ފަހަތުން އަރައި ލީޑްސް އިން ޗެލްސީ ހުއްޓުވައިފި

އިނގިރޭސި ޕްރިމިއާ ލީގުގައި ލީޑްސް ޔުނައިޓެޑާ ދެކޮޅަށް ކުޅުނު މެޗުން ޕޮއިންތަކުން ޗެލްސީ އަށް ފުއްދާލަން ޖެހިއްޖެ އެވެ. 

ޗެލްސީގެ އަމިއްލަ ދަނޑުގައި އަންގާރަ ދުވަހުގެ ރޭ ދަންވަރު ކުޅުނު މެޗު ނިމުނީ ދެ ޓީމު 2-2 އިން އެއްވަރު ވެގެންނެވެ. މެޗުގައި ޗެލްސީ އިން ދެ ލަނޑު ޖަހައި ކުރި ހޯދާފައި ވަނިކޮށް، ލީޑްސް އިން ވަނީ ފަހަތުން އަރައި ދެ ލަނޑު ޖަހައިގެން ނަތީޖާ ހަމަހަމަ ކޮށްފަ އެވެ.

މެޗުގެ ފުރަތަމަ ހާފުގެ 24 ވަނަ މިނެޓުގައި ޗެލްސީ އިން ވަނީ ލަނޑު ޖަހައި ލީޑު ނަގައިފަ އެވެ. އެ ލަނޑު ޗެލްސީ އަށް ޖަހައިދިނީ ޔާއޯ ޕެޑްރޯ އެވެ. އެއީ ކޯލް ޕާމާ ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ. އޭގެ ފަހުން މެޗުގެ ދެ ވަނަ ހާފު ފަށައިގެން އަށް ވަނަ މިނެޓުގައި ޗެލްސީ އަށް ލިބުނު ޕެނަލްޓީ ކާމިޔާބުކޮށް ލީޑު ފުޅާ ކޮށްދިނީ ޕާމާ އެވެ. 

ނަމަވެސް، މެޗުގެ 67 ވަނަ މިނެޓުގައި ލީޑްސް އަށް ލިބުނު ޕެނަލްޓީ ކާމިޔާބުކޮށް ފަރަގު ކުޑަ ކޮށްދިނީ ލޫކަސް ނިމެކާ އެވެ. އެއާ އެކު ލީޑްސް އިން ވަނީ ނަތީޖާ ހަމަހަމަ ކުރުމަށް ވެސް ވަރަށް މަސައްކަތް ކޮށްފަ އެވެ. ނަތީޖާއެއްގެ ގޮތުން މެޗުގެ 73 ވަނަ މިނެޓުގައި ނޯއާ އޮކަފޯ ވަނީ ލަނޑު ޖަހައި ލީޑްސް އަށް އެއްވަރު ކޮށްދީފަ އެވެ.

މި ނަތީޖާ އާއެކު ޗެލްސީ އޮތީ ލީގު ތާވަލްގެ ފަސް ވަނަ މަގާމުގަ އެވެ. އެއީ މިހާތަނަށް އެ ޓީމު ކުޅެފައިވާ 26 މެޗުން 44 ޕޮއިންޓާ އެކު އެވެ. މިއީ ޗެލްސީގެ ކޯޗުކަމާ ލިއަމް ރޮސެނިއާ ހަވާލުވި ފަހުން ލީގުގައި އެ ޓީމަށް މޮޅެއް ނުހޯދި ނިންމާލަން ޖެހުނު ފުރަތަމަ މެޗެވެ.