ޤަތަރާއި ބަހްރެއިން ގައި ބާރު ގަދަ ގޮވުން ތަކެއްގެ އަޑު އިވިއްޖެ

ޤަތަރުގެ ވެރި ރަށް ދޯހާ އާއި، ބަހްރެއިންގެ ވެރި ރަށް މަނާމާގައި ބާރު ގަދަ ގޮވުން ތަކެއްގެ އަޑާ އެކު، ގުގުމުގެ އިޙުސާސް ކުރެވިފައިވާ ކަމަށް މީޑިއާ ތަކުގައިި ރިޕޯޓު ކޮށްފި އެވެ. 

އޭއެފްޕީ އިން ބުނެފައި ވަނީ، ބުރާސްފަތި ދުވަހު އެ ގޮވުން ތަކުގެ އަޑު އިވިފައިވާ ކަމަށާއި، އެއާ އެކު ގުގުމުގެ އިޙުސާސް ކުރެވިފައިވާ ކަމަށެވެ. މި ގޮވުން ތަކުގެ އަޑު އިވިފައިވާ ކަމަށް ބުނެފައިވާއިރު، މިއީ އެމެރިކާ އާއި އިޒްރޭލް އިން ދިން ހަމަލާ ތަކުގެ ރައްދުގައި އީރާން އިން ވަރުގަދަ ހަމަލާ ތަކެއް ދެމުން އަންނަ ވަގުތެކެވެ. 

އީރާން އިން އަންނަނީ ސަރަހައްދުގައި ހުރި އެމެރިކާގެ ބޭސް ތަކުގެ އިތުރުން، އެމެރިކާގެ އެމްބަސީ ތަކަށް ވެސް ހަމަލާ ދެމުންނެވެ. އެ ހަމަލާ ތަކުގެ ސަބަބުން، އެ ޤައުމު ތަކުގައި ހުރި އެމެރިކާގެ ބޭސް ތަކާއި، އެމްބަސީ ތަކަށް ވެސް ބޮޑު ގެއްލުން ތަކެއް ލިބެމުން އަންނަ ކަމަށް ވަނީ ރިޕޯޓު ކޮށްފަ އެވެ. 

ޤަތަރާއި ބަހްރެއިންގައި އިވުނު ގޮވުން ތަކުގެ އަޑަކީ، އީރާން އިން ދިން ހަމަލާތަކާ ގުޅިފައިވާ ކަމެއްތޯ، ނުވަތަ ނޫންތޯ މިހާތަނަށް ރަަސްމީކޮށް ހާމަ ކޮށްފައި ނުވެ އެވެ. ނަމަވެސް، ސަރަހައްދުގައި ހުރި އެމެރިކާގެ އަމާޒު ތަކަށް އީރާން އިން ދެމުން އަންނަ ހަމަލާ ތަކުގެ ސަބަބުން ނުތަނަވަސްކަން ވަނީ އިތުރުވެފަ އެވެ. 

އީރާންއާ ދެކޮޅަށް އެންމެ ފުރަތަމަ ހަމަލާ ދީފައި ވަނީ އެމެރިކާ އާއި އިޒްރޭލް އިންނެވެ. އެއާ އެކު، ރައްދުގައި އީރާން އިން ހަމަލާ ދޭން ފަށާފައިވާއިރު، އެ ހަމަލާ ތަކުގައި އިޒްރޭލްގެ އެކި ސަރަހައްދު ތަަކަށް ވެސް ބޮޑެތި ގެއްލުން ތަކެއް ލިބެމުން އަންނަ ކަމަށް ފާހަގަވެފައިވެ އެވެ.