ސަރުކާރު ޗުއްޓީއަށް ދިއުމުގެ ކުރިން ރޯދަ މަހު ބޭއްވި ފުރަތަމަ މަޖިލީހުގެ ޖަލްސާ: ރައްޔިތުންނަށް އޮޅުވާލަން ކުރިކަމެއްތަ؟

ދިވެހިރާއްޖޭގެ ހާލަތު އެންމެ ބޮޑަށް އެނގޭނެ ސާފުކޮށްދޭނެ އެއް އިދާރާއަކީ ރައްޔިތުންގެ މަޖިލީހެވެ. މަޖިލީހުގެ މަސައްކަތްތައް ކުރިއަށްދާ ގޮތުން އެގައުމުގެ މަސައްކަތްތައް ހުރިނެތް ގޮތާއި، ސަރުކާރުގެ ހާލަތު ވަރަށް ސާފުކޮށް ވަޒަން ކުރެވޭނެ އެވެ. އަދި ޚާއްސަކޮށް 20 ވަނަ ރައްޔިތުންގެ މަޖިލީހުން ސަރުކާރުގެ ހާލަތު އެނގޭނެ އެވެ. އެއީ ސަރުކާރުގެ މެޖޯރިޓީ އޮތް ރައްޔިތުންގެ މަޖިލީހުގެ ސަރުކާރުގެ މެންބަރުން ހަމައެކަނި ކުރައްވާ މަސައްކަތަކީ ރައީސް ޑރ.މުހައްމަދު މުއިއްޒު ވިދާޅުވުމުން، އެ ވިދާޅުވާ މަސައްކަތް އެކަނި ކަމަށްވާތީ އެވެ. ގައުމާއި، ރައްޔިތުންގެ ހައްގުގައި ބަސްބުނާ ސަރުކާރުގެ މެންބަރެއް މަޖިލީހުގައި ނެތޭ ބުންޏަސް ދޮގަކަށް ނުވާނެ އެވެ. 

ކަންމިހެން އޮތްއިރު، މިސަރުކާރާއި، މިސަރުކާރުގެ މެންބަރުންނަކީ ވަރަށް ބޮޑަށް ކަންކަން އޮޅުވާލުމަށް މަސައްކަތް ކުރާ ބޭފުޅުންގެ ގޮތުގައި ގިނަ ބަޔަކު ދަނީ ތަހުމަތު ވެސް ކުރަމުންނެވެ. އެކަން އާދިއްތަ ދުވަހު ބޭއްވި ރައްޔިތުންގެ މަޖިލީހުގެ ޖަލްސާއިން ވަނީ ފެނިގެން ގޮސްފަ އެވެ.

ގިނަ ދުވަސްތަކަކަށްފަހު 8 މަރޗް 2026 ވީ އާދިއްތަ ދުވަހު މަޖިލީހުގެ ޖަލްސާއެއް ބޭއްވިއިރު، އެންމެފަހުން ޖަލްސާއެއް ބާއްވާފައިވަނީ 17 ފެބްރުއަރީ 2026 ގަ އެވެ. މިދިޔަ ހުރިހާ ދުވަސްތަކެއްގައި އެއްވެސް ޖަލްސާއެއް ނުބާއްވާ މަޖިލިސް އޮތީ ޗުއްޓީއެއްގަ އެވެ. އަދި އާދިއްތަ ދުވަހު ކުއްލި އަކަށް ޖަލްސާއެއް ބޭއްވިއިރު، ޖަލްސާއިން ފެނިގެންދިޔައީ ޒުވާބު ކުރުމާއި ހަޅޭއްލެވުމާއި ހުތުރު މަންޒަރެވެ. އިދިކޮޅު މެންބަރުންނަށް ވާހަކަ ދެއްކެވުމުގެ ފުރުސަތު ވެސް ނުދެއްވި އެވެ.

މީގެ އިތުރުން އާއްމު ގޮތެއްގައި އާދިއްތަ ދުވަހަކީ މަޖިލީހުގެ ޖަލްސާތައް އެޖެންޑާ ކުރާ ދުވަހެއް ނޫނެވެ. މަޖިލީހުގެ ޖަލްސާތައް ކޮންމެ ދައުރަކަށް، ފެށުމަށް ފަހު އާއްމު ގޮތެއްގައި ޖަލްސާތައް ބާއްވަމުން ދަނީ ހޯމަ، އަންގާރަ، އަދި ބުދަ ދުވަހު އެވެ. 

އެހެންކަމުން އާދިއްތަ ދުވަހު މަޖިލީހުގެ ޖަލްސާ ބޭއްވި މަގުސަދާ މެދު ސުވާލު އުފެދެ އެވެ. 9 މަރޗް 2026 ވަނަ ދުވަހުން ފެށިގެން ސަރުކާރު ބަންދު ކޮށްފައިވާއިރު، ދެން ޖަލްސާއެއް އޮންނާނެ ދުވަހެއް ވެސް ނޭނގެ އެވެ. ނަމަވެސް އާދިއްތަ ދުވަހު ޖަލްސާއެއް ބޭއްވުމުން ރަމަޟާން މަސް ތެރޭގައި ވެސް ޖަލްސާއެއް ބޭއްވިކަން ރިކޯޑަށް ފެންނާން އޮންނާނެ އެވެ. 

20 ވަނަ މަޖިލީހުގެ މަސައްކަތްތައް މިހެން އޮތްއިރު، މިއާ ހިލާފަށް އެމްޑީޕީގެ މެޖޯރިޓީގައި 19 ވަނަ ރައްޔިތުންގެ މަޖިލީހުގައި މެންބަރުން ވަނީ ބުރަ މަސައްކަތްތައް ކޮށްފަ އެވެ. ރަމަޟާން މަސް ކަމުގައި ވިޔަސް ޖަލްސާތައް ކުރިއަށް ގެންދިޔަ އެވެ. ނަމަވެސް 20 ވަނަ މަޖިލީހުގައި މިދިޔަ ރަމަޟާން މަހުގެ ތެރޭގައި ވެސް ބާއްވާފައިވަނީ އެންމެ 8 ޖަލްސާ އެވެ. އަދި މި ރަމަޟާން މަހު ކުރިއަށް ގެންދިޔަ ފުރަތަމަ ޖަލްސާ ވެސް ނިންމާލިއިރު މަޖިލީހުގެ ޖަލްސާ ދެން ބާއްވާނެ ދުވަހެއް އިއުލާނެއް ނުކުރެ އެވެ. އަދި ގިނަ ދުވަސްތަކެއް މަޖިލީހުގެ ޖަލްސާ ނުބޭއްވި ސަބަބު ވެސް ހާމަކޮށްފައެއް ނުވެ އެވެ.

ކަންމިހެން އޮތް ނަމަވެސް ޚިދުމަތްތެރި ރައްޔިތުން މަޖިލީހުގެ ސަރުކާރުގެ މެންބަރުން ކުރިއަށް ލޯކަލް ކައުންސިލް އިންތިޚާބާ ގުޅިގެން ވަރަށް ފޯރީގައި ކެންޕޭންގެ އެކިއެކި ހަރަކާތްތަކުގައި އުޅުއްވާ މަންޒަރު ފެނެ އެވެ. މަޖިލީހުގެ މަސައްކަތްތައް ހުއްޓުމަކަށް ގެނައުމަށްފަހު މިހާރު މިބޭފުޅުން ކުރައްވާ މަސައްކަތްތަކީ ރައްޔިތުންނާއި ގައުމަށް ހެޔޮ އެދިގެން ކުރާ މަސައްކަތްތަކާ މެދު ސުވާލު އުފެދެ އެއްނުންތޯ އެވެ.