"ނިމުމަކަށް" އަންނަންދެން ހަނގުރާމަ ކުރިއަށް ގެންދަން، އެމެރިކާ އިން އިޒްރޭލް އަށް އަންގައިފި

އެމެރިކާ އާއި އިޒްރޭލް އިން އީރާންއާ ދެކޮޅަށް ކުރިއަށް ގެންދަމުން އަންނަ ހަނގުރާމަ، ނިމުމަކަށް އަންނަންދެން ކުރިއަށް ގެންދިޔުމަށް އެމެރިކާ އިން އިޒްރޭލް އަށް އަންގައިފި އެވެ. 

އިޒްރޭލްގެ ޑިފެންސް މިނިސްޓްރީ އިން އެކަން ހާމަކޮށް ބުނެފައި ވަނީ، އެމެރިކާގެ ފަރާތުން އެހެން އެންގެވީ އެ ޤައުމުގެ ސެކްރެޓަރީ އޮފް ވޯ ޕީޓް ހަގްސެތު ކަމަށެވެ. ހެގްސެތު އެފަދައިން އަންގަވާފައި ވަނީ، އިޒްރޭލްގެ ޑިފެންސް މިނިސްޓަރު އިޒްރާއީލް ކާޓްޒްއާ އެކު ކުރިއަށް ގެންދިޔަ މަޝްވަރާ ތަކުގަ އެވެ. 

އެ ބައްދަލުވުމުގައި އިޒްރޭލްގެ ޑިފެންސް މިނިސްޓަރު ކާޓްޒް ވަނީ، އީރާން އިން ދެމުން އަންނަ މިސައިލް ހަމަލާ ތަކުން އިޒްރޭލްގެ ރައްޔިތުން ދިފާއު ކުރުމަށް، އެމެރިކާ އިން ފުޅާ ދާއިރާއެއްގައި ފޯރުކޮށްދެމުންދާ އެހީތެރި ކަމަށްޓަކައި ޝުކުރު އަދާ ކުރައްވައިފަ އެވެ. އެމެރިކާ އާއި އިޒްރޭލް އިން އީރާން އަށް ހަމަލާ ދިނުމާ ގުޅިގެން، އީރާން އިން އަންނަނީ އެ ޤައުމުގެ ދިފާއުގައި ގިނަ ހަމަލާ ތަަކެއް ދެމުންނެވެ.

އެމެރިކާގެ ޖޮއިންޓް ޗީފްސް އޮފް ސްޓާފްގެ ޗެއާމަން ޖެނަރަލް ޑޭން ކޭން ބުދަ ދުވަހު ވިދާޅުވީ، އީރާން އަށް ދެމުންދާ ވަރުގަދަ ހަމަލާތަކާ އެކު އެމެރިކާގެ އަސްކަރިއްޔާ އިން ބޮޑެތި ކުރިއެރުން ތަކެއް ހޯދަމުންދާ ކަމަށެވެ. އޭނާ ފާހަގަ ކުރެއްވި ގޮތުގައި އީރާން އިން ފޮނުވާލާ ބެލިސްޓިކް މިސައިލް ތަކުގެ އަދަދު، ހަނގުރާމަ ފެށުނު ދުވަހާ އަޅާބަލާއިރު މިހާރު ވަނީ 86 އިންސައްތަ ދަށްވެފަ އެވެ. 

މީގެ އިތުރުން ޖެނަރަލް ކޭން ވިދާޅުވީ، އީރާން އިން ހަމަލާ ދިނުމަށް ބޭނުން ކުރާ ޑްރޯން ތަކުގެ އަދަދު ވެސް، ހަނގުރާމައިގެ ކުރީ ކޮޅާ އަޅާބަލާއިރު 73 އިންސައްތަ ދަށްވެފައިވާ ކަމަށެވެ. މިއީ އީރާންގެ އަސްކަރީ ޤާބިލުުކަން ކުޑަ ކުރުމަށް ކުރަމުންދާ މަސައްކަތަށް ލިބުނު ބޮޑު ކާމިޔާބެއްގެ ގޮތުގައި އެމެރިކާގެ އަސްކަރިއްޔާ އިން ވަނީ ސިފަ ކޮށްފަ އެވެ. 

ހަނގުރާމަ ނިމެންދެން ކުރިއަށް ގެންދިޔުމަށް އެމެރިކާ އިން އިޒްރޭލް އަށް އަންގާފައިވާއިރު، އެމެރިކާ އާއި އިޒްރޭލް އަކީ ގާތް ގުޅުމެއް ބާއްވަމުން އަންނަ ދެ ޤައުމެވެ.