އަވަށްޓެރި ޤައުމު ތަކަށް ހަމަލާ ދިނުން ހުއްޓާލަން ނިންމާފައިވާ ކަމަށް އީރާންގެ ރައީސް އިއުލާން ކުރައްވައިފި

އީރާންގެ ސަރަހައްދީ ރަށްވެހިކަމާއި، އަމަން އަމާންކަމަށް ބުރޫ ނާރާނެ ފަދަ ގޮތަށް، އަވަށްޓެރި ޤައުމު ތަކަށް އަމާޒުކޮށް ދެން ހަމަލާ ނުދޭނެ ކަމުގެ ޔަޤީންކަން އީރާންގެ ރައީސް މަސްއޫދު ޕެޒެޝްކިއާން ވިދާޅުވެއްޖެ އެވެ.

އީރާންގެ ރައީސް ޕެޒެޝްކިއާން މިހެން ވިދާޅުވީ، އީރާންގެ އިންތިޤާލީ ލީޑަރޝިޕް ކައުންސިލް އިން ހުކުރު ދުވަހު ފާސް ކޮށްފައިވާ ނިންމުމާ ގުޅިގެންނެވެ. 

އީރާންގެ މީޑިއާ ތަކުން ބުނެފައިވާ ގޮތުގައި، އީރާންގެ ރައީސް ޕެޒެޝްކިއާން ވިދާޅުވީ އަވަށްޓެރި ޤައުމު ތަކަށް އަމާޒުކޮށް ހަމަލާ ނުދިނުމަށް ނިންމާފައި ވީ ނަމަވެސް، އެއިން ޤައުމެއްގެ ސަރަހައްދުން އީރާން އަށް ހަމަލާ އަތުވެއްޖެ ނަމަ އެކަމަށް ރައްދު ދޭނެ ކަމަށެވެ. މިއީ ސަރަހައްދީ ހަމަޖެހުން ޤާއިމު ކުރުމަށްޓަކައި އީރާންގެ އެންމެ މަތީ މަޖިލީހުން ނިންމި ނިންމުމެއް ކަމަށް އެމަނިކުފާނު ފާހަގަ ކުރެއްވި އެވެ. 

މީގެ އިތުރުން ފާއިތުވި ދުވަސް ތަކުގެ ތެރޭގައި އީރާން އިން ދީފައިވާ ހަމަލާ ތަކާ ގުޅިގެން، އެކަމުގެ އަސަރު ފޯރި އަވަށްޓެރި ޤައުމު ތަކުގެ ކިބައިން ރައީސް ޕެޒެޝްކިއާން ވަނީ މައާފަށް އެދިވަޑައިގެންފަ އެވެ. އެއާ އެކު ވިދާޅުވީ، ކުރިން ހިނގައި ދިޔަ ކަންތައްތަކަކީ ވަގުތާއި ޙާލަތަކަށް ބެލުމަށް ފަހު، މަޖުބޫރު ވެގެން ކުރަން ޖެހުނު ކަންތައް ތަކެއް ކަމަށެވެ.

ނަމަވެސް، ކުރިއަށް އޮތް ތަނުގައި އަވަށްޓެރި ޤައުމުތަކާ އެކު އޮންނަ ގުޅުން ބަދަހި ކުރުމަކީ ސަރުކާރުގެ މުހިންމު ސިޔާސަތެއް ކަމަށް ޕެޒެޝްކިއާން ވިދާޅުވި އެވެ. އެމެރިކާ އާއި އިޒްރޭލް އިން އީރާން އަށް ދިން ހަމަލާތަކާ ގުޅިގެން، އޭގެ ރައްދުގައި އީރާން އިން ވަނީ ސަރަހައްދުގައި ހުރި އެމެރިކާގެ އެމްބަސީ ތަކުގެ އިތުރުން، އަސްކަރީ މަރުކަޒު ތަަކަށް ހަމަލާ ދީފަ އެވެ.

އީރާންގެ އިންތިޤާލީ ލީޑަރޝިޕް ކައުންސިލް އިން މިފަދަ ނިންމުމެއް ނިންމާފައި މި ވަނީ، މެދު އިރުމަތީގެ މަސްރަހު ނުތަނަވަސްވެފައިވާ ދަނޑިވަޅެއްގަ އެވެ. މި ނިންމުމާ އެކު، އަވަަށްޓެރި ޤައުމުތަޚާއި، އީރާންއާ ދެމެދު އިތުބާރު ބަދަހިވެ، ސަރަހައްދީ ސަލާމަތާއީ ރައްކާތެރިކަން ކަށަވަރު ވެގެންދާނެ ކަމަށް ސިޔާސީ މަސްރަހު ދިރާސާ ކުރާ ފަރާތްތަކުން ބުނެފައިވެ އެވެ. 

މީގެ އިތުރުން ޕެޒެޝްކިއާން ވިދާޅުވެފައި ވަނީ، އީރާންގެ އަމާޒަކީ އެއްވެސް ޤައުމަކަށް ނުރައްކަލެއް ކުރިމަތި ކުރުވުން ނޫން ކަމަށެވެ. ނަމަވެސް ޤައުމުގެ އިސްތިޤުލާލު ދިފާއު ކުރުމުގައި އެއްވެސް ދޫ ދިނުމެއް ނޯންނާނެ ކަމަށް އޭނާ ވިދާޅުވި އެވެ. އަދި އަވަށްޓެރި ޤައުމު ތަކުގެ ބިން ބޭނުން ކޮށްގެން އީރާން އަށް ހަމަލާ ދިނުމުގެ ފުރުސަތު އެއްވެސް ފަރާތަކަށް ނުދިނުމަށް ވެސް، ޕެޒެޝްކިއާން ވަނީ އެދިވަޑައިގެންފަ އެވެ.