ތެޔޮ ފީފާ އެއް 150 ޑޮލަރަށް އުފުލިދާނެ، ޑީސަލްގެ އަގުތައް އާދަޔާ ހިލާފަށް ބޮޑުވެ, އެލްއެންޖީ ގެ އަގު 40 އިންސައްތަ އަށް އުފުލިއްޖެ
މެދުއިރުމަތީގެ ހަމަނުޖެހުންތަކާ ގުޅިގެން ތެލާއި ގޭހުގެ އަގުތައް މިހާރުވެސް އުފުލެމުންދާއިރު، މީގެ ސަބަބުން ދުނިޔޭގެ ބާޒާރަށާއި އެމެރިކާގެ ސިޔާސީ މަސްރަހަށް ބޮޑެތި ގޮންޖެހުންތަކެއް ކުރިމަތިވާނެ. އަދި ތެޔޮ ފޯރުކޮށްދިނުމަށް ބުރޫއަރައިފިނަމަ، ގައުމުތަކުގެ އިގްތިސާދަށް އާދަޔާ ހިލާފު ނޭދެވޭ އަސަރުތަކެއް ކުރާނެ ކަމަށް ބެލެވޭ.
ހޮރްމޫޒް ކަނޑުއޮޅީގެ ދަތުރުފަތުރުތަކަށް ބުރޫއެރުމާ ގުޅިގެން، 2026 މާރިޗު 2 ވަނަ ދުވަހު ދުބާއީގެ އައްސޭރިފަށާ ދުރުގައި، ޔުނައިޓެޑް އަރަބް އެމިރޭޓްސް (ޔޫއޭއީ) ގެ ސަރަހައްދީ ރަތްކަނޑުގައި އާގުބޯޓު ފަހަރު ބަނދަރުކޮށްފައި އޮތް މަންޒަރު. | ގެޓީ އިމޭޖަސް
ހޮރްމޫޒް ކަނޑުއޮޅި ބަންދުކޮށްފިނަމަ ސާފުނުކުރާ ތެޔޮ ފީފާއެއްގެ އަގު 150 ޑޮލަރަށް އުފުލިދާނެ ކަމުގެ އިންޒާރު މާހިރަކު ދެއްވައިފިއެވެ.
އެނާޖީ އިކޮނޮމިސްޓެއް ކަމަށްވާ އެޑް ހާރްސް އަލްޖަޒީރާ އާ ވާހަކަދައްކަވަމުން ވިދާޅުވި ގޮތުގައި، އީރާނާ ދެކޮޅަށް އެމެރިކާ އާއި އިޒްރޭލުން ދެމުންދާ އަސްކަރީ ހަމަލާތަކާ ގުޅިގެން ތެޔޮ ފޯރުކޮށްދިނުމަށް ބުރޫއަރަމުންދާނަމަ، ދުނިޔޭގެ ބާޒާރުގައި ތެލުގެ އަގުތައް މައްޗަށް ދިއުން ކުރިއަށް އޮތް ތަނުގައިވެސް ދެމިއޮންނާނެއެވެ.
ޔުނިވަރސިޓީ އޮފް ހިއުސްޓަންގެ ލެކްޗަރާއެއްގެ މަގާމުވެސް ފުރުއްވާ ހާރްސް ވިދާޅުވީ، އެމެރިކާގެ ކަނޑުގެ ސިފައިންނަށް ތެޔޮ އުފުލާ ބޯޓުފަހަރަށް ސަލާމަތްތެރިކަން ފޯރުކޮށްނުދެވި، ހޮރްމޫޒް ކަނޑުއޮޅިން އުފުލާ ތެލުގެ ދެބައިކުޅަ އެއްބައި ހުއްޓުމަކަށް އަތުވެއްޖެނަމަ، ވަކި މުއްދަތަކަށް ތެޔޮ ފީފާއެއްގެ އަގު 150 ޑޮލަރަށް އުފުލިގެންދާ މަންޒަރު ފެނިދާނެ ކަމަށެވެ.
އަލްޖަޒީރާއަށް މައުލޫމާތު ދެއްވަމުން ހާރްސް ވިދާޅުވީ، އެލް.އެން.ޖީ ނުވަތަ ގުދުރަތީ ގޭހުގެ ބާޒާރަށް މިކަމުގެ އަސަރު މިހާރުވެސް ކުރަން ފަށާފައިވާ ކަމަށާއި، ފުރަތަމަ ދުވަހުވެސް އަގުތައް 40 އިންސައްތައަށްވުރެ މައްޗަށް ގޮސްފައިވާ ކަމަށެވެ. އަދި މި ހަފުތާގެ ހޯމަ އަދި އަންގާރަ ދުވަހާ ދެމެދު ޔޫރަޕްގެ ގައުމުތަކުގައި ގުދުރަތީ ގޭހުގެ އަގު ގާތްގަނޑަކަށް ދެގުނަ އުފުލިފައިވާކަން އޭނާ ފާހަގަކުރެއްވިއެވެ.
މީގެ އިތުރުން، ޑީސަލްގެ އަގުތައްވެސް އާދަޔާ ހިލާފަށް ބޮޑުވެފައިވާ ކަމަށް ހާރްސް ވިދާޅުވިއެވެ. އޭނާ ފާހަގަކުރެއްވި ގޮތުގައި ގޭހަށް ބަރޯސާވާ ބައެއް ގައުމުތަކުން މިހާރު ވަނީ ގިނަ އަދަދަކަށް ޕެޓްރޯލް ގަންނަން ފަށާފައެވެ. މީގެ ސަބަބުން އެމެރިކާގެ ބައެއް ސްޓޭޓްތަކުން ކުރިއަށް އޮތް ތަނުގައި ތެޔޮ ހޯދުމަށް ކުރަން ހުރި އޯޑަރުތަކަށް ވަނީ އަސަރުކޮށްފައެވެ.
ހާރްސް އިތުރަށް ވިދާޅުވީ، މީގެ ސަބަބުން އެމެރިކާގެ ނިއު އިންގްލެންޑް ސަރަހައްދުގެ ސްޓޭޓްތަކަށް ވަރަށް ބޮޑު ނޭދެވޭ އަސަރެއް ކުރާނެ ކަމަށެވެ. އަދި މި ހާލަތުގައި، ކުރިއަށް އޮތް މިޑްޓާމް އިންތިޚާބާ ދިމާކޮށް، އެމެރިކާގެ ރައީސް ޑޮނަލްޑް ޓްރަމްޕަށް ގައުމުގެ އެތެރޭގެ ސިޔާސީ މަސްރަހުގައި ވަރަށް ބޮޑެތި ގޮންޖެހުންތަކަކާ ކުރިމަތިލައްވަން ޖެހިވަޑައިގަންނަވާނެ ކަމަށްވެސް އޭނާ ވިދާޅުވިއެވެ.
މަސްދަރު: އަލް ޖަޒީރާ
