އެމެރިކާގެ އަސްކަރިއްޔާއާ އެކު މަސައްކަތް ކުރުމަށް އެއްބަސްވެފައިވާ ކަމަށް ބުނެ ވައިޓް ހައުސްއިން ދެއްކި ވާހަކަތައް ސްޕެއިންއިން ދޮގުކޮށްފި
އީރާނާ ދެކޮޅަށް އެމެރިކާއިން ކުރާ ހަނގުރާމައިގައި ސްޕެއިންގެ އެއްބާރުލުން ލިބޭނެ ކަމަށް ވައިޓް ހައުސްއިން ބުނި ބުނުން އެ ގައުމުގެ ސަރުކާރުން ވަނީ ކަނޑައެޅިގެން ދޮގުކޮށްފައި. ސްޕެއިންގެ ބޮޑުވަޒީރު ޕެޑްރޯ ސަންޗޭޒް ވިދާޅުވީ އެ ގައުމުގެ ސިޔާސަތަކީ އަދިވެސް ހަނގުރާމައާ ދެކޮޅު ހެދުން ކަމަށާއި، ބޮން އަޅައިގެން މައްސަލަތައް ހައްލުކުރެވޭނެ ކަމަށް ގަބޫލުނުކުރައްވާ ކަމަށް. އެމެރިކާގެ ރައީސް ޑޮނަލްޑް ޓްރަމްޕް ވިޔަފާރީގެ ގުޅުން ކަނޑާލާނެ ކަމުގެ އިންޒާރު ދެއްވާފައިވީ ނަމަވެސް، ސްޕެއިންއިން ވަނީ ބައިނަލްއަގުވާމީ ގާނޫނުތަކަށް އިހުތިރާމްކުރުމުގައި ދެމިއޮންނާނެ ކަމަށް ބުނެފައި.
މާރިޗު މަހުގެ 4 ވަނަ ދުވަހު ލުބުނާނުގެ ދެކުނުގެ އައްސޭރިފަށުގެ ރަށެއް ކަމަށްވާ ޓައިރްގައި ހުންނަ ސޯލާ ފާމަކަށާއި ކަރަންޓު އުފައްދާ މަރުކަޒަކަށް އިޒްރޭލުން ދިން ވަރުގަދަ ހަމަލާތަކާ ގުޅިގެން ރޯވި ބޮޑު އަލިފާންގަނޑު ނިއްވުމަށް އެ ގައުމުގެ ސިވިލް ޑިފެންސް ފޯސްތަކުން މަސައްކަތް ކުރަނީ. | ގެޓީ އިމޭޖަސް
އީރާނާ ދެކޮޅަށް ކުރަމުންދާ ހަނގުރާމައިގައި އެމެރިކާގެ އަސްކަރިއްޔާއާ އެކު ސްޕެއިންއިން މިހާރު އެއްބާރުލުން ދެމުންދާ ކަމަށް ބުނެ ވައިޓް ހައުސްއިން ދެއްކި ވާހަކަތައް ސްޕެއިން ސަރުކާރުން ދޮގުކޮށްފިއެވެ.
ސްޕެއިންއިން މިކަން ދޮގުކޮށްފައި މިވަނީ، އެ ގައުމުން ގެންގުޅޭ ސިޔާސަތުގެ ސަބަބުން ވިޔަފާރީގެ މުއާމަލާތްތައް މެދުވެރިކޮށް ސްޕެއިންއަށް އަދަބު ދޭނެ ކަމުގެ އިންޒާރު އެމެރިކާގެ ރައީސް ޑޮނަލްޑް ޓްރަމްޕް ދެއްވާފައި ވަނިކޮށެވެ.
ވައިޓް ހައުސްގެ ތަރުޖަމާނު ކެރޮލިން ލީވިޓް ބުދަ ދުވަހު ވިދާޅުވީ، އީރާނާ ދެކޮޅަށް ކުރާ ހަނގުރާމައިގައި ސްޕެއިންގައި ހުންނަ އެ ގައުމުގެ އަސްކަރީ މަރުކަޒުތައް ބޭނުންކުރުމުގެ ހުއްދަ ނުދިނުމަށް ސްޕެއިންއިން ކުރިން ގެންގުޅުނު އުސޫލު މިހާރު ބަދަލުވެފައިވާ ކަމަށެވެ. ނޫސްވެރިންނާ ވާހަކަދައްކަވަމުން ލީވިޓް ވިދާޅުވީ، އިއްޔެ ރައީސް ޓްރަމްޕް ދެއްވި މެސެޖު ސްޕެއިންއަށް ވަރަށް ސާފުކޮށް އަޑުއިވިފައިވާ ކަމަށް ގަބޫލުކުރައްވާ ކަމަށާއި، ފާއިތުވި މަދު ގަޑިއިރުތަކުގެ ތެރޭގައި އެމެރިކާގެ އަސްކަރިއްޔާއާ އެކު މަސައްކަތް ކުރުމަށް ސްޕެއިންއިން އެއްބަސްވެފައިވާ ކަމުގެ މައުލޫމާތު ލިބިފައިވާ ކަމަށެވެ.
ނަމަވެސް، ސްޕެއިން ސަރުކާރުން ވަނީ ވަގުތުން އެ ވާހަކަތައް ދޮގުކޮށްފައެވެ. ސްޕެއިންގެ ފޮރިން މިނިސްޓަރު ހޯސޭ މެނުއަލް އަލްބަރޭޒް ވިދާޅުވީ ވައިޓް ހައުސްގެ އެ ވާހަކަ "ސީދާ ގޮތެއްގައި" ދޮގުކުރައްވާ ކަމަށެވެ.
"ހޯރާ25" ރޭޑިއޯ ޕްރޮގްރާމުގައި ވާހަކަދައްކަވަމުން އަލްބަރޭޒް ވިދާޅުވީ، ސްޕެއިންގެ ސިޔާސަތަށް އެއްވެސް ބަދަލެއް އައިސްފައި ނުވާ ކަމަށާއި، އެމެރިކާއިން އެ އިޝާރާތް ކުރަނީ ކޮން ކަމަކަށް ކަމެއް އެއްގޮތަކަށްވެސް އެނގިވަޑައިނުގަންނަވާ ކަމަށެވެ.
އީރާނާ ދެކޮޅަށް ކުރާ ހަނގުރާމައާ ސްޕެއިންއިން ދެކޮޅު ހަދާތީ، އަންގާރަ ދުވަހު ރައީސް ޓްރަމްޕް ވަނީ އެ ގައުމަށް ވަރަށް ބޮޑަށް ފާޑުވިދާޅުވެ، އެއީ "ބިރުވެރި" ނިންމުމެއްގެ ގޮތުގައި ސިފަކުރައްވާފައެވެ.
އެމެރިކާގެ ރައީސް ވިދާޅުވީ ސްޕެއިންއާ އެކު ކުރާ ހުރިހާ ވިޔަފާރިއެއް ހުއްޓާލާނެ ކަމަށާއި، އެ ގައުމާ އެކު އެއްވެސް ގުޅުމެއް ބާއްވަން ބޭނުންފުޅު ނުވާ ކަމަށެވެ. ނަމަވެސް، ވައިޓް ހައުސްގެ އިގްތިސާދީ އިންޒާރުތަކާ ކުރިމަތިލައި، ސްޕެއިންއިން ވަނީ ހަނގުރާމައާ ދެކޮޅުކަން އަލުން ތަކުރާރުކޮށްފައެވެ.
ސްޕެއިންގެ ބޮޑުވަޒީރު ޕެޑްރޯ ސަންޗޭޒް ބުދަ ދުވަހު އެކްސްގައި ކުރެއްވި ޕޯސްޓެއްގައި ވިދާޅުވީ، ދުނިޔެއާއި ޔޫރަޕް އަދި ސްޕެއިންއިން މީގެ ކުރިންވެސް މިފަދަ ނާޒުކު ދަނޑިވަޅުތަކާ ކުރިމަތިލާފައިވާ ކަމަށެވެ. އަދި 2003 ވަނަ އަހަރު ޒިންމާދާރުކަން ކުޑަ މަދު ލީޑަރުންތަކެއް ވެގެން މެދުއިރުމަތީގައި ކުރި ޣައިރު ގާނޫނީ ހަނގުރާމައެއްގެ ތެރެއަށް އެންމެން ދަމައިގަތް ކަމަށާއި، އޭގެ ނަތީޖާއަކަށްވީ ބިރުވެރިކަމާއި ހިތާމަ އެކަނި ކަމަށް އޭނާ ވިދާޅުވިއެވެ.
ސަންޗޭޒް އިތުރަށް ވިދާޅުވީ، ސްޕެއިންގެ ސިޔާސަތަކީ އަދިވެސް ހަނގުރާމައާއި، ބައިނަލްއަގުވާމީ ގާނޫނުތަކާ ޚިލާފުވުމާ ދެކޮޅު ހެދުން ކަމަށެވެ. އަދި ބޮން އަޅައިގެން ދުނިޔޭގެ މައްސަލަތައް ހައްލުކުރެވިދާނެ ކަމަށް ދެކޭ "ކުށްހީ" ގަބޫލުނުކުރާނެ ކަމަށްވެސް އޭނާ ވިދާޅުވިއެވެ.
އީރާނުގެ ރައީސް މަސްއޫދު ޕެޒެޝްކިއަން ވަނީ ބުދަ ދުވަހު ސްޕެއިންގެ މި ނިންމުމަށް ތައުރީފު ކުރައްވާފައެވެ.
ސޯޝަލް މީޑިއާގައި ކުރެއްވި ޕޯސްޓެއްގައި އީރާނުގެ ރައީސް ވިދާޅުވީ، އިޒްރޭލާއި އެމެރިކާ ގުޅިގެން ހިންގާ އިންސާނީ ހައްގުތަކަށް އަރައިގަތުމާއި، އީރާނު ހިމެނޭހެން އެކި ގައުމުތަކަށް ދެމުންދާ އަސްކަރީ ހަމަލާތަކާ ދެކޮޅަށް ސްޕެއިންއިން ގެންގުޅޭ ޒިންމާދާރު ސިޔާސަތުން ހާމަވަނީ، ހުޅަނގުގެ ގައުމުތަކުގައި އަދިވެސް އަޚްލާގު ހުރި ހޭލުންތެރި ސިކުނޑިތަކެއް ހުރިކަން ކަމަށެވެ. އަދި ސްޕެއިންގެ އޮފިޝަލުން ގެންގުޅުއްވާ ސިޔާސަތަށް އޭނާ ވަނީ ޝުކުރު އަދާކުރައްވާފައެވެ.
އީރާނަށް ދެމުންދާ ހަމަލާތަކާ ދެކޮޅަށް ޔޫރަޕްގެ ގައުމުތަކުގެ ތެރެއިން އެންމެ ސާފުކޮށް އަޑުއުފުލާ ގައުމަކަށް ސްޕެއިން ވަނީ ވެފައެވެ.
ޔޫރަޕިއަން ޔޫނިއަން (އީޔޫ) އިން ވަނީ، އެމެރިކާއާއި އިޒްރޭލުން އީރާނަށް ދެމުންދާ ހަމަލާތައް ކުށްވެރިކުރުމުގެ ބަދަލުގައި، މަސްރަހް ފިނިކުރުމަށާއި އާންމުން ރައްކާތެރިކުރުމަށް ގޮވާލާފައެވެ.
ސްޕެއިންއަކީ އިޒްރޭލުން ޣައްޒާ ގައި ހިންގަމުންދާ ނަސްލު ނައްތާލުމުގެ ހަނގުރާމައަށްވެސް އެންމެ ބޮޑަށް ފާޑުކިޔަމުންދާ އެއް ގައުމެވެ.
