އީރާނުގެ ޑްރޯން ހަމަލާތަކާ ގުޅިގެން އެމެރިކާގެ މަނަވަރު "ޔޫ.އެސް.އެސް އަބްރަހަމް ލިންކަން" އެ ސަރަހައްދު ދޫކޮށް ފިލައިފި

އޮމާން ކަނޑުގައި އިސްލާމިކް ރިވޮލިއުޝަނަރީ ގާޑް ކޯޕްސް (އައި.އާރް.ޖީ.ސީ) ގެ ޑްރޯންތަކުން ދިން ވަރުގަދަ ހަމަލާތަކަކާ ގުޅިގެން، އެމެރިކާގެ މަތިންދާބޯޓު އުފުލާ މަނަވަރު "ޔޫ.އެސް.އެސް އަބްރަހަމް ލިންކަން" އެ ސަރަހައްދު ދޫކޮށް ފިލައިފިއެވެ. އައި.އާރް.ޖީ.ސީ ގެ ކަނޑުގެ ސިފައިން އަމިއްލައަށް އުފައްދާފައިވާ ޒަމާނީ ޑްރޯންތައް ބޭނުންކޮށްގެން ދިން މި ހަމަލާތަކުގެ ސަބަބުން، އީރާނުގެ ކަނޑުގެ ސަރަހައްދާ ކައިރީގައި އޮތް އެމެރިކާގެ އަސްކަރީ ގްރޫޕަށް ވަނީ ވަރަށް އަވަހަށް އެ ސަރަހައްދުން ދުރަށް ޖެހުމަށް މަޖުބޫރުވެފައެވެ.

ޚާތަމް އަލް-އަންބިޔާ ސެންޓްރަލް ހެޑްކުއާޓާޒްގެ ތަރުޖަމާނު ބުދަ ދުވަހު މި އޮޕަރޭޝަން ކަށަވަރުކޮށްދެމުން ވިދާޅުވީ، އޮމާން ކަނޑުގައި އީރާނުގެ ކަނޑުގެ ބޯޑަރާ ގާތްގަނޑަކަށް 340 ކިލޯމީޓަރު ދުރުގައި އޮއްވާ އެ މަނަވަރަށް ހަމަލާދީ ހުއްޓުވާފައިވާ ކަމަށެވެ.

މި މަނަވަރު އެ ސަރަހައްދަށް ދަތުރުކުރީ އީރާނާ ދެކޮޅަށް އެމެރިކާއިން ވަރުގަދަކުރަމުންދާ އަސްކަރީ ހަރަކާތްތަކުގެ ދަށުން، މިހާރު ހިނގަމުންދާ ހަނގުރާމައިގެ ތެރޭގައި ސްޓްރެޓީޖިކް ގޮތުން މުހިންމު ހޮރްމޫޒް ކަނޑުއޮޅި މޮނިޓަރކޮށް ކޮންޓްރޯލް ކުރުމުގެ މަގުސަދުގައެވެ.

ހަމަލާ އަމާޒުވުމާއެކު، ޔޫ.އެސް.އެސް އަބްރަހަމް ލިންކަން އާއި އެއާއެކު ދަތުރުކުރި ހަނގުރާމަމަތީ މަނަވަރުތައް (ޑިސްޓްރޯޔާސް) ވަރަށް ބާރު ސްޕީޑެއްގައި އެ ސަރަހައްދު ދޫކޮށް ފިލައިގެންދާ މަންޒަރު ވަނީ ފެނިފައެވެ.

"މި ހަމަލާއަށްފަހު އެމެރިކާގެ މަނަވަރުތައް ވަނީ އެ ސަރަހައްދާ 1،000 ކިލޯމީޓަރަށްވުރެ ދުރަށް ފަހަތަށް ޖެހިފައި،" ތަރުޖަމާނު ފާހަގަކުރެއްވިއެވެ. އަދި އެމެރިކާގެ އަސްކަރީ ބާރު ދައްކައިގެން ބިރުގަންނަވަން ކުރި މަސައްކަތް ނާކާމިޔާބުވެފައިވާ ކަމަށްވެސް އޭނާ ވިދާޅުވިއެވެ.

ލިންކަން ސްޓްރައިކް ގްރޫޕް ފަހަތަށް ޖެހިފައި މިވަނީ، އެމެރިކާ އާއި އިޒްރޭލުން އެއްވެސް އުދުވާނަކާ ނުލައި އީރާނަށް ދެމުންދާ ހަމަލާތަކާ ގުޅިގެން މަސްރަހު ވަރަށް ބޮޑަށް ހޫނުވެފައިވާ ދަނޑިވަޅެއްގައެވެ.

މި ރިޕޯޓު ޝާއިއުކުރި ވަގުތާ ހަމައަށްވެސް، އެމެރިކާގެ ޕެންޓަގަންއިން އެ މަނަވަރަށް ލިބުނު ގެއްލުމުގެ ތަފްސީލެއް ނުވަތަ ކުއްލި ގޮތަކަށް ފަހަތަށް ޖެހެންޖެހުނު ސަބަބާ ގުޅޭގޮތުން އެއްވެސް އެއްޗެއް ބުނެފައެއް ނުވެއެވެ.

މީގެ އިތުރުން، ވޭތުވެދިޔަ ހޮނިހިރު ދުވަހުވެސް އައި.އާރް.ޖީ.ސީ އިން ވަނީ ހަތަރު ބެލިސްޓިކް މިސައިލް ބޭނުންކޮށްގެން ޔޫ.އެސް.އެސް އަބްރަހަމް ލިންކަންއަށް އަމާޒުކޮށް ހަމަލާދީފައެވެ.

އެމެރިކާގެ މަތިންދާބޯޓު އުފުލާ މަނަވަރަށް މި ހަމަލާތައް ދީފައިވަނީ، އިންޑިއާއިން އެނބުރި ދަތުރުކުރަނިކޮށް ސްރީލަންކާ ކައިރިން އީރާނުގެ އަސްކަރިއްޔާގެ "ފްރިގޭޓް ދޭނާ" މަނަވަރަށް އެމެރިކާއިން ދިން ހަމަލާއާ ގުޅިގެން ބަދަލުހިފުމުގެ ގޮތުންނެވެ.

އެމެރިކާއިން ދިން އެ ފިނޑި ހަމަލާގެ ވަގުތުގައި އީރާނުގެ މަނަވަރުގައި 120 އަށްވުރެ ގިނަ ފަޅުވެރިން ތިއްބެވެ. އެ ހަމަލާ އީރާނުގެ އެތެރޭގައާއި ބައިނަލްއަގުވާމީ ފެންވަރުގައިވެސް ގިނަ ބަޔަކު ވަނީ ކުށްވެރިކޮށްފައެވެ.