އީރާންގެ އައު ރޫހާނީ ލީޑަރު އައްޔަން ކުރުމުގައި ޓްރަމްޕްގެ ދައުރު އޮންނަން ޖެހޭނެ ކަމަށް ވިދާޅުވުމުން، އީރާންގެ ވެރިން އެކަމަށް ކުރަނީ މަލާމާތް

އީރާންގެ އައު ރޫހާނީ ލީޑަރު، ނުވަތަ އެންމެ މަތީ ވެރިޔާ ކަނޑައެޅުމުގައި އެމެރިކާގެ ބައިވެރިވުން އޮންނަން ޖެހޭނެ ކަމަށް އެ ޤައުމުގެ ރައީސް ޑޮނަލްޑް ޓްރަމްޕް ވިދާޅުވުމުން، އީރާންގެ އިސްވެރިން އެކަމަށް މަލާމާތްކޮށް، ޖޯކު ޖައްސަވައިފި އެވެ. 

މެދު އިރުމަތީގެ ދިރާސާތަކާ ބެހޭ މަރުކަޒެއްގެ ސީނިއާ ރިސާޗަރެއް ކަމަށްވާ އައްބާސް އަސްލާނީ ވިދާޅުވީ، އީރާން އިން އަމާން ދިނުމަށް ޓްރަމްޕް ކުރައްވާ ޑިމާންޑު ތަކަށް އެ ޤައުމުން ދެނީ ބީރު ކަންފަތެއް ކަމަށެވެ. އަދި އީރާނުން ދެން އައްޔަން ކުރާ ރޫހާނީ ލީޑަރު ހޮވުމުގައި ބަސް ބުނުމުގެ ފުރުސަތު އޮންނަން ވާނެ ކަމަށް ޓްރަމްޕް ދެއްކެވި ވާހަކަ ތަކަަށް، އީރާންގެ ސަރުކާރުގެ އިސް އޮފިޝަލުން ގެންދަވަނީ މަލާމާތްކޮށް، ޖޯޖު ޖައްސަވަމުން ކަމަށް އޭނާ ވިދާޅުވި އެވެ. 

އަސްލާނީ ވިދާޅުވި ގޮތުގައި، އީރާނުން މިހާރު ފެންނަނީ ބަދަލަކަށް ވުރެ ބޮޑަށް، ކުރިން ވެސް ގެންގުޅުނު ސިޔާސަތު ތަކުގައި ދެމި އޮންނާނެ ކަމުގެ ނިޝާން ތަކެވެ. އީރާނުގެ އެންމެ މަތީ ވެރިޔާ ހޮވުމަކީ އެ ޤައުމުގެ އެސެމްބްލީ އޮފް އެކްސްޕާޓްސް އަށް އޮންނަ އިޚުތިޔާރެއް ކަމަށާއި، އެކަމުގެ ތެރެއަށް ބޭރުގެ އެއްވެސް ފަރާތަކަށް ނުވަދެވޭނެ ކަމަށް އީރާންގެ މަސްއޫލުވެރިން ވިދާޅުވާމު ގެންދަވާ ކަމަށް އަސްލާނީ ފާހަގަ ކުރެއްވި އެވެ. 

މީގެ އިތުރުން އަސްލާނީ ވިދާޅުވީ، ފާއިތުވި ދުވަސް ތަކުގައި އީރާނުން ފެންނަނީ ބޮޑު އިތުބާރަކާ އެކު ބަސް މަހު ބައްޓަން ކުރަމުންދާ މަންޒަރު ކަމަށެވެ. އަދި އެމެރިކާ އާއެކު އެއްވެސް ކަހަލަ މަޝްވަރާ ކުރުމެއް، ނުވަތަ ގުޅުން ބަދަހި ކުރުމަށް އީރާނުން އެއްވެސް ޝައުޤުވެރިކަމެއް ފާޅު ކޮށްފައި ނުވާ ކަަމަށް އޭނާ ވިދާޅުވި އެވެ. އެއާ އެކު، އީރާނުން އެ ޤައުމުގެ ސިޔާސަތަށް އެއްވެސް ބަދަލެއް ނުގެންނާނެ ކަމަށް އޭނާ ވަނީ ފާހަގަ ކުރައްވައިފަ އެވެ. 

އީރާނުގެ މަސްއޫލުވެރިންގެ މި ރައްދުތައް އައިސްފައި ވަނީ، އެމެރިކާގެ ރައީސް ޓްރަމްޕް އީރާނަށް އަތް ގަދަ ކުރުމަށް މަސައްކަތް ކުރަމުންދާ ވަގުތެއްގަ އެވެ. އަދި އީރާނުން އަމާން ނުދޭ ހިނދެއްގައި، އެއްވެސް މަޝްވަރާއެއް ނުކުރާނެ ކަމަށް ޓްރަމްޕް ވިދާޅުވެފައިވާ ވަގުތެއްގަ އެވެ.