ޚާމަނާއީގެ ހަނދާން އައު ކުރަން ބާއްވަން އޮތް ރަސްމިއްޔާތު ފަސްކޮށްފި

އެމެރިކާ އާއި އިޒްރޭލްގެ ހަމަލާ ތަކުގައި އަވަހާރަވެފައިވާ އީރާނުގެ ރޫހާނީ ލީޑަރު، އަދި އެންމެ މަތީ ވެރިޔާ އާޔަތުﷲ އަލީ ޚާމަނާއީގެ ހަނދާނުގައި ބާއްވަން އޮތް ރަސްމިއްޔާތު ފަސްކޮށްފި އެވެ. 

އީރާންގެ ތަސްނީމް ނިއުސް އެޖެންސީ އިން ވަނީ އެ ރަސްމއިއްޔާތު ފަސް ކޮށްފައިވާ ކަމަށް ރިޕޯޓު ކޮށްފަ އެވެ. ކުރިން ތާވަލު ކޮށްފައި އޮތް ގޮތަށް ބަލާއިރު، މި ރަސްމިއްޔާތު ބޭއްވުމަށް ހަމަޖެހިފައި އޮތީ އީރާންގެ ގަޑިން ބުދަ ދުވަހުގެ ރޭ 10:00ގަ އެވެ. 

އީރާންގެ ރަސްމީ މަސްދަރުތަކާ ހަވާލާދީ ތަސްނީމް ނިއުސް އެޖެންސީ އިން ބުނެފައި ވަނީ، އެ ރަސްމިއްޔާތު ފަސް ކުރަން ޖެހުނީ އިންތިޒާމު ތަކާ ގުޅޭ ލޮޖިސްޓިކަލް ދަތި ތަކެއް ކުރިމަތިވުމުންނެވެ. އެގޮތުން ރަސްމިއްޔާތު ބާއްވާ ވަގުތަށް ބަދަލު ގެނައީ ކަންކަން އިރުތަށް ފުރިހަމަ ކުރުމުގެ ބޭނުމުގައި ކަމަށް އޮފިޝަލުން ވަނީ އެ ނޫހަށް މައުލޫމާތު ދީފަ އެވެ. 

ރަސްމިއްޔާތު ފަސް ކުރަން ޖެހުނު އަނެއް ސަބަބަކީ، އީރާނުގެ އެކި ޕްރޮވިންސް ތަކުގައި ދިރިއުޅޭ ގިނަ އަދަދެއްގެ ރައްޔިތުން މި ޙަރަކާތުގައި ބައިވެރިވުމަށް އެދެމުން ގޮސްފައިވާތީ ކަމަށް އޮފިޝަލުން ބުންޏެވެ. ތަފާތު ސަރަަހައްދު ތަކުން، ވެރި ރަށް ތެހެރާނަށް މީހުންނަށް އާދެވޭނެ އިންތިޒާމުތައް ހަމަޖެއްސުމަށްޓަކައި އިތުރު ވަގުތު ބޭނުންވާތީ، އެ ނިންމުން ނިންމީ ކަމަށް ބުންޏެވެ. 

އީރާންގެ ކުރީގެ ރޫހާނީ ލީޑަރުގެ ހަނދާން އައު ކުރުމާއިި، އެމަނިކުފާނު އަވަހާރަ ވުމުގެ ހިތާމަ ފާޅު ކުރުމަށް ބާއްވާ މި ޙަރަކާތުގައި އީރާންގެ ގިނަ އަދަދެއްގެ ރައްޔިތުން ބައިވެރިވާނެ ކަމަށް ލަފާ ކޮށްފައިވެ އެވެ. ނަމަވެސް، މި ރަސްމިއްޔާތު ދެން ބާއްވާނެ ވަގުތެއް ކަމާ ގުޅޭ އިދާރާ ތަކުން ހާމަ ކޮށްފައި ނުވެ އެވެ. 

އީރާނުގެ ކުރީގެ ރޫހާނީ ލީޑަރުގެ ޒިކުރާ އާކުރުމަށް ބާއްވާ މިފަދަ ރަސްމިއްޔާތުތަކަކީ އެ ގައުމުގެ ގިނަ އަދަދެއްގެ ރައްޔިތުން ބައިވެރިވާ، ވަރަށް ކުލަގަދަކޮށް ބާއްވާ ހަރަކާތްތަކެކެވެ. ނަމަވެސް މިރޭ ބޭއްވުމަށް ހަޖައްސާފައި އޮތް ރަސްމިއްޔާތު ދެން ބާއްވާނެ ވަގުތެއް އީރާނުގެ ކަމާބެހޭ އިދާރާތަކުން އަދި ރަސްމީކޮށް ހާމަކޮށްފައެއް ނުވެއެވެ.