އިންތިހާބު އެއްކޮށް ބޭއްވުމުގެ ނަތީޖާ އަކަށް ވެގެންދާނީ ސަރުކާރު ޖަވާބުދާރީ ކުރުވުމަށް އޮތް ފުރުސަތު މުޅިން ގެއްލިގެން ދިއުން: ރައީސް ސޯލިހު

ވެރިކަމުގެ ބާރާއި، ފައިސާއާއި ވަޒީފާގެ ނުފޫޒާއެކު ރިޔާސީ އިންތިޚާބާއި މަޖިލިސް އިންތިޚާބު އެއްކޮށް ބާއްވައިފިނަމަ، މުޅި މަޖިލީހުގެ ކޮންޓްރޯލް ވެރިކަމުގައި ހުންނަވާ ބޭފުޅަކު ނަންގަވާނެ ކަމަށާއި، އޭގެ ނަތީޖާއަކަށް ވެގެންދާނީ ސަރުކާރު ޖަވާބުދާރީ ކުރުވުމަށް އޮތް ފުރުސަތު މުޅިން ގެއްލިގެން ދިއުން ކަމަށް ކުރީގެ ރައީސް އިބްރާހިމް މުހައްމަދު ސޯލިހު ވިދާޅުވެއްޖެ އެވެ.

އެމަނިކުފާނު މިހެން ވިދާޅުވީ އެމްޑީޕީ ހަރުގޭގައި ބޭއްވި ޖަލްސާގައި ވާހަކަފުޅު ދައްކަވަމުންނެވެ.

ރައީސް ސޯލިހު ވިދާޅުވީ 2008 ވަނަ އަހަރު އައު ގާނޫނުއަސާސީއަށް އަމަލުކުރަން ފެށި ފަހުން ބޭއްވުނު އިންތިޚާބުތަކުގެ ނަތީޖާ ނުކުމެފައިވާ ގޮތް ދިރާސާކޮށް ބަލަންޖެހޭ ކަމަށެވެ. އެގޮތުން 2013 ވަނަ އަހަރުން ފެށިގެން އިންތިޚާބުތަކުގެ ނަތީޖާ އައިސްފައިވާ ގޮތަށް ބަލާއިރު، 2013 ގައި ރިޔާސީ އިންތިޚާބު ކާމިޔާބު ކުރެއްވި ރައީސް ޔާމީން ވެރިކަމާ ހަވާލުވެވަޑައިގެން ހުންނަވައި، ޖެހިގެން އައި 2014 ވަނަ އަހަރު ބޭއްވި މަޖިލިސް އިންތިޚާބުގެ 69 އިންސައްތަ ގޮނޑި ކާމިޔާބު ކުރެއްވި ކަމަށް ސޯލިހު ފާހަގަކުރެއްވި އެވެ. އެއީ އޭރު އޮތް 85 ގޮނޑީގެ ތެރެއިން 59 ގޮނޑި އެވެ.

މީގެ އިތުރުން 2018 ވަނަ އަހަރުގެ ރިޔާސީ އިންތިޚާބު އެމްޑީޕީން ކާމިޔާބު ކުރުމަށްފަހު، ފަސް މަސްދުވަސް ފަހުން 2019 ވަނަ އަހަރު ބޭއްވި މަޖިލިސް އިންތިޚާބުގައި އެމްޑީޕީން 75 އިންސައްތަ ނުވަތަ 65 ގޮނޑި ކާމިޔާބު ކުރިކަން ރައީސް ސޯލިހު ހަނދާންކޮށްދެއްވި އެވެ. އަދި އެންމެ ފަހުން 2023 ވަނަ އަހަރު ބޭއްވި ރިޔާސީ އިންތިޚާބަށްފަހު ބޭއްވި މަޖިލިސް އިންތިޚާބުގައި، ރައީސް ޑރ. މުހައްމަދު މުއިއްޒު މަޖިލީހުގެ 87 އިންސައްތަ ގޮނޑި ކާމިޔާބު ކުރެއްވިކަން އެމަނިކުފާނު ފާހަގަކުރެއްވި އެވެ.

ރައީސް ސޯލިހު ވިދާޅުވީ މި ހިސާބުތަކުން ފެންނަން އޮތީ ވެރިކަމުގެ ނުފޫޒާއި ބާރު މަޖިލިސް އިންތިޚާބަށް ފޯރާފައި އޮތް މިންވަރު ކަމަށެވެ. ވެރިކަމުގެ ބާރުގައި ހުންނަވާ ބޭފުޅަކު މަޖިލީހުގެ ކޮންޓްރޯލް ނަންގަވާ މިންވަރު 69 އިންސައްތައިން 75 އިންސައްތައަށް، އަދި މިހާރު 87 އިންސައްތައަށް އިތުރުވެފައިވާ ކަމަށް އެމަނިކުފާނު ވިދާޅުވި އެވެ.

ދެ އިންތިޚާބު އެއްކޮށްލުމާ މެދު ވިސްނާލުމަށް އެދިވަޑައިގަންނަވަމުން ރައީސް ސޯލިހު ވިދާޅުވީ، ވެރިކަމުގެ ބާރާއި ފައިސާއާއި ވަޒީފާ, ބޭނުންކޮށްގެން ދެ އިންތިޚާބު އެއްކޮށް ބާއްވައިފިނަމަ، މުޅި މަޖިލިސް އެކީގައި ވެރިކަމުގައި ހުންނަވާ ބޭފުޅަކު ނަންގަވާނެ ކަމަށެވެ. އަދި އޭރުން މަޖިލީހުގައި ތިއްބަވާނީ ހުސް ސަރުކާރުގެ މީހުން ކަމަށާއި، އޭގެ ސަބަބުން ސަރުކާރު ޖަވާބުދާރީ ކުރުވުމުގެ ފުރުސަތު ގެއްލިގެންދާނެ ކަމަށް އެމަނިކުފާނު ވިދާޅުވި އެވެ.

މިއަދުގެ ހާލަތަށް އިޝާރާތް ކުރައްވައި ރައީސް ސޯލިހު ވިދާޅުވީ، މަޖިލީހުގެ 87 އިންސައްތަ އޮވެގެން ސަރުކާރު ޖަވާބުދާރީ ކުރުވުމަށް ކުރެވެނީ ކޮން ކަމެއްތޯ ސުވާލު އުފެދޭ ކަމަށެވެ. ސަރުކާރުން ވިދާޅުވާ ކަމެއް ކުރުން ނޫން ކަމެއް މަޖިލީހުން ނުކުރާނެ ކަމަށް އެމަނިކުފާނު ވިދާޅުވިއެވެ. އެހެންކަމުން، ކުރިއަށް އޮތް ރިފަރެންޑަމްގައި މިކަންކަމާ މެދު ފުންކޮށް ވިސްނަންޖެހޭ ކަމަށް ރައީސް ސޯލިހު ވިދާޅުވި އެވެ.