އީރާނާ ދެކޮޅަށް ދޭ ހަމަލާތަކުގައި އިންޑިއާގެ ބަނދަރުތައް އެމެރިކާއަށް ދޫކޮށްފައިވާ ކަމަށް ބުނި ވާހަކަތައް ދޮގުކޮށްފި

އީރާނާ ދެކޮޅަށް ކުރަމުންދާ ހަނގުރާމައިގައި އެމެރިކާގެ ކަނޑުގެ ސިފައިން ބޭނުންކުރުމަށް އިންޑިއާގެ ބަނދަރުތައް ދޫކޮށްފައިވާ ކަމަށް ބުނެ ދެކެވޭ ވާހަކަތައް އިންޑިއާގެ އެކްސްޓާނަލް އެފެއާޒް މިނިސްޓްރީން ދޮގުކޮށްފިއެވެ.

އެމެރިކާގެ ސެކްރެޓަރީ އޮފް ޑިފެންސްގެ ކުރީގެ އެޑްވައިޒަރެއް ކަމަށްވާ ޑަގްލަސް މެކްރެގޯ، ކަނާތު ފިޔައިގެ ހަރުކަށި ފިކުރަށް ތާއީދުކުރާ "ވަން އެމެރިކާ ނިއުސް ނެޓްވޯކް" (އޯ.އޭ.އެން) އަށް ދިން އިންޓަވިއުއެއްގައި ބުނެފައިވަނީ، ހިނގަމުންދާ ކުރިމަތިލުންތަކުގެ ތެރޭގައި އެމެރިކާގެ އަސްކަރީ މަނަވަރުތަކުން އިންޑިއާގެ ބަނދަރުތައް ބޭނުންކުރަމުންދާ ކަމަށް ބެލެވޭ ކަމަށެވެ.

މިކަމާ ގުޅިގެން އިންޑިއާގެ ފޮރިން މިނިސްޓްރީން ނެރުނު ބަޔާނެއްގައި ބުނެފައިވަނީ، އެމެރިކާގެ ޗެނަލެއް ކަމަށްވާ އޯ.އޭ.އެން އިން އިންޑިއާގެ ބަނދަރުތައް އެމެރިކާގެ ކަނޑުގެ ސިފައިން ބޭނުންކުރާ ކަމަށް ބުނެ ފަތުރަމުންދާ ޚަބަރުތަކަކީ ދޮގު އަދި އެއްވެސް އަސާސެއް ނެތް ވާހަކަތަކެއް ކަމަށެވެ. އަދި މިފަދަ ހަގީގަތާ ޚިލާފު ވާހަކަތަކަށް ސަމާލުވުމަށް ވެސް އެ މިނިސްޓްރީން ވަނީ އިލްތިމާސްކޮށްފައެވެ.

އިންޑިއާއިން މިކަން ދޮގުކޮށްފައި މިވަނީ، އިންޑިއާއިން ބޭއްވި އަސްކަރީ ތަމްރީނުތަކެއް ނިންމާލުމަށްފަހު ފުރައިގެން ދިޔަ އީރާނުގެ މަނަވަރަކަށް، ސްރީލަންކާ ކައިރިން އެމެރިކާގެ ސަބްމެރީނަކުން ދިން ހަމަލާއާ ގުޅިގެން ބައިނަލްއަގުވާމީ ފެންވަރުގައި ފާޑުކިޔުންތައް އަމާޒުވެފައިވާ ދަނޑިވަޅެއްގައެވެ.