މި ދައުރުގައި އަދި ބޭއްވީ އެންމެ 3 ޖަލްސާ، މަޖިލިސް އޮތީ ހިސޯރުކޮށް ވާނުވާގައި، ސަރުކާރުން މަސައްކަތް ކުރަނީ އިދިކޮޅުގެ އަޑު ކަނޑުވާލަން: މެންބަރު ޝަމްހީދު

މި ހިނގާ 2026 ވަނަ އަހަރުގެ ރައްޔިތުންގެ މަޖިލީހުގެ ފުރަތަމަ ދައުރުގައި އަދި ބޭއްވީ އެންމެ 3 ޖަލްސާ ކަމަށާއި، މަޖިލިސް އޮތީ ހިސޯރުކޮށް، ވާނުވާގައި ކަމަށް ރައްޔިތުންގެ މަޖިލީހުގެ ހުޅުމާލެ ދެކުނު ދާއިރާގެ މެންބަރު ޑރ. އަހުމަދު ޝަމްހީދު ވިދާޅުވެއްޖެ އެވެ.

މި އަހަރުގެ މި ހިނގާ ފުރަތަމަ ދައުރު ފަށާފައި ވަނީ މިދިޔަ ފެބްރުއަރީ މަހުގެ 5 ވަނަ ދުވަހު އެވެ. އޭގެ ފަހުން ބާއްވާފައި ވަނީ މަޖިލީހުގެ އެންމެ 3 ޖަލްސާ އެވެ. ދައުރު ފެށުނުތާ މަހެއް ވާން ގާތްވެފައިވާއިރު ޖަލްސާތައް ކެންސަލް ކުރާ ސަބަބު ވެސް ހާމަ ކޮށްފަ އެއް ނުވެ އެވެ. 

މިކަމުގެ ކަންބޮޑުވުން ފާޅުކުރައްވައި ރާއްޖެޓީވީ. އާ ވާހަކަދައްކަވަމުން މެންބަރު ޝަމްހީދު ވިދާޅުވީ މިއީ ވަރަށް ކަންބޮޑުވާ ކަމެއް ކަމަށެވެ. އަދި މެންބަރުންނަށް ވާނުވާ އެންގުމެއް ނެތި، ޖަލްސާ ނުބާއްވާ، މި ސަރުކާރުން ވަނީ މުޅި މަޖިލިސް ހިސޯރު ކޮށްފައި ކަމަށް ވެސް މެންބަރު ވިދާޅުވި އެވެ. 

ޝަމްހީދު ވިދާޅުވީ ޖަލްސާ އޮންނާނެތޯ ނުވަތަ ނޫންތޯ މަޖިލިސް އޮންނަ ކޮންމެ ދުވަހަކު ވެސް ޔަގީން ނުވެފައި ތިބެން ޖެހޭ ކަމަށެވެ. ސަބަބަކީ މަޖިލީހުގެ އިދާރާ އިން ވެސް އަދި މަޖިލީހުގެ ރައީސް އަބްދުއްރަހީމް އަބްދުﷲ ވެސް މެންބަރުންނަށް ވަކި އެއްޗެއް ނާންގަވާތީ ކަމަށް މެންބަރު ވިދާޅުވި އެވެ. 

މަޖިލީހަކީ ސަރުކާރު ޖަވާބުދާރީ ކުރުވާ އެންމެ މުހިއްމު އެއް ބާރު ކަމަށާއި، ޚާއްޞަކޮށް ދުނިޔޭގައި މިވަގުތު ހިނގަމުންދާ މުހިއްމު ކަންކަމާ އޭގެ ސަބަބުން ރާއްޖެއަށް ކުރާނެ އަސަރުތަކާ ގުޅިގެން ވެސް ސަރުކާރާއި ސުވާލު ކުރަން ތިބި ރައްޔިތުންގެ މަންދޫބުން ތިބި ތަނަކީ މަޖިލިސް ކަމަށް ޝަމްހީދު ވިދާޅުވި އެވެ. ނަމަވެސް ޖަލްސާތައް ނުބާއްވާ މި ސަރުކާރު ޖަބާދާރީ ކުރުވުމުގެ ފުރުސަތު ވެސް ހުއްޓުވާފައިވާ ކަމަށް މެންބަރު ވިދާޅުވި އެވެ. 

މެންބަރު ވިދާޅުވީ، ބޮޑަށް ބެލެވެނީ މިކަމަކީ ކުރިއަށް އޮތް ކައުންސިލް އިންތިޚާބާ ދިމާކޮށް، އިދިކޮޅު އެމްޑީޕީ ގެ މެންބަރުން ދައްކަވާ ވާހަކަތަކާ ގުޅިގެން ސަރުކާރަށް އޭގެ ނެގެޓިވް އިމްޕެކްޓެއް އައިސް، ވޯޓު މަދުވެދާނެ ކަމުގެ ބިރަށް، އެ މެންބަރުންގެ އަޑު ކަނޑުވާލުމަށް ކުރަމުންދާ ކަމެއްގެ ގޮތުގައި ކަމަށެވެ. އަދި މިއީ އެ ޕާޓީ އިން ނުހަނު ކަންބޮޑުވާ ކަމެއް ކަމަށް ވެސް ޝަމްހީދު ވިދާޅުވި އެވެ. 

މިކަމާ ގުޅިގެން އާދިއްތަ ދުވަހު ޝަމްހީދު ވަނީ އެކްސް ގައި ވެސް ޕޯސްޓެއް ހިއްސާ ކުރައްވާފަ އެވެ.  އެ ޕޯސްޓުގައި ޝަމްހީދު ވިދާޅުވީ 2 މަސް ދުވަހުގެ ޗުއްޓީއަކަށް ފަހު މަޖިލިސް ހުޅުވުނު ފަހުން މިހާތަނަށް ބޭއްވުނީ އެންމެ 3 ޖަލްސާ ކަމަށާއި، ވޭތުވެދިޔަ ދެ ހަފްތާ ދިޔައީ ޖަލްސާ އެއް އޮންނާނެކަން ނޭނގި "ވާނުވާ" ގަ ތިބެ ކަމަށެވެ. އަދި މަޖިލިސް މެންބަރަކަށް ވީތީ، ނުކުރާ މަސައްކަތަށް މުސާރަ ދޭންޖެހޭތޯ ވެސް މެންބަރު ސުވާލު އުފެއްދެވި އެވެ. 

މަޖިލީހުގެ ގަވާއިދު ބުނާ ގޮތުން މަޖިލީހުގެ ދައުރު ހިނގާއިރު ޖަލްސާ އޮންނާނީ ކޮންމެ ހަފްތާއެއްގެ ހޯމަ، އަންގާރަ އަދި ބުދަ ދުވަހުގަ އެވެ.