވެ. 2025 ވަނަ އަހަރުގެ ޖުލައި މަހުގައި އަގުތައް މައްޗަށް ގޮސްފައި ވަނީ 0.02% އަށެވެ.

އޮގަސްޓް މަހު އެންމެ ބޮޑަށް އަގު ބޮޑުވެފައި ވަނީ ކަނޑު މަހުގެ ބާވަތްތަކުންނެވެ. އެއީ 7.06% އަށެވެ. މީގެ އިތުރުން، ކާބޯތަކެތީގެ އަގުތައް 4.58% އަށް އުފުލިފައިވާއިރު، މޭވާގެ އަގު 3.91% އަށް މައްޗަށް ގޮސް ތަރުކާރީ 2.19% އަށް މައްޗަށް ގޮސްފައިވާ ކަމަށް ސްޓެޓިސްޓިކްސް ބިއުރޯ އިން ބުނެފައިވެއެވެ.

މޯބައިލް ކޮމިއުނިކޭޝަން ޚިދުމަތްތަކުގެ އަގު 0.44% އަށް ވަނީ އުފުލިފައެވެ. އޭގެ އިތުރުން ސިއްހީ ޚިދުމަތުގެ އަގުތަކާއި ތައުލީމުގެ ޚިދުމަތުގެ އަގުތައް ވެސް ވަނީ އޮގަސްޓް މަހު މައްޗަށް ގޮސްފައެވެ.

އޮގަސްޓް މަހު އެހެނިހެން ކާބޯތަކެތީގެ އުފެއްދުންތައް 0.61% އަށް މައްޗަށް ގޮސްފައިވާއިރު، ހަކުރު، ޖޭމް، މާމުއި، ޗޮކްލެޓް އަދި ކޮންފެކްޝަނަރީގެ ބާވަތްތަކުގެ އަގު 0.67% އަށ އުފުލިފައިވެއެވެ. މީގެ އިތުރުން ކިރު، ކިރުގެ އެހެނިހެން ބާވަތްތަކާއި ބިހުގެ އަގު ވެސް ވަނީ މައްޗަށް ގޮސްފައެވެ. ސާފުތާހިރު ކަމަށް ބޭނުންކުރާ ސާމާނުގެ އަގުތައް ވަނީ 2.39% އަށް މަތިވެފައެވެ. ވައިގެ މަގުން ދަތުރުކުރުމުގެ ޚިދުމަތް 0.37% އަށް މައްޗަށް ދިޔަ ކަމަށް ވެސް ސްޓެޓިސްޓިކްސް ބިއުރޯ އިން ބުނެފައިވެއެވެ.

ރެސްޓޯރެންޓްތަކާއި އެކޮމެޑޭޝަން ޚިދުމަތްތަކުގެ އަގުތަކަށް ބަލާއިރު މިދިޔަ އޮގަސްޓް މަހު ވަނީ މިދިޔަ އަހަރުގެ އެ މުއްދަތަށް ވުރެން އަގު 5.40% ބޮޑުވެފައެވެ.

ދުންފަތާއި ދުފުން ފަދަ ބާވަތްތަކުގެ އަގުތައް ވެސް އޮގަސްޓް މަހު ވަނީ މިދިޔަ އަހަރުގެ އެ މުއްދަތަށް ވުރެން 108.46% ބޮޑުވެފައެވެ.

ތަކެތީގެ އަގުތައް ހުއްޓުމެއް ނެތި މައްޗަށް ދާ މައްސަލައިގައި ގިނަ ރައްޔިތުން ކަންބޮޑުވުން ފާޅު ކުރަމުން އަންނަ އިރު، ކުދި އަދި މެދުފަންތީގެ ވިޔަފާރިތައް ވެސް ބަނގުރޫޓު ވަމުން އަންނަ ކަމުގެ އަޑުތައް ވަނީ ގަދަވެފައެވެ.

ބައެއް ވިޔަފާރިވެރިން ބުނާ ގޮތުގައި ތަކެތީގެ އަގުތައް މައްޗަށް ދަނީ ރާއްޖެ އިން ބޭރުން މުދާ ގެނައުމަށް ރަސްމީ ރޭޓުގައި ބޭނުންވާ ވަރަށް ޑޮލަރު ގަންނަން ނުލިބުމުގެ ސަބަބުންނެވެ. ގިނަ ވިޔަފާރިތަކަށް ކަޅު ބާޒާރުން ޑޮލަރު ގަންނަން މަޖުބޫރުވެފައިވާއިރު ޑޮލަރު ލިބެނީ 20ރ. އިން މަތިން ކަމަށް އެފަރާތްތަކުން ބުނެއެވެ.