ސްޕެއިންގެ ބޮޑު ވަޒީރު ހުންނެވީ ގޮތުގައި، ވިދާޅުވީ އެމެރިކާ އާއި އިޒްރޭލް އިން ހަދަނީ ބޮޑު ގޯހެއް ކަމަށް

އީރާންއާ ދެކޮޅަށް އެމެރިކާ އިން ދެމުން އަންނަ ހަމަލާ ތަކުގައި ސްޕެއިންގައި ހުންނަ އެމެރިކާގެ އަސްކަރީ މަރުކަޒުތައް ބޭނުން ކުރުމާ މެދު ދެ ޤައުމުގައި ދެ މެދުގައި ނުތަނަވަސް ކަމެއް އުފެދިފައި އޮތް ނަަމަވެސް، ސްޕެއިންގެ ބޮޑު ވަޒީރު ޕެޑްރޯ ސަންޗޭޒް ގޮތުގައި ހިފަހައްޓަވައިފި އެވެ.

ސްޕެއިންގެ ދެކުނުގައި އޮންނަ ހުއެލްވާގައި ޕޯޗުގަލްގެ ބޮޑު ވަޒީރު ލުއިސް މޮންޓެނީގްރޯ އާއެކު ބޭއްވި ނޫސްވެރިންގެ ބައްދަލުވުމުގައި ސްޕެއިންގެ ބޮޑު ވަޒީރު ސަންޗޭޒް ވިދާޅުވީ، ދެ ޤަައުމުގެ ދެ މެދުގައި އޮތް ގުޅުން ބިނާ ވާން ޖެހޭނީ އިޙުތިރާމް އާއި، އިޚުލާސްތެރި އެއްބާރުލުމުގެ ރޫޙެއްގެ މައްޗަށް ކަމަށެވެ. އަދި އެ ގުޅުމަކީ ހަމަހަމަ ފުރުސަތެއްގެ މައްޗަށް ބިނާވެފައިވާ ގުޅުމަކަށް ވާން ޖެހޭނެ ކަމަށް ވެސް އޭނާ ފާހަގަ ކުރެއްވި އެވެ. 

އެމެރިކާާ އާއި އިޒްރޭލް އިން އީރާން އަށް ދެމުންދާ ހަމަލާތަކަށް ފާޑު ވިދާޅުވަމުން ސަންޗޭޒް ވިދާޅުވީ، އެއީ ހެދޭ ވަރަށް ބޮޑު ގޯހެއް ކަމަށެވެ. އަދި އެ އަމަލު ތަކަކީ ބައިނަލްއަޤުވާމީ ޤާނޫނުތަކާ ޚިލާފު އަމަލު ތަކެއް ކަމަށް ވެސް ސަންޗޭޒް ވިދާޅުވި އެވެ. އެކުވެރި ޤައުމު ތަކުގެ މެދުގައި އޮންނަ ގުޅުމުގައި، އަނެއް ޤައުމުން ކުރާ ރަނގަޅު ކަންކަމަށް އެހީތެރިވުމަކީ މުހިންމު ކަމަކަށް ވިޔަސް، ގޯސްކޮށް ކަމެއް ކުރާ ނަމަ އެކަން ބުނެދިނުމަކީ ވެސް ކުރަން ޖެހޭ ކަމެއް ކަމަށް ބޮޑު ވަޒީރު ސަންޗޭޒް ވިދާޅުވި އެވެ. 

އަަސްކަރީ މަރުކަޒުތައް ބޭނުން ކުރުމުގެ ހުއްދަ ނުދޭން ސްޕެއިން އިން ނިންމުމާ އެކު، އެމެރިކާގެ ރައީސް ޑޮނަލްޑް ޓްރަމްޕް ވަނީ އެ ޤައުމަށް ވަރަށް ބޮޑަށް ފާޑު ވިދާޅުވެފަ އެވެ. ޓްރަމްޕް ވިދާޅުވީ ސްޕެއިން އަކީ ވަރަށް ގޯސް އެކުވެރިއެއް ކަމަށެވެ. އަދި އެ ޤައުމާ އެކު އޮންނަ ހުރިހާ ގުޅުމެއް ކަނޑާލާނެ ކަމުގެ އިންޒާރު ވެސް ޓްރަމްޕް ދެއްވާފައިވެ އެވެ. މީގެ އިތުރުން ޓްރަމްޕް ވިދާޅުވެފައި ވަނީ، ސްޕެއިން އަކީ ވަރަށް ބަލިކަށި ޤައުމެއް ކަމަށެވެ. 

ޓްރަމްޕްގެ އެ ފާޑު ކިޔުން ތަކަށް ރައްދު ދެއްވަމުން ސަންޗޭޒް ވަނީ، އީރާންއާ ދެކޮޅަށް ކުރާ ހަނގުރާމައާ ދެކޮޅުކަން ތަކުރާރު ކުރައްވައިފަ އެވެ. އަދި އީރާން އަށް ހަަމަލާ ދިނުމަށްޓަކައި ސްޕެއިންގެ ދެކުނުގައި ހުންނަ އެމެރިކާގެ އަސްކަރީ މަރުކަޒުތައް ބޭނުން ކުރުމުގެ ހުއްދަ ނުދެއްވާނެ ކަމަށް ވެސް އޭނާ ވިދާޅުވި އެވެ. 

އެމެރިކާ އާއި ސްޕެއިންއާ ދެމެދު ނުތަނަވަސް ކަމެއް އުފެދިފައި އޮތް ނަމަވެސް، ސަންޗޭޒް ވިދާޅުވީ އެމެރިކާގެ ރައީސް ޓްރަމްޕް އަށް ވަރަށް ބޮޑު އިޙުތިރާމެއް އޮންނަ ކަމަށެވެ.