އިންޓަކޮންޓިނެންޓަލް ކަޕް ކާމިޔާބު ކޮށް ޕީއެސްޖީ ތާރީޚު ގެ ތެރެއަށް

އިންޓަކޮންޓިނެންޓަލް ކަޕް ކާމިޔާބު ކޮށް، ފްރާންސްގެ ޕެރިސް ސެއިންޓް ޖާމަން (ޕީއެސްޖީ) އިން ތާރީޚު ގެ ތެރެއިން ޖާގަ ހޯދައިފި އެވެ. 

ބުދަ ދުވަހުގެ ރޭ ކުޅުނު ފައިނަލް މެޗު ޕީއެސްޖީ އިން ކާމިޔާބު ކުރީ ޕެނަލްޓީ ގައި ކުރި ފްލަމެންގޯ ގެ މައްޗަށް ހޯދައިގެންނެވެ. މެޗުގައި ޕީއެސްޖީ އިން ލަނޑު ޖަހައި ކުރި ހޯދާފައި ވަނިކޮށް، ފްލަމެންގޯ އިން ނަތީޖާ ހަމަހަމަ ވެސް ކުރި އެވެ. އިތުރު ވަގުތު ކުޅެގެން ވެސް އެއްވެސް ޓީމަކަށް ލަނޑެއް ޖެހިފައި ނެތުމުން، ދެން ވަނީ ޕެނަލްޓީ ޖަހައިފަ އެވެ. 

މެޗުގެ ފުރަތަމަ ހާފުގެ 38 ވަނަ މިނެޓުގައި ޕީއެސްޖީ އިން ވަނީ ލަނޑު ޖަހައި ލީޑު ނަގައިފަ އެވެ. އެ ލަނޑު އެ ޓީމަށް ޖަހައިދިނީ ކްވިޗާ ކްވަރަޝްކޭލިއާ އެވެ. އޭނާ އެ ލަނޑު ޖަހަން ފުރުސަތު ތަނަވަސްކޮށްދިނީ ޑެޒެއާ ޑޫއޭ އެވެ. އޭގެ ފަހުން ވެސް ޕީއެސްޖީ އަށް ވަނީ މެޗުގައި އިތުރު ލަނޑު ޖަހަން ފުރުސަތު ލިބިފަ އެވެ.

ނަމަވެސް، މެޗުގެ ދެ ވަނަ ހާފުގައި ފްލަމެންގޯ އިން ވަނީ ލަނޑު ޖަހައި ނަތީޖާ ހަމަހަމަ ކޮށްފަ އެވެ. މެޗުގެ 62 ވަނަ މިނެޓުގައި އެ ޓީމަށް ލިބުނު ޕެނަލްޓީ ކާމިޔާބުކޮށް ނަތީޖާ ހަމަހަމަ ކޮށްދިނީ ޖޯޖީނިއޯ އެވެ. އެއީ ޕީއެސްޖީގެ އޭރިޔާ ތެރެއިން ފްލަމެންގޯގެ ކުޅުންތެރިޔަކަށް ކުރި ފައުލަކާ ގުޅިގެން ދިން ޕެނަލްޓީ އެވެ.

މެޗުގެ ނަތީޖާ ނެރުމަށް ޖެހި ޕެނަލްޓީގައި ޕީއެސްޖީ އިން ވަނީ ހަތަރު ޕެނަލްޓީގެ ތެރެެއިން ދެ ޕެނަލްޓީ ކާމިޔާބު ކޮށްފަ އެވެ. ފްލަމެންގޯ އިން ފަސް ޕެނަލްޓީ ޖެހިއިރު، އެ ޓީމަށް ކާމިޔާބު ކުރެވުނީ އެންމެ ޕެނަލްޓީ އެކެވެ. ފްލަމެންގޯ އިން ޖެހި ފަސް ޕެނަލްޓީގެ ތެރެއިން ހަތަރު ޕެނަލްޓީ ޕީއެސްޖީގެ ގޯލު ކީޕަރު ވަނީ މަތަކޮށްފަ އެވެ.

މިއާ އެކު ޕީއެސްޖީ ވެގެން ގޮސްފައި ވަނީ ކަލަންޑަރު އަހަރެއްގައި ހަ ތަށި ކާމިޔާބު ކޮށްފައިވާ ތިން ވަނަ ޓީމަށެވެ. މީގެ ކުރިން ބާސެލޯނާ އަދި ބަޔާން މިއުނިކް އިން ވަނީ ކަލަންޑަރު އެއް އަހަރެއްގައި ހަ ތަށި ކާމިޔާބު ކޮށްފަ އެވެ. އެއް އަހަރުގެ ތެރޭގައި ޕީއެސްޖީ އިން ވަނީ ފްރާންސް ލީގުގެ އިތުރުން، ޔުއެފާ ޗެމްޕިއަންސް ލީގު، ފްރާންސް ކަޕް، ޓްރޮޑީ ޑީ ޗެމްޕިއަންސް، ޔުއެފާ ސުޕަ ކަޕް އަދި އިންޓަކޮންޓިނެންޓަލް ކަޕް ކާމިޔާބު ކޮށްފަ އެވެ. 

މެޗަށް ފަހު ވާހަކަ ދައްކަމުން ޕީއެސްޖީގެ ކޯޗު ލުއިސް އެންރީކޭ ބުނެފައި ވަނީ އެ ޓީމުން އަނެއްކާ ވެސް ތާރީޚުން ޖާގަ ހޯދާފައިވާ ކަމަށެވެ. އެންރީކޭ ބުނީ 2025 ވަނަ އަހަރުގެ ތެރޭގައި ޕީއެސްޖީ އިން ވަނީ ތަފާތު ރޫޙަކާއި، ހިތްވަރެއް ދައްކުވާފައި ކަމަށެވެ. އޭނާ ބުނީ ޕީއެސްޖީ އަށް ކާމިޔާބު ކުރެވުނު ކަންތައްތަކާ މެދު އެންމެން ވެސް ހިތްހަމަ ޖެހޭ ކަމަށާއި، ޚާއްސަކޮށް ކުލަބުގެ ސަޕޯޓަރުން ތިބީ އިންތިހާ އަށް އުފަލުން ކަމަށެވެ.

މީގެ އިތުރުން އެންރީކޭ ބުނީ ކާމިޔާބު ހޯދުމުގެ މަސައްކަތުގައި ދެމި ތިބެން ޖެހޭ ކަމަށާއި، ޕީއެސްޖީ އިން އެކަން ތަކުރާރު ކުރަން ބޭނުންވާ ކަމަށެވެ. އޭނާ ބުނީ ޕީއެސްޖީގައި އޮތީ އެކަން ކުރެވޭނެ ފެންވަރުގެ ޓީމެއް ކަމަށާއި، ކުޅުންތެރިންނަށް އޭނާގެ ފުރިހަމަ އިތުބާރު އޮންނާނެ ކަމަށެވެ.