އީރާނުން އިންޒާރު: އީރާނުގެ އެމްބަސީއަކަށް ހަމަލާދީފި ނަމަ އިޒްރޭލުގެ ހުރިހާ އެމްބަސީތަކަކީ ހަމަލާ ދެވިދާނެ ތަންތަން

ލުބުނާނުގައި ހުންނަ އީރާނުގެ ޑިޕްލޮމެޓިކް މިޝަނަކަށް ނުވަތަ އެ ގައުމުގެ މަންދޫބުންނަށް އިޒްރޭލުން ހަމަލާދީފި ނަމަ، ދުނިޔޭގެ އެކި ކަންކޮޅުތަކުގައި ހުރި އިޒްރޭލުގެ ހުރިހާ އެމްބަސީތަކަކީ ހަމަލާދެވިދާނެ ސައްހަ އަމާޒުތަކެއް ކަމަށް ބަލާނެ ކަމުގެ އިންޒާރު އީރާނުން ދީފިއެވެ.

އީރާނުގެ ހަތިޔާރު އެޅި ފައުޖުތަކުގެ ތަރުޖަމާނު ޖެނެރަލް އަބުލްފަޟްލް ޝެކަރްޗީ މި އިންޒާރު ދެއްވީ، ލުބުނާނުގައި ތިބި އީރާނުގެ މަންދޫބުން 24 ގަޑިއިރު ނުވަނީސް އެ ގައުމުން ފޭބުމަށް އިޒްރޭލުގެ އަސްކަރިއްޔާއިން މުހުލަތެއް ދީފައި ވަނިކޮށެވެ.

ލުބުނާނުގައި ހުންނަ އީރާނުގެ އެމްބަސީއަށް އިޒްރޭލުން ދެމުންދާ އިންޒާރުތަކާ ގުޅިގެން ނެރުއްވި ބަޔާނެއްގައި ޖެނެރަލް ޝެކަރްޗީ ވިދާޅުވީ، އީރާނުގެ ގާބިލުކަން ހުރި ނަމަވެސް، ދުނިޔޭގެ ގައުމުތަކަށް ކުރާ އިހުތިރާމެއްގެ ބޮޑުކަމުން މިހާތަނަށް އިޒްރޭލުގެ އެމްބަސީތަކަށް އެއްވެސް ފިޔަވަޅެއް އަޅާފައި ނުވާނެ ކަމަށެވެ.

ނަމަވެސް، އީރާނުގެ ޑިޕްލޮމެޓިކް ސަރަހައްދަކަށް (އެމްބަސީއަކަށް) އެއްވެސް ހަމަލާއެއް ދީފި ނަމަ، އެ ސިޔާސަތު މުޅިން ބަދަލުވެގެންދާނެ ކަމަށް އޭނާ އިންޒާރު ދެއްވިއެވެ. ޖެނެރަލް ޝެކަރްޗީ ވިދާޅުވީ އިޒްރޭލުން އެފަދަ ޖަރީމާއެއް ހިންގައިފި ނަމަ، ދުނިޔޭގެ ކޮންމެ ތަނެއްގައި ހުރި އިޒްރޭލުގެ އެމްބަސީއަކީވެސް ހަމަލާދޭންޖެހޭ ސައްހަ އަމާޒެއްގެ ގޮތުގައި ބަލަން އީރާނަށް މަޖުބޫރުވާނެ ކަމަށެވެ.

އަދި އިޒްރޭލާއި އެމެރިކާ ކަކޫ ޖެއްސުމަށް އީރާނުން އަޒުމް ކަނޑައަޅާފައިވާތީ، މި ފިޔަވަޅު ކޮންމެހެންވެސް އަޅާނެ ކަމަށް އޭނާ ވިދާޅުވިއެވެ. މި އިންޒާރުތައް އައިސްފައި މިވަނީ، މިދިޔަ ހޮނިހިރު ދުވަހު އިޒްރޭލާި އެމެރިކާއިން ގުޅިގެން އީރާނަށް ދޭން ފެށި ހަމަލާތަކުގެ ތެރެއިން، އީރާނުގެ އިސްލާމީ އިންގިލާބުގެ ލީޑަރު އަޔާތުﷲ ސައްޔިދު އަލީ ޚާމަނާއީ އަވަހާރަކޮށްލުމާ ގުޅިގެން އުފެދިފައިވާ ނުތަނަވަސްކަމުގެ ތެރޭގައެވެ. އޭގެ ފަހުން ދިން ހަމަލާތަކުގައި މިހާތަނަށް 1،000 އަށްވުރެ ގިނަ މީހުން މަރުވެ، އާންމުންގެ އުމްރާނީ ވަސީލަތްތަކަށް ބޮޑެތި ގެއްލުންތަކެއް ވަނީ ލިބިފައެވެ.

މީގެ އިތުރުން، ލުބުނާނުގެ އެކި ސަރަހައްދުތަކަށް އިޒްރޭލުން ދެމުންދާ ވައިގެ ހަމަލާތައް ވަނީ ވަރުގަދަކޮށްފައެވެ. ފާއިތުވި 48 ގަޑިއިރުގެ ތެރޭގައި އެކަނިވެސް މަދުވެގެން 50 މީހުން މަރުވެ، 350 މީހުން ވަނީ ޒަޚަމްވެފައެވެ.

ލުބުނާނުގެ ހިޒްބުﷲ ޖަމާއަތުން ވަނީ، ލުބުނާނުގެ ދިފާއުގައާއި އަޔާތުﷲ ޚާމަނާއީ އަވަހާރަކޮށްލުމުގެ ބަދަލުހިފުމުގެ ގޮތުން އިޒްރޭލުގެ އަސްކަރީ މަރުކަޒުތަކަށް ސިލްސިލާ ހަމަލާތަކެއް ދޭން ފަށާފައެވެ.

ހަމައެއާއެކު، އީރާނުން ވަނީ އިޒްރޭލުން ހިފާފައިވާ ފަލަސްތީނުގެ ބިންތަކަށާއި، ހުޅަނގު އޭޝިއާގައި ހުރި އެމެރިކާގެ މަރުކަޒުތަކަށް އަމާޒުކޮށް ގިނަ އަދަދެއްގެ ޑްރޯން އަދި މިސައިލް ހަމަލާތަކެއް ދީފައެވެ.