ރައީސް މުއިއްޒުގެ ކޮއްކޯފުޅު، މެންބަރު ސައުދާގެ އެކައުންޓަށް 2.4 މިލިއަން ރުފިޔާ ނަގުދު ފައިސާއިން ޖަމާކުރި މައްސަލައެއް ފެންމަތިވެއްޖެ
މެންބަރު ސައުދާގެ އެކައުންޓަށް 2.4 މިލިއަން ރުފިޔާ ޖަމާކުރި މައްސަލަ އެމްއެމްއޭގެ ފައިނޭންޝަލް އިންޓެލިޖެންސް ޔުނިޓުން ދަނީ ތަހުގީގު ކުރަމުން. މި ފައިސާއަކީ ވިޔަފާރިވެރިއެއްގެ އަތުން ނެގި ސްޓޫޑެންޓް ލޯނެއް ކަމަށް ސައުދާ ވިދާޅުވި ނަމަވެސް، އޭނާގެ މާލީ ބަޔާނާ މި މުއާމަލާތާ ދިމާނުވާތީ ގިނަ ބަޔަކު ދަނީ ކަންބޮޑުވުން ފާޅުކުރަމުން.
ރައީސް ޑރ. މުހައްމަދު މުއިއްޒުގެ އެއްބަނޑު ކޮއްކޮ އަދި ނިލަންދޫ ދާއިރާގެ މަޖިލިސް މެންބަރު ފާތިމަތު ސައުދާ. | ސޯޝަލް މީޑިއާ
ރައީސް ޑރ. މުހައްމަދު މުއިއްޒުގެ އެއްބަނޑު ކޮއްކޯފުޅު އަދި ނިލަންދޫ ދާއިރާގެ މަޖިލިސް މެންބަރު ފާތިމަތު ސައުދާގެ އެކައުންޓަށް 2.4 މިލިއަން ރުފިޔާ ނަގުދު ފައިސާއިން ޖަމާކުރި މައްސަލައެއް ފެންމަތިވެއްޖެ އެވެ.
ރާއްޖެއެމްވީއަށް މައުލޫމާތު ލިބޭ ގޮތުގައި، މި މައްސަލަ އެމްއެމްއޭގެ ސަމާލު ކަމަށް އައުމާއެކު، އެމްއެމްއޭގެ ފައިނޭންޝަލް އިންޓެލިޖެންސް ޔުނިޓުން ދަނީ އެމައްސަލަ ތަހުގީގު ކުރަމުންނެވެ.
މި މައްސަލައާ ގުޅިގެން ބައެއް މީޑިއާތަކަށް މެންބަރު ސައުދާ ވިދާޅުވީ އެއީ ވިޔަފާރިވެރިއެއްގެ އަތުން ނެގި ފައިސާ ކަމަށާއި، އެއީ ސްޓޫޑެންޓް ލޯނެއް ކަމަށެވެ. ނަމަވެސް އިތުރު އެއްވެސް ތަފްސީލެއް ދެއްވާފައިނުވެ އެވެ.
ކުރިއަށް އޮތީ ލޯކަލް ކައުންސިލް އިންތިޚާބު ކަމަށްވާއިރު، 2.4 މިލިއަން ރުފިޔާ ނަގުދު ފައިސާ އިން ހަވާލު ކުރުމުން އެކަމާ ގިނަ ބަޔަކު ދަނީ ސުވާލު އުފައްދަމުންނެވެ. އަދި މިފައިސާ 2.4 މިލިއަން ރުފިޔާ މެންބަރު ސައުދާގެ އެކައުންޓަށް ޖަމާކުރިކަން ކަށަވަރުވެފައިވާއިރު، ކަމާގުޅޭ އިދާރާތަކުން މިމައްސަލަ ސީރިއަސް މައްސަލައެއްގެ ގޮތުގައި ބަލައި، ތަހުގީގު ކުރުމަށް ގިނަ ބަޔަކު ގޮވާލާފައިވެ އެވެ.
ރައްޔިތުންގެ މަޖިލީހަށް ސައުދާ ހުށަހެޅި މާލީ ބަޔާނުން އެނގޭ ގޮތުގައި، އަހަރެއްގެ ތެރޭގައި 990،000 ރުފިޔާ އޭނާއަށް މުސާރައިގެ ގޮތުގައި ވަނީ ލިބިފަ އެވެ. އެކަމަކު މާލީ ބަޔާން ހުށަހެޅިއިރު އެކައުންޓުގައި ހުރީ އެންމެ 78،000 ރުފިޔާ އެވެ.
