ފެންނަ ނުފެންނަ ވޯޓު ސަރުކާރަށް ކާމިޔާބުވެއްޖެނަމަ މިނިވަން އިންތިޚާބެއް ބޭއްވޭނެ ކަމުގެ ޔަގީންކަމެއް ނެތް: އަލީ ހުސައިން

ދެ އިންތިހާބު އެއްކޮށްލުމަށް ނަގާ ވޯޓަކީ ހަމައެކަނި ފެށުމެއް ކަމަށާއި، އެ ވޯޓު ސަރުކާރަށް ކާމިޔާބުވެއްޖެ ނަމަ، މިނިވަން އަދި ދެފުށްފެންނަ އިތުރު އިންތިޚާބެއް ބާއްވާނެ ކަމުގެ ޔަގީންކަމެއް ނެތް ކަމަށް ގާނޫނީ ވަކީލު އަލީ ހުސައިން ވިދާޅުވެއްޖެ އެވެ.

 "ދެ އިންތިޚާބު އެއްކުރަން ނުފެނޭ" ނަމުގައި އާދިއްތަ ދުވަހު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން އަލީ ހުސައިން ވިދާޅުވީ ދިވެހިރާއްޖޭގެ ޖުމްހޫރިއްޔާގެ ގާނޫނުއަސާސީއަށް އިސްލާހު ގެނައުމަށްޓަކައި ރައްޔިތުންގެ މެދުގައި ނަގަން އުޅޭ ފެންނަ ނުފެންނަ ވޯޓަކީ މުޅި ދައުލަތުގެ ނިޒާމު ގަޑުބަޑުކޮށްލުމަށް ކުރާ ކަމެ ކަމަށެވެ. އޭނާ ވިދާޅުވީ މި ވޯޓު ސަރުކާރަށް ކާމިޔާބުވެއްޖެ ނަމަ، ކުރިއަށް އޮތް ތަނުގައި ރާއްޖޭގައި މިނިވަން އަދި އިންސާފުވެރި އިންތިޚާބެއް ބޭއްވޭނެ ކަމުގެ އެއްވެސް ޔަގީންކަމެއް ނެތް ކަމަށެވެ.

އަލީ ހުސައިން ވިދާޅުވީ ރައީސުލްޖުމްހޫރިއްޔާ ވަކި ބިލެއް ތަސްދީގު ކުރައްވާނެތޯ ނުވަތަ ނޫންތޯ އެއީ ރައްޔިތުންގެ ގާތުގައި އަހަންޖެހޭ ސުވާލެއް ނޫން ކަމަށެވެ. އެއީ ގާނޫނުއަސާސީން ރައީސަށް ދީފައިވާ އިޚުތިޔާރީ ބާރެއް ނުވަތަ ޑިސްކްރިޝަނަރީ ޕަވަރއެއް ކަމަށާއި، އެ ބާރު ބޭނުންކުރައްވާނެ ގޮތް އެނގިވަޑައިގަންނަވާނީ ހަމައެކަނި ރައީސަށް ކަމަށް އޭނާ ފާހަގަކުރެއްވި އެވެ. ރައްޔިތުންގެ ގާތުގައި އަހަންޖެހޭނެ ހަގީގީ ސުވާލަކީ ރައްޔިތުންގެ މަޖިލީހުގެ ދައުރު ކުރުކުރަން ފެނޭތޯ ނުވަތަ ނޫންތޯ ކަމަށް ވާއިރު، މިހާރު ފަރުމާކޮށްފައިވާ ސުވާލަކީ ގާނޫނުއަސާސީގެ ތަރަހައިން ބޭރުން ކޮށްފައިވާ ގޯސް ސުވާލެއް ކަމަށް އޭނާ ވިދާޅުވި އެވެ.

ޤާނޫނުއަސާސީގެ އެންމެ އަސާސީ ސިފައަކީ އިނގޭތޯ، ސެޕަރޭޝަން އޮފް ޕަވަރ، އިސް ތިން ބާރު ވަކިވެގެން ވުން. އަދި ރިޔާސީ ނިޒާމަކަށް ރައްޔިތުން ވޯޓުދިނީވެސް ތިން ބާރު ވަކިކޮށްފައި ބާއްވަންވެގެން. އެހެންނަމަވެސް، ތިން ބާރު ވަކިވާއިރުގައި، ދެ ބާރުގެ މީހުން، ރައީސުލްޖުމްހޫރިއްޔާއާއި ރައްޔިތުންގެ މަޖިލީހުގެ ނިސްބަތް ހޮވަން ބޭނުންވާ މީހުން އަތުގުޅައިގެންގޮސް، އެކީއެކައްޗަކަށް އަތުގުޅައިގެންގޮސްފައި ހޮވުނީމާ، ދެން ކިހިނެއްތޯ އަޅުގަނޑުމެން ދައުލަތުގެ ވެރިންނާ ސަރުކާރު ޖަވާބުދާރީނުކުރެވޭ ކަމަށް ވާނަމަ، ކިހިނެއްތޯ އަޅުގަނޑުމެންނަށް ހޯދޭނީ؟ އެ ދައުލަތުގެ ފައިސާއާއި ވަސީލަތްތައް ރައީސުލްޖުމްހޫރިއްޔާ ބޭނުންކުރަނީ ކިހިނަކުންތޯ ކޮންގޮތަކަށްތޯ؟ އަޅުގަނޑުމެން ހޯދޭނެ އެއްވެސް ގޮތެއް ނޯންނާނެ.

ގާނޫނީ ވަކީލު އަލީ ހުސައިން

މީގެ އިތުރުން، މިހާރުވެސް ރައްޔިތުންނާ ގުޅުންހުރި އެތައް މައްސަލައެއް ސުޕްރީމް ކޯޓުގައި ނުނިމި "ޕާކުކޮށްފައި" ހުރިކަން އަލީ ހުސައިން ފާހަގަކުރެއްވި އެވެ. އޭގެ ތެރޭގައި މަޖިލިސް މެންބަރުންގެ ގޮނޑި ގެއްލޭ މައްސަލަތައް ހިމެނޭއިރު، އިލެކްޝަންސް ކޮމިޝަނަކީ ސީދާ ރައީސުލްޖުމްހޫރިއްޔާގެ މުށުތެރޭގައި އޮތް ތަނެއްގެ ގޮތުގައި އޭނާ ސިފަކުރެއްވި އެވެ. އެހެންކަމުން، މިހާރުވެސް ރާއްޖޭގައި މިނިވަން އިންތިޚާބެއް ބޭއްވޭނެ މާހައުލެއް ނެތް ކަމަށް އޭނާ ވިދާޅުވި އެވެ.

އަމުދުން މި އިންތިޚާބު، މި ރިފަރެންޑަމް ކާމިޔާބުކޮށްފިއްޔާ ދެން އަންނާނީ ހަމަ އެއްކަލަ ލޯކަލް ކައުންސިލުތަކާ ބާއްވާހެން ނުވަތަ ރައްޔިތުންގެ މަޖިލީހުގެ އިންތިޚާބު ބާއްވާހެން އެންމެ ގިނަ ވޯޓު ލިބޭ މީހާއަށް ހޮވެނީއޭ. އެހެންވީމާ، އެއާއެކީގައި ރައީސުލްޖުމްހޫރިއްޔާ ރައްޔިތުންގެ މަޖިލީހުގެ ސުޕަރ މެޖޯރިޓީއާ އެކީގައި ނުކުމެ ދައުލަތުގައި ހުރިހާ ވަސީލަތްތަކާއި، ފައިސާއާއި، މުދަލާއި، މީޑިއާއާ އިނގޭތޯ. ވަޒީފާއާއި، ޕްރޮޖެކްޓްތަކާއި ހުރިހާ އެއްޗެއް އެކަނި ނުކުމެ، އަދި ސުޕްރީމް ކޯޓުން ބޭނުންވެއްޖެއްޔާ ނިންމަންވެސް ނިންމާނީ ޑރ. މުއިއްޒު މޮޅުވިއްޔޭ ނިންމާ ހިސާބަށް ދާނީ އިނގޭތޯ.

ގާނޫނީ ވަކީލު އަލީ ހުސައިން

އަލީ ހުސައިން އިތުރަށް ވިދާޅުވީ، ސުޕްރީމް ކޯޓުންވެސް ނިންމުންތައް ނިންމާނީ ސަރުކާރު ބޭނުންވާ ގޮތަށް ކަމަށް ވުމުގެ ބިރު އެބައޮތް ކަމަށެވެ. މުޅި ގާނޫނުއަސާސީ ގަޑުބަޑުވާ ފަދަ ކަންކަން ކުރަން އުޅޭއިރު، މިއީ ނިޒާމީ ގޮތުން ގައުމު ނުރައްކަލަކަށް ވައްޓާލުން ކަމަށް ވިދާޅުވެ އޭނާ ކަންބޮޑުވުން ފާޅުކުރެއްވި އެވެ.