ޕުޓިންގެ ފޯނު ކޯލެއް އީރާނުގެ ރައީސް ޕެޒެޝްކިއާން އަށް، ވިދާޅުވީ ޚާމާނައީ އަވަހާރަ ކޮށްލުމަކީ ހިތާމައެއް ކަމަށް

އެމެރިކާ އާއި އިޒްރޭލުން އީރާނާ ދެކޮޅަށް ހަމަލާ ދޭން ފަށައި މެދު އިރުމަތީގެ މަސްރަހު ނުތަނަވަސްވެފައިވާ ވަގުތެއްގައި، ރަޝިޔާގެ ރައީސް ވްލަޑިމިއަރ ޕުޓިން، އީރާންގެ ރައީސް މަސްއޫދު ޕެޒެޝްކިއާން އަށް ގުޅުއްވައިފި އެވެ. 

ރަޝިޔާގެ ރިޔާސީ ގަނޑުވަރު، ކްރެމްލިން އިން ނެރެފައިވާ ބަޔާނެއްގައި ބުނެފައި ވަނީ، ޕެޒެޝްކިއާން އަށް ގުޅުއްވައި ވަގުތުން ހަނގުރާމަ ހުއްޓާލުމަށް ޕުޓިން ގޮވާލައްވާފައިވާ ކަމަށެވެ. އަދި އެމެރިކާ އާއި އިޒްރޭލްގެ ހަމަލާ ތަކުގައި އީރާންގެ އެންމެ މަތީ ވެރިޔާާ، އަދި ރޫހާނީ ލީޑަރު އާޔަތުﷲ އަލީ ޚާމަނާއީ އަވަހާރަ ކޮށްލުމަކީ ހިތާމަ ކުރައްވާ ކަމެއް ކަމަށް ވިދާޅުވެ، ޕުޓިން ވަނީ އަނެއްކާ ވެސް ތައުޒިޔާ ވިދާޅުވެފަ އެވެ. މީގެ ކުރިން ވެސް ޕުޓިން ވަނީ، އީރާނަށް ތައުޒިޔާގެ މެސެޖެއް ފޮނުއްވައިފަ އެވެ. 

ކްރެމްލިން އިން ބުނެފައި ވަނީ، ހަނގުރާމައިގެ އެންމެހާ އަމަލުތައް ވަގުތުން ހުއްޓާލުމަށް ރަޝިޔާ އިން ގެންގުޅޭ ސާބިތު ސިޔާސަތު ޕުޓިން އަލުން ތަކުރާރު ކުރެއްވި ކަމަށެވެ. އަދި އީރާނާއި، މުޅި މެދު އިރުމަތީގައި ހުރި މައްސަލަތައް ހައްލު ކުރުމަށް ބާރުގެ ބޭނުން ކުރުން ދޫކޮށްލައި، ސިޔާސީ އަދި ޑިޕްލޮމެޓިކް މަގުން މައްސަލަތައް ޙައްލު ކުރުމަށް ޕުޓިން ގޮވާލައްވާފައިވާ ކަމަށް ފާހަގަ ކޮށްފައިވެ އެވެ.

މީގެ އިތުރުން ކެރެމްލިން އިން ބުނެފައި ވަނީ ގަލްފު ކޯޕަރޭޝަން ކައުންސިލް (ޖީސީސީ)ގެ ޤައުމު ތަކުގެ ލީޑަރުންނާ ވެސް ޕުޓިން ޤަވާއިދުން މުއާލަމާތު ކުރައްވައި، މަޝްވަރާ ކުރައްވަމުން ގެންދަވާ ކަމަށެވެ. 

ޕުޓިން އާއެކު ކުރެއްވި ފޯނު ކޯލުގައި އީރާންގެ ރައީސް ޕެޒެޝްކިއާން ވަނީ، އީރާންގެ މިނިވަންކަމާއި ސިޔާދަތު ދިފާއު ކުރުމުގައި ރަޝިޔާ އިން ދައްކުވައިދޭ އެއްބައިވަންތަ ކަމަށްޓަކައި ޕުޓިން އަށް ޝުކުރު އަދާ ކުރައްވައިފަ އެވެ. އަދި ސަރަހައްދީ މަސްރަހު ގޯސްވަމުންދާ ގޮތުގެ ތަފްސީލީ މައުލޫމާތު ޕެޒެޝްކިއާން ވަނީ، ރަޝިޔާގެ ރައީސް ޕުޓިންއާ ހިއްސާ ކުރައްވައިފަ އެވެ. 

ރަޝިޔާ އާއި އީރާނަކީ ގާތް ގުޅުމެއް އޮންނަ ޤައުމަކަށް ވާއިރު، މަސްރަހު ފިނި ކުރުމަށް ޕުޓިން ކުރައްވާ މަސައްކަތް ތަކަކީ ބަލައި ގަންނަ މަސައްކަތް ތަކެއް ކަމަށް ބައިނަލްއަަޤުވާމީ މުޖުތަމައުން ފާހަގަ ކޮށްފައިވެ އެވެ. ދުނިޔޭގެ ބާރު ތަކުން ގޮވާލަމުން އަންނަނީ، ސަރަހައްދީ ހަނގުރާމަ އަކަށް ބަދަލު ވުމުގެ ކުރިން، ހަމަލާތައް ހުއްޓާލައި، ސުލްޙަ ޤާއިމު ކުރުމަށެވެ.