އެމެރިކާ އާއި އިޒްރޭލް އިން މަސައްކަތް ކުރަނީ އަރަބި ޤައުމުތައް ހަނގުރާމަ އަކަށް ވައްދަން: ރަޝިޔާ

އެމެރިކާ އާއި އިޒްރޭލް އިން މަސައްކަތް ކުރަމުން ދަނީ، އަރަބި ޤައުމުތައް ހަނގުރާމަ އަކަށް ވައްދަން ކަމަށް ރަޝިޔާ އިން ބުނެފި އެވެ. 

ރަޝިޔާގެ ފޮރިން މިނިސްޓްރީ އިން ނެރުނު ބަޔާނެއްގައި ބުނެފައި ވަނީ، އެމެރިކާ އާއި އިޒްރޭލް އިން ގަސްދުގައި އީރާން އަށް ހަމަލާ ދިނުމަށް ފަހު، ބަދަލުގައި ހަމަލާ ދިނުމަށް އީރާން އަށް މަޖުބޫރު ކޮށްފައިވާ ކަމަށެވެ. މެދު އިރުމަތީގައި ހުރި އެމެރިކާގެ އަސްކަރީ ބޭސްތަކާއި، އެމްބަސީ ތަކަަށް އީރާން އިން ދެމުން އަންނަ ހަމަލާ ތަަކަށް އިޝާރާތްކޮށް ރަޝިޔާ އިން ބުނީ، އެ ހަމަލާ ދިނުމަށް އީރާން އަށް މަޖުބޫރު ކުރީ އެމެރިކާ އާއި އިޒްރޭލް އިން ކަމަށެވެ. 

ފޮރިން މިނިސްޓްރީގެ ބަޔާނުގައި ބުނީ، އެ ހަމަލާ ތަކުގެ ސަބަބުން އިންސާނީ ފުރާނަ އަށާއި، މުދަލަށް ބޮޑެތި ގެއްލުން ތަކެއް ލިބިފައިވާތީ ރަޝިޔާ އިން އެކަމާ ކަންބޮޑުވާ ކަމަށެވެ. އަދި އެމެރިކާ އާއި އިޒްރޭލް އިން މިފަދަ އަމަލުތައް ހިންގަނީ، އެހެން ބައެއްގެ މަސްލަޙަތު ހިމާޔަތް ކުރުމަށްޓަކައި، އަރަބި ޤައުމުތައް ހަނގުރާމައެއްގެ ތެރެއަށް ވެއްދުމަށް މަސައްކަތް ކުރާ ކަމަށް ރަޝިޔާގެ ބަޔާނުގައި ބުނެފައިވެ އެވެ.  

މެދު އިރުމަތީގެ މަސްރަހު އިތުރަށް ގޯސްވިޔަ ނުދީ ހިފެހެއްޓޭނެ ހަމައެކަނި ގޮތަކީ، އެމެރިކާ އާއި އިޒްރޭލް އިން ހިންގަމުންދާ އުދުވާނީ އަމަލުތައް ހުއްޓާލުމަށް ކަމަށް ވެސް ރަޝިޔާ އިން ވަނީ ބުނެފަ އެވެ. ނަމަވެސް، މި ދެ ޤައުމުން ދެމުންދާ ހަމަލާތައް ހުއްޓާލާނެ ކަމުގެ އެއްވެސް ނިޝާމެއް ފެންނަން ނެތް ކަމަށް ވެސް، ރަޝިޔާގެ ފޮރިން މިނިސްޓްރީ އިން ބުނެފައިވެ އެވެ. 

އެ ބަޔާނުގައި ރަޝިޔާ އިން ވަނީ މެދު އިރުމަތީގެ ހަމަޖެހުން ގެއްލުވާލުމަށް އެމެރިކާ އާއި އިޒްރޭލް އިން ރާވައިގެން މަސައްކަތް ކުރަމުންދާ ކަމަށް ބުނެ، އެކަމަށް ވަރަށް ބޮޑަށް ފާޑު ކިޔައިފަ އެވެ. އަދި ސަރަހައްދީ މަސްލަހަތު ރައްކާތެރި ކުރުމަަށްޓަކައި މިފަދަ އަމަލުތައް ހުއްޓުވަން ޖެހޭ ކަމަށް ވެސް ރަޝިޔާ އިން ބުނެފައިވެ އެވެ.