ފެންނަ ނުފެންނަ ވޯޓުގެ މައުލޫމާތު ރައްޔިތުންނަށް ނުދިނުމަކީ އޭގެ ފަހަތުގައި ފޮރުވިފައި އޮތް ވަރަށް ބޮޑު ނުރައްކަލެއް ހިމެނޭ ކަމެއް: ރައީސް ސޯލިހު
ރިޔާސީ އިންތިޚާބާއި މަޖިލިސް އިންތިޚާބު އެއްކޮށް ބޭއްވުމަށް ޤާނޫނުއަސާސީއަށް ގެންނަ ބަދަލާ ގުޅޭ މަޢުލޫމާތު ސަރުކާރުން ސިއްރުކުރާތީ، އެކަމުގައި ބޮޑެތި ނުރައްކާތަކެއް ހުރި ކަމަށް ކުރީގެ ރައީސް އިބްރާހިމް މުހައްމަދު ސޯލިހު ވިދާޅުވެއްޖެ. މި ބަދަލުގެ ސަބަބުން ސަރުކާރު ޖަވާބުދާރީކުރުވުމަށް ރައްޔިތުންނަށް ލިބޭ ފުރުޞަތު ގެއްލިގެންދާނެ ކަމަށް ފާހަގަކުރައްވައި، ރިފަރަންޑަމްގައި "ނޫނެކޭ" ބުނުމަށް އެމަނިކުފާނު ވަނީ އިލްތިމާސްކުރައްވާފަ. އަދި ކުރިއަށް އޮތް ލޯކަލް ކައުންސިލް އިންތިޚާބުގައި އެމްޑީޕީން ރައްޔިތުންނަށް ޚިދުމަތްކުރުމުގެ އަމާޒުގައި ނުކުންނާނެ ކަމަށްވެސް އެމަނިކުފާނު ވިދާޅުވި.
ހެންވޭރު ހުޅަނގު ދާއިރާގެ ކެމްޕޭނަށް ވަޑައިގެން ރައީސް ސޯލިހު ރާއްޖެޓީވީ އަށް އިންޓަރވިއު ދެއްވަނީ. | ރާއްޖެ އެމްވީ
ރިފަރެންޑަމާ ބެހޭ މަޢުލޫމާތު ރައްޔިތުންނަށް ނުދިނުމަކީ އޭގެ ފަހަތުގައި ފޮރުވިފައި އޮތް ވަރަށް ބޮޑު ނުރައްކަލެއް ހިމެނޭ ކަމެއް ކަމަށް ކުރީގެ ރައީސް އިބްރާހިމް މުހައްމަދު ސޯލިހު ވިދާޅުވެއްޖެ އެވެ.
ކުރިއަށް އޮތް ލޯކަލް ކައުންސިލް އިންތިހާބާއި އަންހެނުންގެ ތަރައްގީއަށް މަސައްކަތް ކުރާ ކޮމިޓީގެ އިންތިހާބު އަދި ފެންނަ ނުފެންނަ ވޯޓުގެ ކެމްޕޭނަށް ހެންވޭރު ހުޅަނގުގެ ގެތަކަށް ވަޑައިގެން، ރާއްޖެޓީވީ އަށް ދެއްވި އިންޓަރވިއުއެއްގައި ރައީސް ސޯލިހު ވިދާޅުވީ ވަރަށް ސިއްރުން އޮޅުވާލައިގެން މި އިންތިޚާބުގެ ތެރެއަށް ޤާނޫނުއަސާސީއަށް ގެންނަ ވަރަށް މުހިންމު ބޮޑު ބަދަލެއްގެ އިޞްލާޙު ހުށަހަޅައިގެން ރިފަރަންޑަމަކަށް ދާން ސަރުކާރުން އުޅޭ ކަމަށެވެ. އަދި މިކަން ރޭވިގެން އައި ގޮތާއި މިހާހިސާބަށް އައިއިރު އެއާ ބެހޭ މަޢުލޫމާތުތައް ރައްޔިތުންނަށް ދޭންވާވަރަށް ނުދިނުމަކީ މީގެ ފަހަތުގައި ފޮރުވިފައި އޮތް ވަރަށް ބޮޑު ނުރައްކަލެއް ހިމެނޭ ކަމެއް ކަމަށް ވިދާޅުވި އެވެ.
އެހެންވީމާ، މީގައި މާ ބޮޑު ސުވާލެއް ނެތް. ފުރަތަމަ ކަމަކަށްވެސް ވަރަށް މުހިންމު ކަމެއް، މިއަށް ނޫނެކޭ ބުނަންވީ. އެހެންނޫނިއްޔާ އަޅުގަނޑުމެން ސަރުކާރު ޖަވާބުދާރީކުރުވުމަށް މި ލިބޭ، ރައްޔިތުންނަށް މި ލިބޭ ފުރުޞަތު ހަމަ މުޅިން ގެއްލިގެން އެދަނީ. ރައްޔިތުންގެ މަޖިލީހާއި ރިޔާސީ އިންތިޚާބު އެއްކޮށް ބޭއްވީމާ، ދެން އަންނަ 5 އަހަރު، އެ ވެގެންދަނީ ރައްޔިތުންނާއި ސަރުކާރާ މުޅިން ގުޅުން ކެނޑިގެން އެދަނީ. ސުވާލުކުރެވޭނެ ތަނެއް ނެތް. ރައްޔިތުންގެ މަޖިލިސް އެކީގައި އޮންނާނީ ސަރުކާރާ އެކީގައި. މަޖިލީހުގެ ތެރެއިން ޖަވާބުދާރީއެއް ނުކުރެވޭނެ. ރައްޔިތުންނަކަށް ނެތް ސަރުކާރު ޖަވާބުދާރީކޮށްދެވެން.ކުރީގެ ރައީސް އިބްރާހިމް މުހައްމަދު ސޯލިހު
ރައީސް ސޯލިހު ވިދާޅުވީ މިއީ ވަރަށް ނުރައްކާތެރި ކަންތައްތަކެއް މީގައި ހިމެނިފައި އޮތް ރިފަރަންޑަމެއް ކަމަށާއި މީގެ ފަހަތުގައި ފޮރުވިފައި އޮތީ ކޮންކަމެއް ކަމެއް ނޭނގޭ ކަމަށެވެ. އަދި ކެމްޕެއިން ކުރިއަށް ދާއިރު އެ ވާހަކަތައް ވެސް ދެކެވޭނެ ކަމަށް އެމަނިކުފާނު ވިދާޅުވި އެވެ.
ވަރަށް ނުރައްކާތެރި ކަންތައްތަކެއް މީގައި ހިމެނިފައި އޮތް ރިފަރަންޑަމެއް. އަދި މީގެ ފަހަތުގައި ދެން އޮތީ ފޮރުވިފައި އޮތީ ކޮންކަމެއް ކަމެއް އަޅުގަނޑުމެން ކަންނޭނގެ. އަދި މި ކެމްޕެއިން ކުރިއަށް ދާއިރުގައި އެ ވާހަކަތައްވެސް ދެކެވޭނެ. އަޅުގަނޑުގެ އިލްތިމާސަކީ މިކަމުގައި ކަންބޮޑުވެ ވަޑައިގަންނަވާ. އަޅުގަނޑު ހިތުން ކަންބޮޑުވާވަރު ކަމެއް މިއީ. އެންމެ ނުކުމެވަޑައިގަންނަވާށޭ. އެމް.ޑީ.ޕީ މިއޮތީ ކުރިއަށް ނުކުމެ. އަދި ވަކިން އެހެން ބޭފުޅުން މި ކަންކުރަން ބޭނުންކަމަށްވަންޏާ ވެސް ނުކުމެ ޤައުމު ސަލާމަތްކުރުމަށް މިކަމުގައި ބައިވެރިވުން އަޅުގަނޑުގެ އިލްތިމާސަކީ.ކުރީގެ ރައީސް އިބްރާހިމް މުހައްމަދު ސޯލިހު
ރައީސް ސޯލިހު ވިދާޅުވީ މާލޭގެ ހުރިހާ ދާއިރާއެއްގައިވެސް ކެމްޕޭން ވަރަށް ރަނގަޅަށް ޕޮޒިޓިވްކޮށް ކުރިއަށްދާތަން ފެންނަކަމަށެވެ. އެމްޑީޕީގެ އަމާޒަކީ ސީދާ ރައްޔިތުންނަށް ޚިދުމަތް ކުރުން ކަމަށާއި އެއީ އެމްޑީޕީގެ އަބަދުވެސް އަމާޒެއް ކަމަށް އެމަނިކުފާނު ވިދާޅުވި އެވެ. ކުރިއަށް އޮތް ތަނުގައިވެސް އެމްޑީޕީގެ އަމާޒަކީ ރައްޔިތުންނަށް ޚިދުމަތްކުރުމަށް ކަމަށާއި މެނިފެސްޓޯއަކާ އެކީގައި އަންނާނެ ކަމަށް ވިދާޅުވި އެވެ. މާލޭގެ ރައްޔިތުން މިފަހަރު އަނެއްކާ ވެސް އިރާދަކުރެއްވިއްޔާ އެމްޑީޕީއަށް ވޯޓުދޭތަން ފެނިގެންދާނެ ކަމަށް ކުރީގެ ރައީސް ވިދާޅުވި އެވެ.
