އިންތިޚާބުތައް އެއްކޮށްލުމަކީ އަސާސީ ހައްގުތަކާއި މިނިވަންކަން އެތައް ތަނެއް ފަހަތަށް ޖައްސާލަން ސަރުކާރަށް ލިބޭނެ ފުރުސަތެއް: ރީކޯ މޫސަ
މި ސަރުކާރުން ޚިޔާލު ފާޅުކުރުމުގެ މިނިވަންކަން ހަނިކޮށް، ރައްޔިތުންގެ ބާރު ކަނޑުވާލުމަށް މަސައްކަތް ކުރަމުންދާ ކަމަށް އެމްޑީޕީގެ ކުރީގެ ޗެއަރޕަރސަން މޫސާ މަނިކު ތުހުމަތު ކުރައްވާފައިވޭ.
މަޖިލީހުގެ ކުރީގެ ރައީސް މޫސާ މަނިކް | ރާއްޖެ އެމްވީ
އިންތިޚާބުތައް އެއްކޮށްލުމަކީ އަސާސީ ހައްގުތަކާއި މިނިވަންކަން އެތައް ތަނެއް ފަހަތަށް ޖައްސާލަން ސަރުކާރަށް ލިބޭނެ ފުރުސަތެއް ކަމަށް މަޖިލީހުގެ ކުރީގެ ނައިބު ރައީސް އަދި އެމްޑީޕީގެ ކުރީގެ ޗެއަރޕަރސަން މޫސާ މަނިކް (ރީކޯ މޫސާ) ވިދާޅުވެއްޖެ އެވެ.
މޫސަ އެފަދައިން ވިދާޅުވީ އެމްޑީޕީ އިން ހުކުރު ދުވަހު ބޭއްވި ހަރަކާތެއްގައި ވާހަކަދައްކަވަމުންނެވެ.
ރިޔާސީ އިންތިޚާބާއި ރައްޔިތުންގެ މަޖިލީހުގެ އިންތިޚާބު އެއްކޮށްލުމަށް ފެންނަ ނުފެންނަ ވޯޓެއް ނެގުމަށް ފަހު އެއާއި ވިދިގެން ވެރިކަމުގެ ދައުރު ދިގު ދަންމާލަން މި ސަރުކާރުން މަސައްކަތް ކުރާނެ ކަމަށް އޭނާ ވަނީ ތުހުމަތުކުރައްވާފަ އެވެ. މީގެ އިތުރުން ދެ އިންތިޚާބު އެއްކޮށްލުމަށް ފަހު 2028ގައި ރިޔާސީ އިންތިޚާބާއި މަޖިލިސް އިންތިޚާބު ބާއްވާ ނަމަ މިހާރު ތިބި މަޖިލިސް މެމްބަރުންގެ ދައުރު ކުރުވާ ކަމަށާއި އެއީ ބަލައިގަނެވޭ ކަމެއް ނޫން ކަމަށް މޫސަ ވިދާޅުވި އެވެ. މަޖިލީހުގެ މެމްބަރުންގެ ގޮނޑި އާއި ގުޅުން ހުރި މައްސަލަ އެއް މިހާރު ވެސް ސުޕްރީމް ކޯޓުގައި އެބަ އޮތް ކަމަށާއި، އެފަދަ މައްސަލަ އެއް ކުރިއަށް ދަނިކޮށް ޤާނޫނުއަސާސީ އަށް އިތުރު ބަދަލެއް ގެނެސްގެން ނުވާނެ ކަމަށް ވެސް މޫސަ ވަނީ ވިދާޅުވެފަ އެވެ.
"މި ވޯޓު ބާތިލް ކުރުމަކީ އެންމެ މުހިންމު ކަންތައް. ނުފެންނަ ކަމަށް ވޯޓު ލާން ޖެހޭ." މޫސަ ވިދާޅުވި އެވެ.
މި ސަރުކާރު އައި ފަހުން ޚިޔާލު ފާޅުކުރުމުގެ މިނިވަންކަން ހަނި ކޮށްފައިވާ ކަމަށާއި އެކަން ކޮށްފައި ވަނީ ރައްޔިތުންގެ ފެންނަ ނުފެންނަ ވޯޓަކަށް ވެސް ދިއުމެއް ނެތި ކަމަށް އޭނާ ވިދާޅުވި އެވެ. މީގެ އިތުރުން ޕާޓީ އިން ބުނާހާ ގޮތަކަށް ކަންކަން ނުކޮށްފި ނަމަ މަޖިލީހުގެ މެމްބަރުންގެ ގޮނޑި ގެއްލޭ ގޮތަށް މި ސަރުކާރުން ނިންމީ އާއްމުންގެ ބާރު ކަނޑުވާލުމަށް ކަމަށް މޫސަ ވަނީ ވިދާޅުވެފަ އެވެ.
