ވިގަން އެތުލެޓިކް ބަލިކޮށް، އާސެނަލް ވެސް ގަދަ 16 އަށް
އާސެނަލްގެ އަމިއްލަ ދަނޑު، އެމިރޭޓްސް ސްޓޭޑިއަމްގައި ކުޅުނު މެޗު އެ ޓީމުން ކާމިޔާބު ކުރީ 4-0 އިން. މެޗުގައި އާސެނަލް އިން އެ ޓީމުގެ ހަތަރު ލަނޑު ވެސް ޖެހީ މެޗުގެ ފުރަތަަމަ ހާފުގައި.
މެޗުގައި ލަނޑު ޖެހުމަށް ފަހު އާސެނަލްގެ ކުޅުންތެރިން އުފާ ފާޅު ކުރަނީ | ރޮއިޓާސް
އިނގިރޭސި އެފްއޭ ކަޕްގެ ހަތަރު ވަނަ ބުރުގައި ވިގަން އެތުލެޓިކްއާ ދެކޮޅަށް ކުޅުނު މެޗުން މޮޅުވެ، އާސެނަލް ވެސް މުބާރާތުގެ ގަދަ 16 އިން ޖާގަ ހޯދައިފި އެވެ.
އާސެނަލްގެ އަމިއްލަ ދަނޑު، އެމިރޭޓްސް ސްޓޭޑިއަމްގައި ކުޅުނު މެޗު އެ ޓީމުން ކާމިޔާބު ކުރީ 4-0 އިންނެވެ. މެޗުގައި އާސެނަލް އިން އެ ޓީމުގެ ހަތަރު ލަނޑު ވެސް ޖެހީ މެޗުގެ ފުރަތަަމަ ހާފުގަ އެވެ.
މެޗު ފަށައިގެން 11 ވަނަ މިނެޓުގައި އާސެނަލް އަށް ލީޑު ނަގައިދިނީ ނޯނީ މަޑުއޭކޭ އެވެ. އެ ލަނޑު އޭނާ ޖެހީ އެބްރެޗީ އެޒޭ ތަނަވަސްކޮށްދިން ފުރުސަތެއްގަ އެވެ. އޭގެ ހަތް މިނެޓު ފަހުން އާސެނަލްގެ ދެ ވަނަ ލަނޑު ޖަަހައި ލީޑު ފުޅާ ކޮށްދިނީ ގަބްރިއެލް މާޓިނެލީ އެވެ. އެ ލަނޑު ޖަހަން މާޓިނެލީ އަށް ވެސް ފުރުސަތު ތަނަަވަސްކޮށްދިނީ އެޒޭ އެވެ.
މެޗުގައި އާސެނަލްގެ ތިން ވަނަ ލަނޑަކީ، 23 ވަނަ މިނެޓުގައި ވިގަން އެތުލެޓިކްގެ ޑިފެންޑަރު ޖެކް ހަންޓް އަތުން ބައި ކޮޅަށް ވަތް ލަނޑެކެވެ. އޭގެ ހަތަރު މިނެޓު ފަހުން އާސެނަލްގެ ހަތަރު ވަނަ ލަނޑު ޖެހީ ގަބްރިއެލް ޖީސުސް އެވެ. އެއީ ކްރިސްޓިއަން ނޯގާޑް ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ.
އާސެނަލް އިން އެފްއޭ ކަޕްގެ ގަދަ 16 އިން ޖާގަ ހޯދިއިރު، ޔުއެފާ ޗެމްޕިއަންސް ލީގުގެ ގަދަ 16 އިން ވެސް ޖާގަ ހޯދާފައިވެ އެވެ. އިނގިރޭސި ޕްރިމިއާ ލީގުގެ އެއް ވަނައިގައި އާސެނަލް އޮތް އިރު، މެންޗެސްޓަރ ސިޓިއާ ދެމެދު އޮތް ފަރަގު މިހާރު ވަނީ ހަތަރު ޕޮއިންޓަށް ކުޑަވެފަ އެވެ.
