އިޓަލީ އިން، ގަލްފުގެ ޤައުމު ތަކަށް ވައިގެ ދިފާއީ އެހީތެރިކަން ދެނީ

އެމެރިކާ އާއި އިޒްރޭލް އިން ދިން ހަމަލާ ތަކުގެ ބަދަލުގައި އީރާން އިން ދެމުން އަންނަ ހަމަލާ ތަކުގެ ސަބަބުން، ގަލްފުގެ ޤައުމު ތަކަށް ވައިގެ މަގުން ދިފާއުވުމަށް ބޭނުންވާ އެހީތެރިކަން ފޯރުކޮށްދޭނެ ކަމަށް އިޓަލީގެ ބޮޑު ވަޒީރު ޖޯޖިއޯ މެލޯނީ ވިދާޅުވެއްޖެ އެވެ. 

އިޓަލީގެ ބޮޑު ވަޒީރު މެލޯނީ އެކަން ހާމަ ކުރައްވާފައި ވަނީ، ބުރާސްފަތި ދުވަހު އާރުޓީއެލް 102.5 ރޭޑިއޯ އަށް ދެއްވި ބަސްދީ ގަތުމެއްގަ އެވެ. 

މެލޯނީ ވިދާޅުވީ، އިނގިރޭސިވިލާތާއި، ފްރާންސް އދި ޖަރުމަނާ އެއްފަދައިން އިޓަލީ އިން ވެސް ގަލްފުގެ ޤައުމު ތަކަށް އެހީތެރިކްނ ފޯރު ކޮށްދިނުމަށް ގަސްދު ކުރާ ކަމަށެވެ. މި އެހީތެރިކަމަކީ ހަމައެކަނި ދިފާއީ ކަންކަމަށް، ނުވަތަ ޚާއްސަކޮށް ވައިގެ މަގުން ދޭ ހަމަލާ ތަކުން ދިފާއުވުމަށް ފޯރުކޮށްދޭ އެހީތެރި ކަމެއްކަން އެކަމަނާ ފާހަގަ ކުރެއްވި އެވެ. 

މި ނިންމެވުމާ ގުޅޭ ގޮތުން އިތުރަށް ވާހަކަ ދައްކަވަމުން މެލޯނީ ވިދާޅުވީ، ގަލްފުގެ ޤައުމު ތަކަކީ އިޓަލިއާ ވަރަށް ގާތް ގުޅުމެއް އޮންނަ ޤައުމު ތަކަކަށް ވުމުގެ އިތުރުން، އެ ސަރަހައްދުގައި އިޓަލީގެ އެތައް ހާސް ރައްޔިތުންނެއް ދިރިއުޅެމުން އަންނަ ކަމަށެވެ. އެގޮތުން އެ ސަރަހައްދުގައި އިޓަލީގެ 10،000 އަށް ވުރެ ގިނަ ރައްޔިތުންނާއި، 2000 ސިފައިން ތިބިއިރު، އެ މީހުންގެ ރައްކާތެރިކަން ކަށަވަރު ކުރުމަކީ ސަރުކާރުގެ ޒިންމާއެއް ކަަމަށް ބޮޑު ވަޒީރު ވިދާޅުވި އެވެ. 

މީގެ އިތުރުން ގަލްފު ސަރަހައްދަކީ އިޓަލީ އާއި، މުޅި ޔޫރަޕަަށް ބޭނުންވާ ހަކަތަ ފޯރުކޮށްދިނުމުގައި މުހިންމު ދައުރެއް އަދާ ކުރާ ސަރަހައްދެއް ކަމަށް ވެސް މެލޯނީ ފާހަގަ ކުރެއްވި އެވެ. އެހެންކަމުން، އެ ސަރަހައްދުގެ ހަމަޖެހުން ޤާއިމު ކުރުމަކީ، އިޓަލީގެ އިޤްތިޞާދީ މަސްލަހަތާ ވެސް ގުޅިފައިވާ ކަމެއް ކަމަށް އޭނާ ވިދާޅުވި އެވެ. 

މި ހަނގުރާމައިގައި އިޓަލީގައި ހުންނަ އެމެރިކާގެ އަސްކަރީ ތިން ބޭސް ބޭނުން ކޮށްފައިވޭތޯ ސުވާލު ކުރުމުން މެލޯނީ ވިދާޅުވީ، ބޮން އެޅުން ނޫން އެހެން ހުރިހާ ކަމެއް ކުރުމުގެ ހުއްދަ މިހާރު ވެސް އެ ބޭސް ތަކަށް އޮންނާނެ ކަމަށެވެ. ނަމަވެސް، އެ ސިޔާސަތަށް އެއްވެސް ބަދަލެއް ގެންނަ ނަމަ، އެކަމާ މެދު ސަރުކާރުން މަޝްވަރާ ކުރާނެ ކަމަށާއި، އިޓަލީގެ ޤާނޫނު ހަދާ މަޖިލީހުގެ ލަފާ ހޯދަން ޖެހޭނެ ކަމަށް ވެސް މެލޯނީ ވިދާޅުވި އެވެ.