އަހަރެންގެ ބަސް ނޯޓު ކުރޭ، އެމެރިކާ އިން ހިތި ހިތާމައާ ކުރިމަތިލާން ޖެހޭނެ: އީރާންގެ ފޮރިން މިނިސްޓަރު

ސްރީ ލަންކާ ކައިރީގައި އޮތް އީރާންގެ ހަނގުރާމަ މަތީ އުޅަނދަކަށް އެމެރިކާ އިން ހަމަލާދީ، ކަނޑު ފައްތާލާފައި ވަނިކޮށް، އީރާންގެ ފޮރިން މިނިސްޓަރު އައްބާސް އަރާގްޗީ ވަރަށް ވަރުގަދަ އިންޒާރެއް ދެއްވައިފި އެވެ. 

އެކްސްގައި ކުރެއްވި ޕޯސްޓެއްގައި އަރާގްޗީ ވިދާޅުވީ، އެމެރިކާ އިން އީރާންގެ ކަނޑުން 2000 މޭލު ދުރުގައި ކަނޑު މަތީގައި ބިރިވެރި ހަމަލާއެއް ހިންގާފައިވާ ކަމަށެވެ. އިންޑިއާގެ ނޭވީގެ މެހެމާނެއްގެ ގޮތުގައި ޙަރަކާތްތެރިވި، އަދި ގާތް ގަނޑަކަށް 130 ސިފައިން ތިބި ފްރިގޭޓް ޑީނާ އަށް ބައިނަލްއަޤުވާމީ ކަނޑުގައި އިންޒާރެއް ދިނުމެއް ނެތި، ހަމަލާ ދީފައިވާ ކަމަށް އަރާގްޗީ ވިދާޅުވި އެވެ. 

އެއަށް ފަހު އަރާގްޗީ ވަނީ އެމެރިކާ އަށް ވަރުގަދަ އިންޒާރެއް ދެއްވައިފަ އެވެ. އެގޮތުން އޭނާގެ ބަސްތައް ނޯޓު ކުރެއްވުމަށް އެދޭ ކަމަށާއި، އެމެރިކާ އިން ފަށާފައިވާ މި ނުބައި އަމަލު ތަކުގެ ސަބަބުން އެ ޤައުމުން ހިތި ހިތާމައާ ކުރިމަތިލާން ޖެހޭނެ ކަމަށް ވެސް އަރާގްޗީ ވިދާޅުވެފައިވެ އެވެ. 

މި ހަމަލާ އަކީ އީރާން އާއި، އެމެރިކާއާ ދެމެދު އޮތް ދިގު މުއްދަތުގެ ނުތަނަވަސް ކަމުގެ ތެރޭގައި، މިއީ އެންމެ ފަހުން ހިނގާފައިވާ ކަންތައް ތަކެވެ. މި ހަމަލާގެ ސަބަބުން އީރާންގެ ހަނގުރާމަ މަތީ އުޅަނދު ކަނޑު ފައްތާފައިވާއިރު، އެ އުޅަނދުގައި ތިބި ސިފައިންގެ ރައްކާތެރިކަން އަދި ސަލާމަތާ މެދު ވެސް ވަނީ ސުވާލު އެފެދިފަ އެވެ. 

މީގެ އިތުރުން އަރާގްޗީ ވިދާޅުވީ، އެ ހަމަލާ އަކީ ބައިނަލްއަޤުވާމީ ޤާނޫނާ ޚިލާފު ޙަރަކާތެއް ކަމަށާއި، އިންޑިއާގެ މެހެމާނުންގެ ގޮތުގައި ދަތުރު ކުރަމުން ދިޔަ އުޅަނދަކަށް ހަމަލާ ދިނުމަކީ ބަލައި ގަނެވޭނެ ކަމެއް ނޫން ކަމަށެވެ. 

މި ހަމަލާތަކާ ގުޅޭ ގޮތުން އެމެރިކާގެ ސަރުކާރުން މިހާތަނަށް ރަސްމީކޮށް އެއްޗެއް ބުނެފައި ނުވެ އެވެ. ނަމަވެސް، މިކަމުގެ ސަބަބުން ސަރަހައްދީ އަދި ސިޔާސީ ޙާލަތު ވެސް އިތުރަށް ބަދަލުވެ، ދެ ޤައުމުގެ ދެ މެދުގައި އޮތް ނުތަނަވަސްކަން ވަނީ އިތުރުވެފަ އެވެ. އެއާ އެކު، އީރާން އިން މި ވަނީ އެމެރިކާގެ ކިބައިން ބަދަލު ހިފާނެ ކަމުގެ އިންޒާރު ވެސް ދީފަ އެވެ.