ނިޔާޒް: އިންތިހާބުގެ ހަރަދަކީ އިސްރާފެއް ނޫން، އަސާސީ ހަރަދެއް.
އިންތިޚާބުތައް އެއްކޮށްލުމަށް ސަރުކާރުން ކުރާ މަސައްކަތަކީ ހީލަތްތެރި ރޭވުމެއް ކަމަށް ތުހުމަތުކޮށް، އެކަމާ ދެކޮޅަށް ވޯޓު ދިނުމަށް އެމްޑީޕީ އިން ރައްޔިތުންނަށް ގޮވާލައިފި. އެ ޕާޓީން ބޭއްވި ޖަލްސާއެއްގައި ވާހަކަދައްކަވަމުން އިސް ބޭފުޅުން ވިދާޅުވީ، މިއީ ސަރުކާރުގެ ސިޔާސަތުތަކަށް ނޫނެކޭ ބުނަންވީ ވަގުތު ކަމަށާއި، ގާނޫނަށް ބަދަލު ގެނެސްގެން ހުދުމުހުތާރު ވެރިކަމެއް ގާއިމުކުރުމަށް ފުރުސަތު ނުދިނުމަށް އިލްތިމާސްކުރާ ކަމަށް.
އެމްޑީޕީގެ ކުރީގެ ޑެޕިއުޓީ ޗެއަރޕާސަން އަލީ ނިޔާޒް ބުދަ ދުވަހު އެމްޑީޕީ އިން ބޭއްވި ޕިކަޕް ޖަލްސާ ގައި ވާހަކަ ދައްކަވަނީ | ރާއްޖެ އެމްވީ
އިންތިހާބުތަކަށް ހިނގާ ހަރަދުތަކަކީ ދައުލަތުން ކޮންމެހެން ކުރަންޖެހޭ، އަސާސީ ހަރަދުތަކެއް ކަމަށާއި، އެއީ އިސްރާފެއް ނުވަތަ ދައުލަތަށް އޮތް މާލީ ބުރައެއް ނޫން ކަމަށް އިދިކޮޅު އެމްޑީޕީގެ ކުރީގެ ޑެޕިއުޓީ ޗެއަރޕާސަން އަލީ ނިޔާޒް ވިދާޅުވެއްޖެ އެވެ.
ބުދަ ދުވަހުގެ ހަވީރު މައްޗަންގޮޅި ބުރު ސަރަހައްދުގައި އެމްޑީޕީ އިން ބޭއްވި ޕިކަޕް ޖަލްސާގައި ވާހަކަދައްކަވަމުން އަލީ ނިޔާޒް ވިދާޅުވީ، ކޮންމެ ދައުލަތެއްގައި ވެސް އަސާސީ ގޮތުން ކޮންމެހެން ކުރަންޖެހޭ ހާއްސަ ހަރަދުތަކެއް ހުންނާނެ ކަމަށެވެ. އެގޮތުން ކަންކަމާ މެދު ރައްޔިތުން ދެކޭ ގޮތް ހޯދުމަށާއި، ޑިމޮކްރެޓިކް ނިޒާމެއްގެ ތެރެއިން ބާއްވާ އިންތިހާބުތަކަކީ އެފަދަ މުހިންމު އަސާސީ ހަރަދެއް ކަމަށާއި، އެއްވެސް ހާލެއްގައި އެއީ ބޭކާރު ހަރަދެއްގެ ގޮތުގައި ސިފަނުކުރެވޭނެ ކަމަށް އޭނާ ވިދާޅުވި އެވެ.
ގައުމެއް ނުވަތަ ދައުލަތަކުން، ކޮންމެހެން ކުރަން ޖެހޭ އަސާސީ ހަރަދު ތަކެއް ހުންނާނެ. އެ އިން ހަރަދެއް އެއީ ރައްޔިތުންގެ ހިޔާލު ހޯދުމަށްޓަކައި ރައްޔިތުންގެ ގާތަށް ގޮސް އެމީހުންގެ ކަންތައްތަކާމެދު ދެކޭގޮތް ދެނެގަތުމަށްޓަކައި ދައުލަތުން ކުރާ ހަރަދު. އެއީ އިސްރާފެއް ނޫން. އެއީ ބޮޑު އަދަދެއް ނޫން. އެއީ ކޮންމެހެން ކުރަން ޖެހޭ ހަރަދެއް.އެމްޑީޕީގެ ކުރީގެ ޑެޕިއުޓީ ޗެއަރޕާސަން އަލީ ނިޔާޒް
ނިޔާޒްގެ ވާހަކަފުޅުގައި، ދެ އިންތިހާބު އެއްކޮށްލުމަށްޓަކައި ރައީސުލްޖުމްހޫރިއްޔާ ޑރ. މުހައްމަދު މުއިއްޒު މަސައްކަތް ކުރައްވަނީ ހީލަތްތެރި ރޭވުމެއްގެ ދަށުން ކަމަށް ތުހުމަތު ކުރެއް ވިއެވެ. އަދި މިކަމާ ގުޅިގެން ނަގާ ވޯޓުގައި ހުރިހާ ރައްޔިތުން ވެސް "ނޫނެކޭ" ބުނުމަށް އޭނާ ވަނީ ގޮވާލައްވާފަ އެވެ. މިއީ މި ސަރުކާރުގެ ސިޔާސަތުތަކަށް ރައްޔިތުން ބޮޑުކޮށް ނޫނެކޭ ބުނަންވީ ވަގުތު ކަމަށާއި، ދައުރުގެ މެދުތެރެއިން އަންނަ މި އިންތިހާބުގައި ރައީސް މުއިއްޒަށް ރައްޔިތުންގެ ނުރުހުން އޮތްކަން ހާމަކުރަންޖެހޭ ކަމަށް ވެސް ނިޔާޒް ވިދާޅުވި އެވެ.
މި ޖަލްސާގައި ވާހަކަދެއްކެވި އެމްޑީޕީގެ އެހެން ބޭފުޅުން ވެސް ވަނީ ސަރުކާރުގެ ސިޔާސަތުތަކަށް ވަރަށް ބޮޑަށް ފާޑުވިދާޅުވެފަ އެވެ. އެ ބޭފުޅުން ތުހުމަތު ކުރެއްވި ގޮތުގައި، ގާނޫނުތަކަށް ބަދަލު ގެނެސްގެން ރައީސް މުއިއްޒު މި އުޅުއްވަނީ ރާއްޖޭގައި ދިގު ޒަމާންތަކަކަށް ދެމިގެންދާނެ ހުދުމުހުތާރު ވެރިކަމެއް ގާއިމު ކުރެއްވުމަށެވެ. މިއީ އެ މަގަށް އެޅުއްވި މުހިންމު ފިޔަވަޅެއް ކަމަށް ވެސް އެ ބޭފުޅުން ސިފަކުރެއްވި އެވެ.
މީގެ އިތުރުން، ގައުމުގެ ހާލަތު އަނެއްކާ ވެސް 25 ވަރަކަށް އަހަރު ފަހަތަށް ސޮއްސައިގެން ދިޔަ ނުދިނުމަށްޓަކައި، ކުރިއަށް އޮތް އޭޕްރީލް މަހުގެ 4 ވަނަ ދުވަހު ބާއްވާ އިންތިހާބުތަކުގައި ރައީސް މުއިއްޒަށް ބޮޑުތަނުން ނޫނެކޭ ބުނުމަށް އެމްޑީޕީގެ އިސް ބޭފުޅުން ވަނީ ދިވެހި ރައްޔިތުންނަށް އިލްތިމާސް ކުރައްވާފަ އެވެ. މި ޕިކަޕް ޖަލްސާއަކީ ކުރިއަށް އޮތް އިންތިހާބުތަކަށް އަމާޒުކޮށްގެން، ރައްޔިތުން ހޭލުންތެރިކުރުވުމަށް އެމްޑީޕީ އިން ކުރިއަށްގެންދާ ހަރަކާތްތަކުގެ ތެރެއިން ބޭއްވި ޖަލްސާއެކެވެ.
