އިންޒާރުތަކަށް ބެލުމެއްނެތި ހޮރްމޫޒް ކަނޑުއޮޅިން ދަތުރުކުރި ތެޔޮ ޓޭންކަރަކަށް އީރާނުން ޑްރޯން ހަމަލާދީ ގޮއްވާލައިފި
8 މާރިޗު 2026 | އާދީއްތަ 01:30އީރާނުގެ ރޫހާނީ ލީޑަރު އަވަހާރަކޮށްލުމާ ގުޅިގެން ހޮރްމޫޒް ކަނޑުއޮޅީގެ ކޮންޓްރޯލް އައި.އާރް.ޖީ.ސީ އިން ނަގާފައިވާތާ އަށް ދުވަސް ވެފައިވާއިރު، އެ ސަރަހައްދުން ދަތުރުކުރި "ޕްރައިމާ" ނަމަކަށް ކިޔާ ތެޔޮ ޓޭންކަރަކަށް ޑްރޯން ހަމަލާއެއް ދީފި. މި ހަމަލާ ދީފައިވަނީ އީރާނާ ދެކޮޅު ގައުމުތަކާ ގުޅުން އޮންނަ އުޅަނދުތައް އެ ސަރަހައްދުން ދަތުރުކުރުން މަނާކޮށްފައި ވަނިކޮށް، ދިން އިންޒާރުތަކަށް އެ އުޅަނދުން ބޯނުލެނބުމާ ގުޅިގެން. އެމެރިކާ އާއި އިޒްރޭލުގެ އުދުވާންތަކާ ގުޅިގެން މަސްރަހު ނުރައްކާތެރިވެފައިވާ މި ދަނޑިވަޅުގައި، އީރާނުން ދަނީ އެ ސަރަހައްދުގެ ސަލާމަތީ ކަންކަން ވަރުގަދަކުރަމުން.
ހޮރްމޫޒް ކަނޑުއޮޅިން ދަތުރުކުރަމުންދިޔަ "ޕްރައިމާ" ނަމަކަށް ކިޔާ ތެޔޮު ޓޭންކަރަކަށް، ހަމަލާދޭ ޑްރޯން ބޭނުންކޮށްގެން ހަމަލާއެއް ދީފައިވާ ކަމަށް އީރާނުގެ އިސްލާމިކް ރިވޮލިއުޝަނަރީ ގާޑް ކޯޕްސް (އައި.އާރު.ޖީ.ސީ) ގެ ޕްރެސް ސާވިސްއިން ރިޕޯޓްކޮށްފި. | އެކްސް
ހޮރްމޫޒް ކަނޑުއޮޅީގެ ސަލާމަތީ ކަންކަން ހުރިގޮތުން އެ ސަރަހައްދުން ދަތުރުކުރުން ރައްކާތެރި ނޫންކަމަށް ބުނެ އިސްލާމިކް ރިވޮލިއުޝަނަރީ ގާޑް ކޯޕްސް (އައި.އާރް.ޖީ.ސީ) ގެ ނޭވީން ދިން އިންޒާރުތަކަށް ފަރުވާލެއް ނުބަހައްޓައި ދަތުރުކުރި ތެޔޮ ޓޭންކަރަކަށް، ހޮނިހިރު ދުވަހުގެ ހެނދުނުގެ ވަގުތެއްގައި "ސުއިސައިޑް ޑްރޯން" ހަމަލާއެއް ދީފިއެވެ.
އައި.އާރް.ޖީ.ސީ ގެ ޕަބްލިކް ރިލޭޝަންސް އޮފީހުން މާރިޗު މަހުގެ 7 ވަނަ ދުވަހު ހާމަކުރި ގޮތުގައި، "ޕްރައިމާ" ނަމަކަށް ކިޔާ މި ތެޔޮ ޓޭންކަރަށް ޑްރޯން ހަމަލާ ދީފައިވަނީ، ހޮރްމޫޒް ކަނޑުއޮޅިން ދަތުރުކުރުން މަނާކޮށް، އެ ސަރަހައްދުގެ މަސްރަހު ނުރައްކާތެރި ފައްތަރެއްގައި އޮތްކަމަށް ބުނެ އައި.އާރް.ޖީ.ސީ ނޭވީން ތަކުރާރުކޮށް ދެމުންދިޔަ އިންޒާރުތަކަށް އެ އުޅަނދުން ބޯނުލެނބުމާ ގުޅިގެން ކަމަށް އީރާނުން ބުނެއެވެ.
ސްޓްރެޓެޖިކް ގޮތުން މުހިންމު ހޮރްމޫޒް ކަނޑުއޮޅީގެ ކޮންޓްރޯލް އައި.އާރް.ޖީ.ސީ އިން ނަގާފައިވާތާ ހަފްތާއެއް ފާއިތުވެގެން ހިނގައްޖެ އެވެ. މި ފިޔަވަޅު އަޅާފައިވަނީ އެމެރިކާއިން އީރާނާ ދެކޮޅަށް ހިންގަމުންދާ އަސްކަރީ އުދުވާންތަކާއި، ފެބްރުއަރީ 28 ވަނަ ދުވަހު ތެހެރާނަށް އެމެރިކާ އާއި އިޒްރޭލު ގުޅިގެން ދިން ޓެރަރިސްޓް ހަމަލާއެއްގައި އިސްލާމީ އިންގިލާބުގެ ލީޑަރު އާޔަތުﷲ ސައްޔިދު އަލީ ޚާމަނޭއީ ޝަހީދުކޮށްލުމާ ގުޅިގެންނެވެ.
ޕާޝިއަން ގަލްފަށް އެމެރިކާގެ އަސްކަރީ ބާރުތައް ޖަމާކޮށް، އެއްވެސް ކަމަކާ ނުލައި އީރާނަށް ހަމަލާދޭން ފެށުމާ ގުޅިގެން، އީރާނާ ދެކޮޅު ގައުމުތަކާ ގުޅުން އޮންނަ ތެޔޮ ޓޭންކަރުތަކާއި ވިޔަފާރި އުޅަނދުފަހަރު ހޮރްމޫޒް ކަނޑުއޮޅިން ދަތުރުކުރުން މިހާރު ވަނީ މަނާކޮށްފައެވެ.
